اوخوماق زامانی: 8 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
رولان بارت
چئویرن: جاوانشیر یوسیفلی‌
ترجمه: جاوانشیر یوسیفلی‌
جاوانشیر یوسیفلی‌
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

بالزاک «ساررازین» نووئللاسیندا قادین پالتاری گئیینمیش خدیم کیشی حاققیندا دانیشارکن بئله بیر جومله ایشله‌دیر: «و ائله اصیل قادین ایدی، قفیلدن باش قالدیران قورخو حیسسی، آنلاشیلماز شیلتاقلیقلاری، اینستینکتیو هیجانلاری، سبب‌سیز قابالیغی، حریصلییی و بیر ده فسونکار، اینجه حیس‌لری ایله بیرگه…» بو سؤزلری دئین کیمدی بئله؟ بلکه قادین‌لیباسی آلتیندا خدیمی سئزمه‌مه‌یه چالیشان نووئل قهرمانی؟ یا بلکه اؤز شخصی تجروبه‌سیندن قادین حاققیندا فیکیر یورودن بالزاک – فرد؟ یاخود قادین ناتوراسی باره ده حؤکم سورَن ادبی تصوورلری ایزله‌ین یازیچی بالزاک؟ بلکه عموم بشری حکمتدی بو؟ کیم بیلیر؟! رومانتیک پسیخولوژی اووقاتین تظاهورودورمو بو؟ نه‌دیرسه، بیز اونو هئچ وعده بیله بیلمیه‌جه‌ییک، بئله بیر سببدن کی، محض آدینا یازی دئدیییمیزده سس، منبع، مأخذ باره ده هر جور آنلاییش، ساده‌جه گؤمولور! یازی – بلیرسیز‌لیین، غئیری-یئکجینس‌لیین، ایکی معنالی‌لیغین ائله بیر مکانیدیر کی، بورادا بیزیم سوبیئکتیولییمیزین ایزلری یوخ اولور. بو، ائله بیر آغ-قارا لابیرینتیدیر کی، هر جور اؤزونه بنزرلیک و ایلک نؤوبه ده یازان آدامین جیسمانی نشانه‌سی ایتیب گئدیر.
گؤرونور، بو ائله همیشه بئله اولوب: اگر احوالات ائله احوالات خاطیرینه ناغیل ائدیلیرسه، بو پروسئسده گئرچکلییه بیرباشا تاثیر و مداخیله دن، یعنی سون نتیجه ده سیموولیک فعالیتدن اؤزگه هر هانسی فونکسییادان [کارکرد، ایشلک] سؤز گئتمیرسه، – سس اؤز منبعیندن قوپوب آیریلیر، مؤللیفین «حجره‌سینه» اؤلوم تشریف گتیریر و یازی دا ائله بو مقامدان باشلانیر. آنجاق مختلیف دؤنملرده بو حادیثه فرقلی شکیلده قاورانیلیب. بئله کی، ابتدایی جمعیتلرده ناغیلچیلیقدا ساده بیر آدام یوخ، خوصوصی مئدیاتور-شامان، یاخود ناغیلچی مشغول اولوردو؛ نه دئییرسینیز دئیین، اونون تحکییه کودلاری ایله رفتاریندان («پئرفورماسییا») لاپ شؤوقه ده گلمک مومکوندور، آمما هئچ وجهله «دوها»سیندان یوخ… مؤللیف فیقورو، اصلینده یئنی دؤوره مخصوصدور؛ بئله چیخیر کی، بو آنلاییشی اینسان جمعیتی اؤزو اوچون ائله بیر مقامدا آشکارلاییب کی، (شوبهه‌سیز، اینگیلیس ائمپیریزمی، فرانسیز راسیونالیزمی و رئفورماسییانین تثبیت ائتدییی شخصی اعتقاد سایه‌سینده)، بو دؤورده- اورتا عصرلرین سونا یئتدییی زاماندا فردی‌لیاقت گوجلنمه‌یه باشلاییب. فیکریمیزین منطیقی آخاری اونا دیره‌نیر کی، ادبیات عالمینده «موللیف شخصیتی» کاپیتالیزمین ایدئولوگییاسینی یئکونلاشدیران پوزیتیویزمده [اولوملولوق] داها گئنیش قاباریقلاشیب. گونو بو گون ده