چئویرن: میرزه قلمدان
ترجمه: میرزه قلمدان
میرزه قلمدان

بئله گئتسه دییه‌سن هاممی سخندان اولاجاق،
هاوایا یومروق آتان میرزه قلمدان اولاجاق.

سؤیله‌ییر راوی، دونن نیطقه چیخیب شاه نوه‌سی،
بویوروب میللته رهبردی او تا وار نفسی؛
یئلله‌دیر تئللرینی بایراغی‌نین تیتره‌مه‌سی،
بئله گئتسه دییه‌سن هاممی سخندان اولاجاق،
هاوایا یومروق آتان میرزه قلمدان اولاجاق.

تشکیلاتلانمادادیر دوز اوتوز ایل تک نفری،
آرزوسو گؤزده قالیبدیر هله چاتمیر ظفری،
سئچه بیلمیر بیر عؤمور یئرکؤکودن گولبه‌سری
گل کی ظن ائیله‌ییر او دهرده لقمان اولاجاق،
هاوایا یومروق آتان میرزه قلمدان اولاجاق.

فخریله تاج شهنشاهینی قویموش باشینا،
باخماق اولمور غضبیندن سوزولن گؤز قاشینا؛
وای او گوندن کی بیر آنلیق یوخالیقدان قاشینا
آییلیب ناز یوخودان حالی پریشان اولاجاق،
هاوایا یومروق آتان میرزه قلمدان اولاجاق.

سالماق اولماز تورا زنجیرده یوز ایل ساخلانانی،
راضی ائتمک نئجه مومکون اوره‌یی داغلانانی!
یوخلاماق یالنیش اولاربیر داها چون یوخلانانی،
مایماغین آرزوسو وار کی یئنه سولطان اولاجاق،
هاوایا یومروق آتان میرزه قلمدان اولاجاق.

هله ده تاریخ اونوتماز او پالاندوز ریضانی،
اوغلونون دؤورو یازیق میللتیمین آخدی قانی؛
نئچه مینلر جاوانین چون بئگوناه چیخدی جانی
آیاغین باسسا بو ایرانه قانا قان اولاجاق،
هاوایا یومروق آتان میرزه قلمدان اولاجاق.

ائیله‌ییر تاریخیمیز نیفرت او قولدور کؤپه‌گه،
تاریخی تحریف اوچون یانکی چاغیردی کؤمه‌گه؛
او قاری فیکر ائله‌ییر میللته اولموش مله‌که،
یئتیشه گر ایاغی ایرانا پئشمان اولاجاق
هاوایا یومروق آتان میرزه قلمدان اولاجاق.

چالماسین اؤز سازینی کیمسه اؤزه‌ل ماهوارادان،
آی جماعت چالیشین تفرقه گئتسین آرادان!
بیرلیگیز اولماسا پئشمان اولاجاقسیز سورادان،
اتحادسیز بو وطن دائمی ویران اولاجاق،
هاوایا یومروق آتان میرزه قلمدان اولاجاق.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

نیم پهلوی

میرزه قلمدان
www.ishiq.net

آذربایجان ادبیات و اینجه‌صنعت سایتی

نیم پهلوی

میرزه قلمدان
www.ishiq.net

آذربایجان ادبیات و اینجه‌صنعت سایتی

نیم پهلوی

میرزه قلمدان
www.ishiq.net

آذربایجان ادبیات و اینجه‌صنعت سایتی