خیابانین باشینداکی بؤیوک زیبیل قابیندان قالخان اینسی- قوخو، بوتون خیابانی بوروموشدو. قادین ایکینجی مرتبه‌ده‌کی ائودن خیابانا باخان پنجره‌نی آچیب، الی‌له هاوایا قالخمیش اینسی‌نی یئلَکله‌دی و سونرا اوزونو تورشادیب، فیندیغی بورنونو بارماق‌لاری ایله سیخیب پنجره‌نی برک اؤرتدو.
زیبیل قابی دمیردن دوزه‌لینمیش، دؤرد تکرلی، آلومینیوم رنگلی و اساسی بیر قاب اولاراق، اطرافیندا اونو گؤتوروب بوشالتماق اوچون مؤحکم قولپ دا وار ایدی.
بیر قارا، بیر ساری و بیر بوز پیشیک، زیبیل قابیندان داشیب آسفالت اوستونه تؤکولموش شیره‌لی یئمکلردن یئییردیلر. پیشیکلر اخلاقچی و اؤز حق‌لرینه قائل اولان اوچ انسان کیمی، بول نعمتین آشیب داشماسیندان فرحله‌نیب، مهربانجاسینا یئمهگه مشغول ایدیلر.
زیبیل قابیندان آخان سو، آسفالت اوزه‌رینده آخیب، دامجی- دامجی سو آرخینا تؤکولوردو. آرخین ایچیندن کؤپوکلو و شیرولو سولار اهمالجاسینا آخیردیلار. ائولردن گلن حامام، مطبخ و قالچا یووان قادینلارین آرخا بوراخدیغی سولار، زیبیل قابیندان گلن شیرولو سولاری اؤزونه قاتیب آپاریردی.
چؤرکچی‌خانادا چؤرک نؤوبتینده دایانان نئچه اوشاق و نئچه قاری- قوجا بعضاً چؤرکچی شاطیرا، بعضاً شیرولو سولارا و بعضاً ده بیری بیرینه باخیب صُنعی گولوش‌لر آل- وئر ائدیردیلر.
شاطیر خمیرلی الینی بیر داها پوز دستگاهی‌نین صفحه‌سینه چالدی و «ائوین ییخیلسین دستگاه یییه‌سی» دئیه، موشتری‌لره دئدی:
اولمادی، اولمادی! یا نقد پول گتیرین یا دایانین سیستم دوزلسین!
بیر قوجا کیشی راحتسیزلیقلا الینده‌کی چؤرک سوفره‌سینی تور میزین اوستونه آتدی. «آخی نقد پولوموز هاردادی» دئیه، دوداغی‌نین آلتیندان میزیللاماغا باشلادی.
زیبیل قابی‌نین اینسی‌سی بیر سرعتلی یئلین اثرینده، چؤرکچی‌یه دولدو. قوجا بیر قادین رنگارنگ چادراسی‌نین اوجو ایله آغیز- بورنونو توتدو. اوشاق‌لار اؤسکوردولر و شاطیر خمیرلی و اونلو الی ایله لاواش‌یاپانی ایستی دمیره چالارکن، بورنونو توتدو.
چؤرکچی‌نین قارشی‌سیندا آلایاش باققال، گؤیه‌رنتی‌لری سولایارکن، بیر یاش تلیسی اونلارین اوستونه چکیب، موشتری‌یه دئدی:
نه قده‌ر دئییرم سبزی‌لری گؤتوردوز، بو تلیسی چکین اوستونه، آمما هئچ کیم قولاق آسمیر!
موشتری دئدی: حاجی عمی، چوخ راحتسیز اولما، آخی راحتسیزلیغا اساس یوخدور، سبزی‌دی ده! آلینماز آخشام سبزیچی گلیب قایتارار آپارار.
قوجا باققال دئدی: قارداش بالاسی، بس من بورادا علّاف- عولّاف، اونا- بونا باخاجام. بونلار ساتیلماسا من دخیله نه آتاجام. ایندی بودور ها، گلدی تلفون، سو، گاز، برق فیشی!
کارمند قیافه‌لی موشتری، الینده‌کی نایلونلاری او بیری الینه وئریب، ویداع‌لاشارکن، بوش الینی بورنونا توتوب اوزاقلاشدی.
آلا- بولا بیر پیشیک، یاواش- یاواش اؤزونو زیبیل قابینا یئتیررکن، بیر طرف‌دن یئمهگه و آختارماغا باشلادی. بو پیشیک تویوق سوموگونه قاریشمیش آت- آشغالی بیر نایلون‌دان جیریب تؤکدو، سونرا بختورجه‌سینه قویروغونو بولاماغا باشلادی.
بیر ساعات‌دان سونرا، زیبیل قابی‌نین اطرافی رنگارنگ پیشیکلرله دولموش گؤرسه‌نیردی. آما یالنیز اوچ یئکه پیشیک (بیر قارا، بیر ساری و بیر بوز پیشیک)، زیبیل قابی‌نین ایچینه گیرمیشدیلر و موووللاشا- موووللاشا یئمهگه مشغول ایدیلر. یئرده قالمیش یئددی- سککیز کیچیک پیشیک، آشغال‌لاری دیدیب داغیدارکن، برک رقابت ائدیردیلر. گئت- گئده یئمه‌لی زیبیل آزالیر و پیشیکلر حیرصله‌نیب موووللاشماغا باشلاییردیلار.
بو حین‌ده آلا- بولا یئتیک و جسور بیر پیشیک جسارتله‌نیب، زیبیل قابی‌نین ایچینه آتیلدی. اونون زیبیل قابینا آتیلماغی‌له برابر، ایچری‌ده بوغاناق قوپدو. ساواش سسی خیابانی آلدی یاتدی. ائله بیل بو دؤردونجو پیشیک، او اوچ پیشیگین آرامشی‌نی پوزموشدو. نایلون‌لارین شاققیلتیسی پیشیکلرین موولتوسونا قاریشمیشدی. ساواش و موحاریبه آغیرلاشیردی. ایچری‌ده‌کی پیشیکلر سونرادان گلن آلا- بولا پیشیگی نامحرم بیله‌رک، هارای- داد سالدیلار. هئچ کیم بیلمیردی اورادا نه کئچیر. آشاغیداکی پیشیکلر، باش‌لارینی آشاغی‌یا سالیب، آز- چوخدان یئمهگه و یالاماغا مشغول ایدیلر. اونلار ایچری‌‌دن گلن سسی ائشیدرکن، اورادا بیر خبرلرین اولدوغونو دوشونوردولر.
آلا- بولا پیشیک ساواش صحنه‌‌سینه باخارکن، اوراداکی پیشیکلری قانا بلشمیش گؤردو. اورتادا بیر قوزو جمدگینه بنزر بیر شئی گؤرونوردو. اوچ پیشیک یئمهگه مشغول ایدیلر. اصلاً ساواش یوخ ایدی. آما ندنسه ائشیکده‌کی‌لر صُنعی بیر ساواش سسی ائشیدیردیلر. یئکه پیشیکلرین بیری، ایلک اؤنجه سورادان گلمیش آلا- بولا پیشیگی ساکتجه‌سینه بیر مدّت نظر آلتینا آلدی. سورا ائله بیل اونو جسارتلی بیله‌رک، زیبیل قابیندا قالماق نیّتینده گؤردو. اونا گؤره گوجونده نه گوج وار، پنجه‌سینی اونون صیفتیندن بئله ووردو کی، آلا- بولا، دؤردونجو پیشیک زیبیل قابیندان آتیلیب، خیابانین اورتاسینا دوشدو.
پیشیکلرین آراسیندا شاواش گئدرکن، چؤرکچی‌‌خاناداخی‌لار سیستمین دوزلمه‌سینی گؤزله‌ییردیلر. نقد پولو اولان‌لار چؤرک‌لرینی آلیب گئدیردیلر، آمّا کارت ایله گلن‌لر، آیاق اوسته منتظر دایانمیشدیلار. شاطیر چوخ عصبی‌لشمیشدی. پیچاق وورسان قانی چیخمازدی. بو آندا شاطیرین شاگیردی دئدی:
اوستا، نئیلییک، سیستم دوزلمیر آخی!
شاطیر، شاگردین رقّتلی سسینی ائشیدرکن، بیردن بیره، حیرصیندن ال آتدی پوز دستگاهینی گؤتوروب، خیابانا تونلادی. پوز دستگاهی، زیبیل قابی‌نین یاخینلیغیندا، آلا- بولا پیشیک دوشن یئره دوشدو. زیبیل قابینداکی یئکه پیشیگین ضربه‌‌سیندن یئره سره‌له‌نن آلا- بولا پیشیک، پوز دستگاهی‌نین تونلانیب سینماسینی آنلارکن، گوجونو دیشینه ییغیب، جن کیمی یئردن قالخیب، قاچماغا باشلادی…!
علی‌محمد بیانی
چئویرن: علی‌محمد بیانی
ترجمه: علی‌محمد بیانی
سسلندیرن: علی‌محمد بیانی
- حئکایه
- اوخوماق زامانی: 3 دقیقه
- https://ishiq.net/?p=36892
چاپ
0 پاسخ
سلاملار. ایشیق سایتی و اونون مدیرلری نین گؤزل ایشلری و زحمتلری اونولمازدیر. ساغ اولون ادبیاتیمیز اوغروندا چکدیگیز قایغیلار، سیزی قوجالتماسیز، یاشاتسین. وار اولون. من ده اؤز نوبه‌مجه شکرانلاریمی اعلان ائدیرم.