مؤللیف ادبیات تاریخی درسلیکلرینده، یازیچیلارین بیوقرافییاسیندا، ژورنال مصاحبه‌لرینده و شخصیتی ایله یارادیجیلیغینی بیر اینتیم گونده‌لیک فورماسیندا بیرلشدیرمه‌یه جهدده بولونان ادیبلرین تفککورونده حؤکمرانلیق ائدیر. بیزیم مدنیتده مؤوجود ادبیات اوبرازی‌نین کئچیلمز حدودلاریندا مؤللیف شریک‌سیز حاکیم‌لیک ائدیر – شخصیتی، حیات تاریخچه‌سی، ذؤوقو، ائحتیراسلاری ایله؛ تنقید اوچون گونو بو گون ده بودلئرین بوتون یارادیجیلیغی اونون، نئجه دئیرلر، حیاتی‌نین آلینماماسیندادیر؛ وان‌گوگون بوتون یارادیجیلیغی اونون اوره‌ک خسته‌لیینده، چایکووسکی‌نین بوتون صنعتی اونون معلوم قوصوروندادیر؛ یارادیلان اثرین شرحی و ایضاحی اول-آخیر گلیب مؤللیف اوزرینه دیره‌نیر، ائله‌بیل کی، هر دفعه، هر بیر اثرده آز و یا چوخ درجه ده شفاف آللئقوریک [تمثیلی] معنا قاتینی کئچیب عئینی بیر شخصین – مؤللیفین سسینه اوغراشیریق.
***
مؤللیفین حاکیمیتی هله چوخ گوجلو ایسه ده (یئنی تنقید اونون مؤقعینی بیر قدر ده محکم‌لندیردی)، شوبهه‌سیز کی، آرتیق بعضی یازیچیلار اونو چوخدان یئریندن لاخلادا بیلمیشلر. فرانسادا بو ایشی ایلکین اولاراق، هئچ شوبهه‌سیز، مالارمه گؤرموشدو، او، قلبی‌نین، روحونون هر ذره‌سیله اولجه دن گؤروردو کی، دیلین اؤزونو اونون صاحیبی‌نین یئرینه قویماق لازیمدیر. مالارمه گومان ائدیر کی، – بو هم ده ائله بیزیم حاضیرکی تصوورلریمیزله اوست-اوسته دوشور، – دانیشان مؤللیف یوخ، دیلین اؤزودور؛ یازی ازلدن سیماسیزلاشدیریلمیش بیر فعالیت دیر (بو شخصسیزلشدیرمه نی هئچ بیر حالدا یازیچی رئالیستین «آختالانمیش» اوبیئکتیولییی ایله قاریشدیرمامالی)، ائله بیر فعالیت کی، «من»ین یوخ، دیلین اؤزونون فعالیتینه شرایط یارادیر؛ بوتون مالارمه پوئتیکاسی‌نین مغزی ائله مؤللیفی اوزاقلاشدیرماغیندا، اونو یازی ایله عوض ائتمه‌سینده دیر، – بو ایسه، بیزیم گؤره‌جه ییمیز کیمی، اونا اوخوجو استاتوسو حوقوقو قازاندیرماقدیر. پسیخولوژی «من» نظریه‌سی ایله ال-آیاغی باغلانمیش والئری، مالارمه نین ایدئیالارینی خیلی یومشالتمیشدی؛ آنجاق اؤزونون کلاسیک ذؤوقونه آرخالاناراق او، ریتوریکا [فن بیان] تجروبه‌سینه اوز توتدو؛ ائله بو سببدن دؤنمه دن مؤللیفی شوبهه یه و مسخره یه معروض قویور، اونون فعالیتی‌نین دیل آسپئکتینی [سرشت] و «گؤزله نیلمز» خاراکتئرینی قاباردیر، هم ده اؤزونون بوتون نثر اثرلرینده اعتیراف ائتمه یی طلب ائدیردی کی، ادبیاتین ماهیتی – سؤزده دیر، یازیچی‌نین قلب دونیاسینا هر نؤوع ایسنادلار ایسه – مؤوهوماتدان اؤزگه بیر شئی دئییلدیر. حتتا مشهور پسیخولوگیزمی ایله تانینان قلب اوستاسی پروست دا – ساده‌جه تفررعات خیردالامیردی، تفررعاتین درین‌لیکلرینه گئتمکله یازیچی ایله اونون پئرسوناژلاری‌نین موناسیبت لرینی مرکب لشدیریر – آچیق-آشکار قارشیسیندا