rais
تاريخ سيناغيندان چيخان قهرمان
(19 آبان 1381 – 1300)/ رحيم رئيس‌نيا

 

تاريخ، قهرمانلارين آغير سيناقدان کئچيرمکله، يئتيشديرير. خالق قهرمانلارين خالق‌لار يارادير، ياشادير; اونلارا ايلهام و گوج باغيشلايير، اونلاردان ايلهام و گوج آلير.

بؤيوک قهرمانلار، بؤيوک خالق‌لارين، يوکسک معنوياتا، مدنيته، اولو ايده‌آلارا، انساني سجيه‌لره مالک اولان خالق‌لارين ائولادلاريدير‌لار .

دئيير‌لر قهرمانلار اؤز محيط‌لري‌نين ياراديلميشي، يئتيشديرمه‌لري‌دير‌لر. بير محيطده‌کي عدالت سيزليک، زورباليق و قانونسوزلوق، حياتي دؤزولمز بير جهنمه چئويرير، اورادا ظلمه، ظلمته قارشي مبارزه‌ده، ايستر- ايسته‌مز يولون تاپيب، فورمالاشاجاق و هر حالدا اؤز قهرمانلارين‌دا ياراداجاقدير. نئجه‌کي مشروطه حرکاتي سونوندا، استبدادا قارشي بير وولکان کيمي پاتلاق وئرير، اؤزونه يول آچير و او يولدا مينلر و اون مينلر مبارز قلمه و سيلاحا ساريلير و دؤيوش ميدانينا آتيليرلار و اونلارين آراسيندان، خالقين باغريندان قهرمانلاردا باش قالديرير کي باشدا گلنلري‌ده ستارخان دير. او بؤيوک قهرمان آلچاق کؤنوللوکله اؤزون، نئجه دئييم، ملتين ايتي آدلانديريردي و دئييردي کي نهايت بودورکي بلکه بير اصيل ايت‌ايميشم کي قاباغا دوشموشم.

او تهراندا گؤروشونه گلنلره و ستايشچيلرينه تواضع کارليقلا بئله دئيير:

“بنده بير خدمت ائتميشم‌سه، ملتين يارديمي‌ايله ائتميشم، يوخسا بير الدن کي‌ سس چيخماز. قدرشناسليغي آذربايجان خالقيندان گره‌ک ائتمک، نه ستار قارا داغلي‌دان. منيم بير افتخاريم وارسا، بو دور کي ملتين خاديمي اولموشام و بوتون بو موفقيتلر آذربايجان ايگيت گنجلري‌نين فداکارليقلاري سايه‌سينده الده ائديليبدير … “

صفرخانين دا سؤزلرينده بئله بير حال وار :

“مندن چوخ سوروشوبلار کي نئجه دؤزدون، نئجه اوسانمادين و 32 ايل سورن اوزون بير زامانداکي بير انسان عؤمرودور، چورومه‌دين؟ بلي، دوزدور، 32 ايل قارانليق قازاماتلاردا مقاومت گؤسترمک، جيسمي و روحي ايشکنجه‌لره قاتلانماق، زور بير ايش دير … چوخلاري‌دا عزيز‌لري‌نين آيريليغينا، آجي حسرتلره، دؤزولمز ايشکنجه‌لره قاتلانا بيلمه‌ييب، حياتا گؤز يومدولار. اما او کي مني و باشقا زنجير داشلاريمي هر جور تحقير و ايشکنجه قارشي‌سيندا انقلابي دؤزوم و دايانماغا چاغيريردي، يالنيز اوميد ايدي. خالقين ظفرينه اولان اوميد و اينام … سونوندا گؤردوک کي ايران ملتي نئجه اؤز چاليشمالاري ايله ظلم و زورباليق سارايلارين يئرله يکسان ائتديلر و دوستاقخانالارين، دمير دووارلاري‌نين ييخيلماسي ايله، من‌ده 32 ايلدن سونرا يولداشلاريملا بيرليکده آزادليغا قاووشدوق … “

سانکي خالق قهرمانلاري‌نين توپراقلاري بير يئردن گؤتورولوب. سؤز يوخ کي بودا اونلارين خالقا باغلي‌ليقلاريندان‌دير.

