یاسلی ساوالان- سؤز: عباس بارز
سس: منوچهر عزیزی(هارای)

قایناق: آذربایجان موسیقی کانالی
پرتره: صابر بقال اصغری

ایضاح: بو سس فایلی یاییلاندان سونرا جناب آیدین تبریزلی‌دن بئله بیر ایضاح الیمیزه چاتدی:

حؤرمتلی ائلدار بی موغانلی

سالاملارلا
دقتنیزه چاتدیریرام کی: «یاسلی ساوالان» عنوانلی دئکلمه‌نی – یاخین دوستوم و قلمداشیم «عباس اسلامی» (بارز)ین اثرینی- گونش ایلی ۱۳۵۴ده، «منوچهر عزیزی»‌نین سسی ایله، تبریز رادیوسونون دانشسرا خیابانینداکی بیناسی‌نین ایکی نومره‌لی استودیوسوندا (کیچیک استودیودا) – رئژیسور و سس اوپئراتورو وظیفه‌سینده- من نوارا یازمیشام. او گونلر هله آقای عزیزی گونده‌لیک ایکی ساعت «آذربایجانی» آدلانان وئرلیشین مسئولی ایدی، شعر یازمازدی و «هارای» تخللوصونه ده مالیک دئییل ایدی. من برنامه‌نین پرادئسیری(تهیّه کننده)وظیفه‌سینی داشییردیم و پراقرامین عمده و ثابت موللیفی کیمی چالیشیردیم. همان زامان «رحیم رییس‌نیا»، «عبدالحسین ناهید»، «علی‌اکبر صفرزاده»، «حسین خشکباری»، «کریم شفایی» ده بیزیم برنامه‌یه مطلب یازیردیلار و رحمتلیک «غلامحسین فرنود»، هر گئجه ساعت ۲۱ ده تبریز رادیوسوندان ائفیره گئدن – فارس دیللی- بیر وئریلیشی (دفترِ ادبیّات و هنر) کی اول‌لر «محمود قبه‌زرین» و «اکبر لَکلری»، سونرالار ایسه من ضبط ائدیردیم، قلمه آلیردی. «دفتر ادبیّات وهنر» برنامه‌سینی «سعید قائم‌مقامی» (شرقی آذربایجانین اوگونکو تئله رادیو مرکزینین کُل مودیری) و اونون حیات یولداشی «لیدا خانیم قائم مقامی» آپاریردیلار.

                      آیدین تبریزلی(س.ب)