دوران وظیفه نی بوندا گؤروردو… پروست تحکیه چی قیسمینده نه ایسه گؤرن، عذاب چکن آدامی یوخ، حتتا یازان آدامی دا سئچمیردی، ائله بیریسینی سئچیردی کی، او، هله یازماق حاققیندا دوشونور (اونون رومانینداکی جاوان اوغلان، – یئری گلمیشکن، اونون نئچه یاشی وار، کیمدیر، نه ایشله مشغولدور – یازماق ایسته ییر، آنجاق باشلایا بیلمیر و رومان دا او زامان بیتیر کی، نهایت، یازی آلینیر، ایلک جومله‌سی یازیلیر)، بو یوللا پروست موعاصیر یازی ائپوپئیاسی [حماسه] یاراتدی. بو ساحه ده او، کؤکلو چئوریلیشه نایل اولدو؛ روماندا اؤز حیاتینی تصویر ائتمک یئرینه، – آخی چوخ زامان مالی مالا قاتیب ائله بئله ده دئییرلر،-او، اؤز کیتابی‌نین نمونه‌سینده ائله اؤز حیاتینی، عؤمرونو ادبی اثره دؤندره بیلمیشدی و بیزه آیدین اولور: شارل کی مونتئسکیو دان کؤچورولمه میشدیر، عکسینه، محض مونتئسکیو اؤزونون گئرچک-تاریخی حرکت و علامتلریله اولسا-اولسا شارل دان گلمه معین فراقمئنتی [پارچا]، یاخود «قیرینتی»نی تمثیل ائدیر. بو سیرادا سونونجوسو سوررئالیزم دیر، او، شوبهه‌سیز کی، دیلین سووئرئن [حاکیم، استعلا] حقوقلارینی قبول ائتمک اقتیداریندا دئییلدی؛ دیل سیستئم اولدوغو اوچون و رومانتیزم روحوندا بو حرکتین مقصدی هر جور کودون دارماداغین ائدیلمه‌سی اولدوغو اوچون (بو ایللوزور [رویکرد] مقصددیر، چونکی کودو عمومن داغیتماق مومکونسوزدور، اونو یالنیز «آزدیرماق» اولار) سوررئالیزم بونا گئده بیلمزدی؛ آنجاق سوررئالیزم دایم معنانین کسکین‌لیکله و بیله رکدن پوزولماسینا چاغیریردی (بدنام «معنا قامارلاما» حادیثه‌سی)، او، طلب ائدیردی کی، باشین هله عاغلینا گلمه ین لری بئله ال مومکون قدر تئز قئیده آلسین (اوتوماتیک یازی). سوررئالیزم قروپلا (بیرگه) یازینی پرینسیپجه قبول ائدیب، رئال اولاراق پراکتیکادان کئچیردیینه و بوتون بونلارا گؤره مؤللیفین مقدس‌لیک تاختیندان دوشورولمه‌سی ایشینه (دئساکرالیزاسییا) بؤیوک تؤحفه وئردی. نهایت، ادبیاتین چرچیوه‌لریندن کناردا (یئری گلمیشکن، ایندی بئله بیر حد قویما اؤزونو توکتمیشدیر) مؤللیف فیقورونون آنالیزی و داغیدیلماسی اوچون ان دیرلی سیلاحی موعاصیر‌لینقویستیکا [دیلچی‌لیک، زبانشناسی] وئردی، بئله بیر ساده حقیقتی پیچیلدادی کی، اؤز-اؤزلویونده سؤیلم – بوشونا بیر پروسئسدیر [گئدیش]، اؤز-اؤزونه ده باشا چاتیر، بئله کی، اونو دانیشانلارین شخصیتی ایله دولدورماغا لزوم یوخدور.‌لینقویستیکا نؤقطه ی-نظریندن مؤللیف یالنیز و یالنیز یازان آدامدیر، نئجه کی، «من» ده ائله دانیشاندا «من» دئیندیر؛ دیل «شخصیتی» یوخ، «سوبیئکت»ی تانییر و یالنیز نیطق آکتی‌نین [مقاوله] داخیلینده معین لشن، اوردان کناردا هئچ بیر مندریجه‌سی اولمایان بو سوبیئکت بوتونلوکده دیلی اؤزونه «ییغیب»، اونون ایمکانلارینی تامامن توکتمه‌یه ده بس ائله ییر.
***
مؤللیفین کنارلاشدیریلماسی (برئشتین دالینجا بورادا اصل «اؤزگلشمه دن» سؤز آچماق مومکوندور – ادبی «صحنه‌نین» ان درین بیر گوشه‌سینده بالاجا بیر فیقور کیمی مؤللیفین بویو گئتدیکجه کیچیلیر) – تکجه تاریخی فاکت، یاخود یازی‌نین ائفئکتی دئییلدیر: بوتون موعاصیر متن اؤزولونه، کؤکونه قدر دییشیر و بئله دئیک، بو دفعه او، ائله شکیلده یارادیلیر و اوخونور کی، مؤللیف بوتون سوییه‌لرده کنارلاشدیریلمیش اولور. هر شئیدن اؤنجه زامان پئرسپئکتیوی باشقا شکله دوشور. هله ده مؤللیفه اینانانلار اوچون او هر آن کئچمیش زاماندا، اونون کیتابینا نظرن دوشونولور؛ مؤللیف ده، کیتابدا اؤز-اؤزلویونده «قدر»له «سونرا» آراسیندا استقامتلندیریلمیش عمومی اوخا «کئچیریلمیشدیر»، بئله حساب ائدیلیر کی، مؤللیف کیتابی بئینینده، فیکرینده بسله ییر، اوندان اول مؤجود اولدوغو اوچون عذاب چکیر، اونون اوچون یاشاییر، بو ائله آتانین اوغولدان اؤنجه گلمه‌سی کیمی دیر. موعاصیر سکریپتورا [کاتیب] گلدیکده، او، متن له عئینی زاماندا مئیدانا چیخیر، یازییا قدر و یازی خاریجینده هئچ بیر مؤجودلوق علامتینه مالیک دئییل دیر؛ بو قطعیین او سوبیئکت ده دئییل کی، اونا نظرن مؤللیفین کیتابی پرئدیکات اولسون؛ اورتادا یالنیز بیرجه زامان قالیر – نیطق آکتی زامانی، هر هانسی متن ده دایم «ایندی» و «بوراداجا» یازیلمیش اولور. بونون نتیجه‌سی (و یا سببی) کیمی «یازماق» فعلی‌نین معناسی ایندن بئله نه ایسه قئیده آلماق؛ تصویر ائتمک، کلاسیک لرین بویوردوقلاری کیمی «رسم ائتمک» دئیه نظرده توتولمامالی، اوکسفورد مکتبیندن اولان فیلوسوفلارین آردینجا‌لینقویست لرین «پئرفورماتیو» {رفتار} آدلاندیردیق لاریندا مؤجود اولمالیدیر – بئله بیر نادیر فعل فورماسی وار، یالنیز و یالنیز ایندیکی زامانی گؤستریر و بو حالدا ایفاده آکتی اؤزونده بو آکتدان غئیری باشقا مضمونو (باشقا دئییمی) احتیوا ائتمیر: مثلا، حؤکمدارین دیلیندن دئییلن: «فرمان اولدو کی…» یاخود قدیم شاعیرین دیلینده: «اوزان سؤیله میش»… (مقایسه ائت: «آشیق دئیر»- ترجمه‌چی). دئمه‌لی مؤللیف‌له اوزلشن موعاصیر سکریپتور اؤز سلفی‌نین پاتئتیک [بیهوده] باخیشلارینا اویغون، ظن ائده بیلمز داها، بس ال فیکرین، یاخود دویغولارین آردینجا چاتدیرا بیلمیر، اگر بو، دوغرودان دا بئله دیرسه، او، قدرله راضیلاشیب اؤزو بو مقامی نظره چارپدیرماغا و دایم اثری‌نین فورماسینی جیلالاماغا بورجلو اولاردی؛ عکسینه، سسله هر جور علاقه نی کسن ال تام جیزگی ژئستی (ایفاده ژئستی یوخ!) ایجرا ائدیر و باشلانغیجی، چیخیش نؤقطه‌سی اولمایان هر هانسی ایشاره وی ساحه جیزیر؛ هر حالدا بو ساحه یالنیز دیلین اؤزوندن نشت ائدیر، یارانیر، او ایسه اوسانمادان باشلانغیج نؤقطه‌ حاققینداکی هر دورلو تصوورو شوبهه آلتینا آلیر.
***
ایندی بیز بیلیریک کی، متن واحید، تئولوژی [خداشناسانه] معنا ایفاده ائدن (مؤللیف – آللاهین «ایراده‌سی») خطی سؤز سیراسی دئییل دیر، عکسینه، ائله بیر چوخ اؤلچولو مکاندیر کی، اورادا یازی‌نین مختلیف نؤعلری بیر آرایا گلیر، بحثه گیریر و اونلاردان هئچ بیری باشلانغیج، ایلکین حساب ائدیلمیر؛ متن مینلرله مدنیت منبعلرینی‌ نیشان وئرن سیتات [منبع، مراکز] لاردان هؤرولور. یازیچی الده قلم دایانمادان یازان بووار و پئکوشئیه بنزه ییر، عئینی زاماندا هم بؤیوک، هم ده گولونج اولان بو فردلرین درین کومیزمی [بلاهت] اؤزونده محض یازی حقیقتینی حفظ ائدیر؛ او، یالنیز اول یازیلان بیر شئیی تقلید ائده بیلر، اونون قلمه آلدیغی هئچ وعده ایلکین اولا بیلمز؛ اونون حاکیمیتی مختلیف یازی نؤع لرینی بیر-بیرینه قاریشدیرماق؛ – اونون ایختیاریندا اولان بودور – اونلاری باش-باشا گتیریب توققوشدورور و هئچ زامان اونلاردان بیرینه بوتونلوک له اساسلانمیر؛ اؤزونو ایفاده مقامینا یئتیشرسه ده، اونا بیلمک گرکدیر کی، «وئرمک» ایسته دییی داخیلی «ماهیت» – ایچینده کی سؤزلرین آنجاق دیگر سؤزلرین کؤمه یی ایله ایضاح اولوندوغو حاضیر سؤزلوکدن باشقا بیر شئی دئییل دیر و بو – سونسوز بیر ایش دیر. توماس دئ کوینسی‌نین اوغراشدیغی بیر احوالاتی بونا ان پارلاق نمونه سایماق مومکوندور: بودلئرین دئدیینه گؤره، او، یونان دیلی‌نین اؤیره نیلمه‌سینده او درجه ده «یئتیشمیشدی» کی، بیر گون ان موعاصیر اوبراز و فیکیرلری بو اؤلو دیل واسیطه‌سیله ایفاده ائتمک عشقینه دوشموش، بو مقصدله همیشه قوللوغوندا حاضیر دوراجاق بیر لوغت ده حاضیرلامیشدی، بو لوغت – اساسی سؤزون اصل معناسیندا تمیز ادبی ترجومه‌لره علاوه ائدیلن شرح لردن عیبارت کیتابدان چوخ-چوخ بؤیوک و ایری حجم‌لی آلینمیشدی. مؤللیفین یئرینی توتان سکریپتور، ائحتیراس، اوقات، حیس-هیجان و تصورات یوخ کی، بو نهنگ لوغتدن عیبارتدیر، یازیسی آنسیزین بورادان بارینیر؛ بئله کی، حیات اولسا-اولسا کیتابی تقلید ائدیر، کیتابین اؤزو ایسه، ایشاره‌لردن هؤرولمک له، هانسیسا اونودولموش نسنه‌لره تقلید ائدیر و بئله‌جه سونو بیلینمزلییه قدر.
***
مادام کی، مؤللیفین کنارلاشدیریلماسی آرتیق باشا چاتمیشدیر، متنین هر جور آچیلیشینا ادعالار دا اساسسیز سسلنه جک. متنه مؤللیف وئرمک – آرتیق متنی اَیلتمک کیمی بیر شئیدیر، بو، هم ده اونو یئک معنایا منجر ائتمکله یازینی قاپاماقدیر. بئله بیر باخیش اساس وظیفه‌سینی اثرده مؤللیفی (و یا اونون مختلیف: – جمعیت، تاریخ، قلب، آزادلیق و س. کیمی‌نیشانه‌لرینی) تاپماقدا گؤرن تنقیدی تامامیله تامین ائدیر: اگر مؤللیف تاپیلیبسا، دئمک متن ده «ایضاح ائدیلیب» و تنقیدچی غلبه چالیب. تعججب لو دئییل کی، تاریخن مؤللیفین حاکیم‌لییی هم ده ائله تنقیدچی‌نین حاکیم‌لییی اولوب و او دا تعججب لو دئییل کی، بو گون مؤللیف له بیرگه تنقیدین ده مؤقعیی لاخلامیش اولدو (قوی لاپ یئنی تنقید اولسون). دوغرودان دا، چوخ اؤلچولو یازیدا آچیقلانمالی نه وار کی، یالنیز و یالنیز کلف لری آچماق لازیم گلیر: استروکتورو [قورولوش]، بوتون تکرار و سوییه‌لرینده نظردن کئچیرمک، چکیب-چکیب (جوراب هؤررکن بوشالمیش ایلمه نی چکدییین تک) برکه ده چکمک اولار، سونونا وارماق ایسه یوخ؛ یازی مکانی، – یاریب کئچمک اوچون یوخ کی، – بیزه قاچیش اوچون وئریلیب – یازی دایم معنالار دوغور، «تؤره ییر» – آمما بوراداجا – او اوچوب یوخ اولور، – معنانین سیستئماتیک آزاد اولونماسی گئدیر. بونونلا ادبیات (ایندن بئله، یازی دئمک داها دوغرو اولاردی) متنین ده (بیر متن کیمی بوتون دونیانین دا) آرخاسیندا هانسیسا بیر سیرر گیزلندییی، یعنی یئک معنا اولدوغو مؤقعیندن ال چکه رک، ماهیتجه کونترتئولوژی {ضد خداشناسانه}، اینقیلابی فعالیتینه تام رواج وئریر، بئله کی، معنا سئلی‌نین قارشیسینی آلماماق – نهایتده ائله آللاهین اؤزونو و اونون بوتون نیشانه‌لرینی – راسیونال [عقلانی] نیظامی، علمی و قانونو ردد ائتمک دئمکدیر.