بير تورک يازاري دئييبدير‌کي قهرمانجاسينا اؤلمه‌يه حاضر اولمايان، قهرمانجاسينا ياشايا بيلمز. صفرخانين خاطراتي بئله‌ بير ياشاييشين، بئله بير قهرمانليغين داستاني‌دير. تشکر ائديريک علي‌اشرف‌درويشيان جنابلاريندان کي بو استقامت حماسه‌سين يازييا چکيبلر و اونو هامي اوچون الده ائديبلر.

يونان اساطيري‌نين آنته آدلي قهرماني، آياغي آناسي اولان يئردن اوزولمه‌يينجه يئنيلمز‌ايدي. صفرخانلاردا ائله باغليليقلاري ايله، عزمکارليقلاري ايله دير کي يئنيلمز‌‌ليک ساحه‌سينه، قهرمانليق سويه‌سينه يوکسليبلر.

ناز پرورده تنعم نبرد راه به عشق

عاشقي شيوه رندان بلاکش باشد.

اوجقارلاردا سايريشان بير اولدوزا وورولمايينجا، گؤيلره اوچماق ممکن دئييل ; شيرين جاندان کئچمه‌يينجه، فرهاد اولا بيلمز‌سن.

ناظم حکمت، شيرين- فرهاد داستاني‌نين يئني بير روايتين ياراديب. بو روايتده فرهادين شيرينه اولان سئوگيسي، خالق سئوگيسينه يوکسليبدير. بورادا فرهاد، داها شيرين‌ين وصالينا چاتماق اوچون دئييل، بلکه بيستون داغي‌نين آرخاسيندا قاينايان بولاغين حيات وئريجي سويون سوسوزلوقدان يانان، اينله‌ين شهره ساري آخيتماق اوغروندا ديرکي بيستوني قازماغا دوام ائدير و بئله ليکله بيلک‌لري او بؤيوک عشقدن گوج آلير و اراده‌سي سينماز اولور; اوناگؤره ده خالقين گؤزونده بير همت وئريجي قهرمانا چئوريلير. ائله‌کي آنالار اوزاق يئرلردن بالالارين بيستونا گتيرير‌لر تا او همت سيمبولون، او يورولمازليق و ايگيتليگ سيمگه‌سين، اونلارا گؤسترمکله روحلارينا همت جوهري آشيلاسينلار و قولاقلاريندا بو حقيقتي چينلاتسينلارکي : کيشي‌لرين همتي، داغلاري قالديرار.

عقل و همت را نمي‌دانم کدامين بهتر است

ابن قدر دانم که همت هرچه کرد از پيش برد

ساغ اولسون گؤرکملي رسام، پرويز حبيب‌پور کي صفرخاني‌ بير قالا کيمي گؤروب و گؤزلجه‌سينه گؤستريبدير. بو آلينماز قالا نئچه مبارزلر نسلينه سيغيناجاق اولوب، اولاجاقديردا.

بوگون تام ايگير‌مي بير عصر، معروف قوللار عصيانيندان کئچير. قولدارليق دونياسي ييخيلميش‌سادا، اسپارتاکوسون قيلينجي هله‌ده کسردن دوشمه‌ييب، هله‌ده او قوللار قهرماني، خئير‌له شر گوجلري آراسيندا گئدن ساواشدا، خئير‌خواهلار سيراسيندا ساواشير. بابک‌ده، کور‌اوغلو‌دا، ستارخان‌دا، صفرخان‌دا اونونلا چييين چييينه‌ديرلر و ظولمون سنگرلري ييخيلمايينجا، مبارزه بيتمه‌يه‌جک.

بيز بوگون صفرخاني آغيرلاماقلا اونون نجيب سيماسيندا مينلر گئديب قالان زنجير‌داشلاريني، حؤرمتله آنيريق و اونلارين پارلاق خاطره‌لري‌نين اؤنونده ادبله باش ايييريک.

2 پاسخ

  1. صفرخان داع ویقارلی بیر اینسان اولاراق کندیسینه کؤنول لرده اؤزه ل یئر قازاندی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4