تاریخ سیناغیندان چیخان قهرمان (۱۹ آبان ۱۳۸۱ – ۱۳۰۰)/ رحیم رئیس‌نیا
تاریخ، قهرمانلارین آغیر سیناقدان کئچیرمکله، یئتیشدیریر. خالق قهرمانلارین خالق‌لار یارادیر، یاشادیر; اونلارا ایلهام و گوج باغیشلاییر، اونلاردان ایلهام و گوج آلیر.
بؤیوک قهرمانلار، بؤیوک خالق‌لارین، یوکسک معنویاتا، مدنیته، اولو ایده‌آلارا، انسانی سجیه‌لره مالک اولان خالق‌لارین ائولادلاریدیر‌لار .
دئییر‌لر قهرمانلار اؤز محیط‌لری‌نین یارادیلمیشی، یئتیشدیرمه‌لری‌دیر‌لر. بیر محیطده‌کی عدالت سیزلیک، زوربالیق و قانونسوزلوق، حیاتی دؤزولمز بیر جهنمه چئویریر، اورادا ظلمه، ظلمته قارشی مبارزه‌ده، ایستر- ایسته‌مز یولون تاپیب، فورمالاشاجاق و هر حالدا اؤز قهرمانلارین‌دا یاراداجاقدیر. نئجه‌کی مشروطه حرکاتی سونوندا، استبدادا قارشی بیر وولکان کیمی پاتلاق وئریر، اؤزونه یول آچیر و او یولدا مینلر و اون مینلر مبارز قلمه و سیلاحا ساریلیر و دؤیوش میدانینا آتیلیرلار و اونلارین آراسیندان، خالقین باغریندان قهرمانلاردا باش قالدیریر کی باشدا گلنلری‌ده ستارخان دیر. او بؤیوک قهرمان آلچاق کؤنوللوکله اؤزون، نئجه دئییم، ملتین ایتی آدلاندیریردی و دئییردی کی نهایت بودورکی بلکه بیر اصیل ایت‌ایمیشم کی قاباغا دوشموشم.
او تهراندا گؤروشونه گلنلره و ستایشچیلرینه تواضع کارلیقلا بئله دئییر:
“بنده بیر خدمت ائتمیشم‌سه، ملتین یاردیمی‌ایله ائتمیشم، یوخسا بیر الدن کی سس چیخماز. قدرشناسلیغی آذربایجان خالقیندان گره‌ک ائتمک، نه ستار قارا داغلی‌دان. منیم بیر افتخاریم وارسا، بو دور کی ملتین خادیمی اولموشام و بوتون بو موفقیتلر آذربایجان ایگیت گنجلری‌نین فداکارلیقلاری سایه‌سینده الده ائدیلیبدیر … “
صفرخانین دا سؤزلرینده بئله بیر حال وار :
“مندن چوخ سوروشوبلار کی نئجه دؤزدون، نئجه اوسانمادین و ۳۲ ایل سورن اوزون بیر زامانداکی بیر انسان عؤمرودور، چورومه‌دین؟ بلی، دوزدور، ۳۲ ایل قارانلیق قازاماتلاردا مقاومت گؤسترمک، جیسمی و روحی ایشکنجه‌لره قاتلانماق، زور بیر ایش دیر … چوخلاری‌دا عزیز‌لری‌نین آیریلیغینا، آجی حسرتلره، دؤزولمز ایشکنجه‌لره قاتلانا بیلمه‌ییب، حیاتا گؤز یومدولار. اما او کی منی و باشقا زنجیر داشلاریمی هر جور تحقیر و ایشکنجه قارشی‌سیندا انقلابی دؤزوم و دایانماغا چاغیریردی، یالنیز اومید ایدی. خالقین ظفرینه اولان اومید و اینام … سونوندا گؤردوک کی ایران ملتی نئجه اؤز چالیشمالاری ایله ظلم و زوربالیق سارایلارین یئرله یکسان ائتدیلر و دوستاقخانالارین، دمیر دووارلاری‌نین ییخیلماسی ایله، من‌ده ۳۲ ایلدن سونرا یولداشلاریملا بیرلیکده آزادلیغا قاووشدوق … “
سانکی خالق قهرمانلاری‌نین توپراقلاری بیر یئردن گؤتورولوب. سؤز یوخ کی بودا اونلارین خالقا باغلی‌لیقلاریندان‌دیر.
بیر تورک یازاری دئییبدیر‌کی قهرمانجاسینا اؤلمه‌یه حاضر اولمایان، قهرمانجاسینا یاشایا بیلمز. صفرخانین خاطراتی بئله بیر یاشاییشین، بئله بیر قهرمانلیغین داستانی‌دیر. تشکر ائدیریک علی‌اشرف‌درویشیان جنابلاریندان کی بو استقامت حماسه‌سین یازییا چکیبلر و اونو هامی اوچون الده ائدیبلر.
یونان اساطیری‌نین آنته آدلی قهرمانی، آیاغی آناسی اولان یئردن اوزولمه‌یینجه یئنیلمز‌ایدی. صفرخانلاردا ائله باغلیلیقلاری ایله، عزمکارلیقلاری ایله دیر کی یئنیلمز‌‌لیک ساحه‌سینه، قهرمانلیق سویه‌سینه یوکسلیبلر.
ناز پرورده تنعم نبرد راه به عشق
عاشقی شیوه رندان بلاکش باشد.
اوجقارلاردا سایریشان بیر اولدوزا وورولمایینجا، گؤیلره اوچماق ممکن دئییل ; شیرین جاندان کئچمه‌یینجه، فرهاد اولا بیلمز‌سن.
ناظم حکمت، شیرین- فرهاد داستانی‌نین یئنی بیر روایتین یارادیب. بو روایتده فرهادین شیرینه اولان سئوگیسی، خالق سئوگیسینه یوکسلیبدیر. بورادا فرهاد، داها شیرین‌ین وصالینا چاتماق اوچون دئییل، بلکه بیستون داغی‌نین آرخاسیندا قاینایان بولاغین حیات وئریجی سویون سوسوزلوقدان یانان، اینله‌ین شهره ساری آخیتماق اوغروندا دیرکی بیستونی قازماغا دوام ائدیر و بئله لیکله بیلک‌لری او بؤیوک عشقدن گوج آلیر و اراده‌سی سینماز اولور; اوناگؤره ده خالقین گؤزونده بیر همت وئریجی قهرمانا چئوریلیر. ائله‌کی آنالار اوزاق یئرلردن بالالارین بیستونا گتیریر‌لر تا او همت سیمبولون، او یورولمازلیق و ایگیتلیگ سیمگه‌سین، اونلارا گؤسترمکله روحلارینا همت جوهری آشیلاسینلار و قولاقلاریندا بو حقیقتی چینلاتسینلارکی : کیشی‌لرین همتی، داغلاری قالدیرار.
عقل و همت را نمی‌دانم کدامین بهتر است
ابن قدر دانم که همت هرچه کرد از پیش برد
ساغ اولسون گؤرکملی رسام، پرویز حبیب‌پور کی صفرخانی بیر قالا کیمی گؤروب و گؤزلجه‌سینه گؤستریبدیر. بو آلینماز قالا نئچه مبارزلر نسلینه سیغیناجاق اولوب، اولاجاقدیردا.
بوگون تام ایگیر‌می بیر عصر، معروف قوللار عصیانیندان کئچیر. قولدارلیق دونیاسی ییخیلمیش‌سادا، اسپارتاکوسون قیلینجی هله‌ده کسردن دوشمه‌ییب، هله‌ده او قوللار قهرمانی، خئیر‌له شر گوجلری آراسیندا گئدن ساواشدا، خئیر‌خواهلار سیراسیندا ساواشیر. بابک‌ده، کور‌اوغلو‌دا، ستارخان‌دا، صفرخان‌دا اونونلا چییین چییینه‌دیرلر و ظولمون سنگرلری ییخیلمایینجا، مبارزه بیتمه‌یه‌جک.
بیز بوگون صفرخانی آغیرلاماقلا اونون نجیب سیماسیندا مینلر گئدیب قالان زنجیر‌داشلارینی، حؤرمتله آنیریق و اونلارین پارلاق خاطره‌لری‌نین اؤنونده ادبله باش ایییریک.
2 پاسخ
آرزیلارام تورکلر هر یرده اولسالار یاشایالار
صفرخان داع ویقارلی بیر اینسان اولاراق کندیسینه کؤنول لرده اؤزه ل یئر قازاندی