ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

ایراندا
خیرالله حق‌بیگی «ساپلاق»(1322-1388)

بحمدلله نه جور سئوسن عدالت واردیر ایراندا،
اوجوزلوق باشدان آشميش، بوللو نعمت واردیر ایراندا.
نه جرئت واردی بیر کسده اوجوز آلسین باها ساتسين،
بئله امره نه دلالدا جسارت واردیر ایراندا.
نه بؤهتان وار، نه یالتاقلیق، نه روشوتدن خبر، یاهو!
نه ده حق سؤیله‌ین شخصه عداوت واردیر ایراندا.
ائدیرلر جنسی پنهان تا کی اصراف ائتمه‌سین ملت،
گرامی محتکرلرده مهارت واردیر ایراندا.
بو «غیرانتفاعی» کلمه‌سی بیر باشقا نیت‌دیر،
بوتون یوخسوللارا بير اؤزگه صؤحبت واردیر ایراندا.
دئییرسن آند ایچیم حاشا گرانلیقدان خبر یوخدور،
نه خلقی سويماغا تاجرده جرأت واردیر ایراندا.
اولوبدور مملکت آباد، اوره‌کلر غصه‌دن آزاد،
او دور علت کی حمدالله دیانت واردیر ایراندا.
نه جرئت واردی دللالدا یازیق یوخسوللاری سویسون؟!
نه غم- غصه آشیر باشدان، نه مؤحنت واردیر ایراندا.
نه آجلیق وار، نه یوخسوللوق، نه بیمارلیق، نه بیکارلیق،
نه ده بیر عده‌ده میلیونلا ثروت واردیر ایراندا.
ائله بير عده‌لر وار میلیونا ناز ائیله‌ییر گونده،
اگر یوخسول تاپانمیر، باشقا علت واردیر ایراندا.
داها شمشیر بران ایله باشین دوغرایان یوخدور،
نه بیر ذره خرافات و جهالت واردیر ایراندا.
خلاصه مملکت آباد اولوبدور عدل و داد ایله،
بوتون یوخسوللارا اولدوقجا حؤرمت واردیر ایراندا.
بئش- اون میلیون اگر افیون چکن وار چوخ دا عيب ائتمز،
اونون قلیان آلیر سممین، مهارت واردیر ایراندا.
ییغیشدیردیق شرابی، ودکانی شکر اولسون آللاهه،
فقط افیون‌یله تریاکه علت واردیر ایراندا.
نه بیژلیک وار، نه قولدورلوق، نه سیرتیقلیق، نه یالتاقلیق،
بئله بیر ایشلره ایندی نه حاجت واردیر ایراندا؟!
نه چون بیكار گزیر یوخسول؟، گئدیب دللاليق اؤیره‌نسين،
بازاردا دونبالاق سالسین، رقابت واردیر ایراندا.
تعجب‌دیر بئله وضعه نییه شکر ائیله‌میر ملت،
مگر فقر و فلاکت‌دن علامت واردیر ایراندا؟!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *