۱٫ هیمن اوچون باشلانغیج: گؤزلرین (۱۹۴۳-۱۹۴۸)

گؤزلرین – شیمشکلرین وطنی،
بیر ده گؤز یاشلارینین،
دیللی-دیلاور سس‌سیزلیک، بیر ده…
کولکسیز فیرتینا، دالغاسیز دنیز،
اسیر قوشلار، یاتمیش شیر قیزیل قفسده،
حقیقت کیمی گناه ساچان لعل، گؤهر.
ایشیغین کؤلگه‌یله اوینادیغی تالایا پاییز گلیب
بیر آغاج کی، بوتون یارپاقلاری
قوش اولوب، سوسوب…
بیر مملکت کی، سحری دولموش گؤزلرییله آچیر،
میوه‌لر – اوت توتوب آلیشان سبتده
امید وئرن یالان،
بو دنیانین بوتون گوزگولری، او دنیایا آچیلان قاپی،
برق ووروب سایریشان دنیزین نبضی
گون‌اورتا،
بوز صحراسی…

۲٫ اونوتماق

یوم گؤزلرینی، ظلمته تسلیم اول
کیرپیکلرینین قیزیلی یارپاقلاری آلتیندا
زومزومه ائدن کیمی
خزل کیمی یئره دوشن
سسین کوچه‌سیندن کئچیب
خیالا دالماق
قورتاراجاق یئرینه
سون پرده‌سینه قدر سسین،
سسی باتمیش شلاله کیمی.
کؤلگه‌لره قاریش گئت،
دردینین ایچینده گیزلن، یاشا،
بیر آز دا درینده، سس چاتمایان یئرینده
قوی سوموکلرین – رنگی قاچمیش ایلدیریم
قاماشدیرسین گؤزونو، کور ائتسین سنی
اوردا زیرویله قارانلیق کؤرفز آراسیندا
ماوی للکلرینی آچسین، اود ساچسین.
یوخونون اریین کؤلگه‌لرینده
لوت-عوریانسان، ایسلان اوردا؛
چیخ بدن آدلی قفسدن، بیل کی،
کؤپوک
بیلمیر ساحلده کیمی اونوتدوغونو.
اؤزونو اؤزونده باتیر،
اؤزونده ایتیر، اؤزونو، سونسوزادک.
نئجه کی، دنیز دنیزده بوغولور، باتیر،
اؤزونو د، منی ده اونوت…

۳٫ یاشیل مرکبله یاز

یاشیل مرکب باغلاری، مئشه‌لری، چمنلری اویادیر
حرفلرین اوخودوغو یارپاقلاری،
آغاج اولان سؤزلری
یاشیل برجلر اولان جمله‌لری.
اجازه وئر سؤزلریم یئره دوشسون، سنی اؤرتسون
قار باسمیش تالایا یارپاق یاغیشی کیمی،
سارماشیق آلتینداکی هیکل کیمی،
بو صحیفه دکی یاشیل مرکب کیمی.
اللر، بئل، بوغاز، سینه،
دنیز کیمی تمیز آلین
پاییز مئشه‌سی بوینون
اوت ساپالاغینی دیشله‌ین دوداقلار
تنینه یاشیل نشانه‌لر سپله‌نیب
آغاجین گؤوده‌سی تک.
بو کیچیک ایشیقلی چاپیق اینجیدیر سنی:
سمایا باخ – اولدوزلار دؤیولوب اوستونه…

۴٫ باغ

آخیب گئدن بولودلار، قول-قولا،
یوخودا دوروب گزن بولودلار، مملکت چؤللو-بیابان،
نه سس، نه سمیر…
هر شئی چکیسیزلیکده…
گونشین جیزدیغی شکلی کولک پوزور آن-با-آن.
دؤرد دیوار، کرپیجدن. سارماشیق تونقالی:
قول-بویون آلوولاری ایچینده گؤزلریم
چیمیر. هارداسا کولک وار، هنیری گلیر،
یارپاقلار و اوتلار دیز اوسته چؤکوب.
گون چیچه‌یینین آیاقلاری دولاشیر،
عطرینین ایچینده ایتیب، بوروشوب قالیب. پیغمبرچیچه‌یی،
گؤیروش بیر آز فیکیرلی: شام آغاجی
باغ کیچیک، اَل ایچینده، سما سونسوز.
منیم خارابالیقلاریمدا نمیشلیک جوجریب
گؤزلریمدن باخیب، الینی توخوندورورسان
اؤزونو منده تانییرسان، اورداجا دوشونورسن،
ایچیمده یاشاییر، ایچیمده غیب اولورسان.
***
کوچه‌یله گئدیرم،
آددیملارین سسی
تام باشقا بیر پروسپئکت دن ائشیدیلیر.
اورداسا
اؤزومو ائشیدیرم،
گئجه‌نین ایچییله آددیملایان
هارادا کی،
یالنیز دومان حقیقیدیر.

ایضاح: شعرلری امکداشیمیز «ائلیار پولاد» نشر اوچون سئچیب و عرب الیفباسینا کؤچوروبدور.
*مکزیک شاعری