***
بیر داها بالزاکین جومله‌سینه قاییداق. بو جومله نی هئچ کس دئمیر (هئچ کس، – یعنی هئچ بیر شخص): اگر اونون منبعی و سسی مؤجوددورسا دا، یازیدا یوخ، اوخودا مؤجوددور. بونو آنلاماق اوچون چوخ دقیق بیر آنالوگییا [تحلیل] کؤمه ییمیزه یئتیشه بیلر. سون زامانلارین تدقیقاتلاریندا (ژ.پ.وئرنان) یونان فاجیعه‌سی‌نین اساسینی تشکیل ائدن ایکی معنالی‌لیغی نوماییش ائتدیریرلر: اونون متنی هر بیر پئرسوناژین بیرطرفلی باشا دوشدویو ایکی معناسی اولان سؤزلردن هؤرولموشدور («فاجیعه وی»لیک ده محض بو دایمی آنلاشیلمازلیقدان ایره‌لی گلیر)؛ آنجاق کیمسه ده وار کی، هر بیر سؤزو بوتؤولوکده – ایکی‌لییی ایله ائشیده – قاورایا بیلیر، حتتا قارشیسیندا دانیشان پئرسوناژلارین «کارلیغینی» دا ائشیدیر، بو «کیمسه» – اوخوجو، (کونکرئت حالدا دینله ییجی)دیر. یازی‌نین بوتؤولوک ماهیتی بئله‌جه آشکارلانیر: متن فرقلی مدنیت لردن گلن، بیری دیگریله دیالوژی [مکالمه]، پارودیک [هجو آمیز]، مباحیثه وی موناسیبت لره گیرن چئشیدلی یازی نؤع لریندن قورولور، آنجاق بوتون بو چوخلوق معین بیر نؤقطه یه فوکوسلانیر [متمرکز، اوداقلاشماق] و بو نؤقطه‌ ایندیه جن ایصرار اولوندوغو کیمی مؤللیف یوخ، اوخوجودور. اوخوجو – او مکاندیر کی، بورادا یازینی تشکیل ائدن هر شئی واحید سیتاتا قدر حک اولونور؛ متن واحیدلیینی تؤرنیشیندن دئییل، یؤنلدیینده قازانیر، آمما بو یؤنلنمه شخصی عنوانی نظرده توتمور؛ اوخوجو – تاریخی، بیوقرافییاسی، پسیخولوگییاسی اولمایان بیر کسدیر، او، یالنیز یازیلی متنین تشکیل اولوندوغو شتریخ لری [قلمرو] بیر آرایا گتیریب بیرلشدیرن کیمسنه دیر. اؤزونو رییاکارجاسینا اوخوجو حقوقلاری‌نین مدافعه چیسی قیسمینده تقدیم ائدیب ان یئنی یازینی هانسیسا هومانیزم آدینا محاکمه ائتمک جهدلری بو سببدن گولونج دور. اوخوجو کلاسسیک طرزده تنقیدی هئچ وعده ماراقلاندیرمامیشدی، اونون اوچون ادبیاتدا یالنیز یازان آدام مؤجوددور. بیزی داها بو سایاق آنتیفراسیس [ظاهرفریب]لرله آلداتماق اولماز، چونکی بو یوللا یوکسک جمعیت عالی جنابجاسینا غیظله او کسین مدافعه‌سینه قالخیر کی، عملییه یه گلدیکده محض اونو سیخیشدیریب ردد ائدیر، ازیب – محوه سوروکله ییر. ایندی بیز بیلیریک: یازی‌نین گله‌جه یینی تامین ائتمک اوچون اونون باره‌سینده کی میفی ایچ ائتمک گرکدیر – اوخوجونون دوغوشو مؤللیفین اؤلومو باهاسینادیر.
1968. «مانتئیا»

ایضاح: بو یازی حؤرمتلی همت شهبازی واسطه‌سیله یازیمیزا کؤچورولوبدور. بوتون ایکی کروشه [] آراسیندا گلن آچیقلامالار کؤچورن طرفیندن یازیلیبدیر.

*: رولان بارت (به فرانسوی: Roland Barthes) (زادهٔ ۱۲ نوامبر ۱۹۱۵-درگذشتهٔ ۲۵ مارس ۱۹۸۰) نویسنده، فیلسوف و نشانه‌شناس معروف فرانسوی است. بارت در دوران فعالیت حرفه‌ایش نحله‌های گوناگونی را آزمود؛ از جمله مؤلفه‌های مهم کار او ساختارگرایی (Structuralism)، پساساختارگرایی، واسازی دریدایی، لذت گرایی و همچنین تحلیل نشانه‌شناسانهٔ متأثر از سوسور هستند.(منبع: ویکی پدیا)

رولان بارت
اشتراک گذاری در print
چاپ

یک پاسخ

  1. ادبیاتین ان گوزل مقاله سی‌دیر بو. اونون مترجیمینین و کؤچوره‌نین الی آغریماسین. ایشیق سایتیدان خواهش ائلیرم بو کیمی یازیلار آرتیق یئر آییرسین.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

جاوانشیر یوسیفلی‌

جاوانشیر یوسیفلی‌

باشقا اثرلری