تخت‌لر، یان- یانا قویولموشدو. ترپه‌ننده هر بیریندن بیر ناله‌یه بنزر سس گلیردی. هاوا جهنّمه یولداش ایدی، بیز ده ایستی‌دن قاچان تویوق‌لار کیمی، بو آلا- قارانلیق نینه سیغینمیشدیق. اونون یاری کچل باشی منیم آیاقلاریمدا و منیم باشیم اونون آیاقلاریندا ایدی. سسیمیز چیخمادان ساکتجه‌سینه اوزانمیشدیق. سانکی هئچ ایشیمیز- گوجوموز یوخدور. هردن آشیب، قارشی- قارشی‌یا اولوردوق، هردن دؤنوب دالبادال یاتیردیق. آلوو کیمی نفس‌لریمیزی ده ائشیدیب، سایا بیلیردیک. یاری توخ قارنیمیزدان داها چوخ موقایات اولوردوق. دئییردیک انساندیر دا، بلکه بیردن بیر خطا- مطا یاپدیق. اؤز اؤزومه دئییرم تخت‌لر بیر آز فاصله‌لی قویولسایدی، بلکه جانیمیزدان قالخان ایستی- حرارت آزادجاسینا اوتاق‌دا داغیلایدی.
دوروب پاسلی دمیر پنجره‌نی آچیرام. ائشیگه باخیرام. هله هئچ خبر- اَتر یوخ. نه گل وار، نه گئت. هاوا اوزاق‌لاردا ایستینی بیر قاینار بولود کیمی بللندیریر. قوملو جادانین او تاییندا بیر اوجا راجی آغاجی وار. کؤلگه‌سی جادادان گئچیب، قهوه‌خانانین یاخینلیغینا قده‌ر اوزانیبدیر.
غریب یولداشیمی نظر آلتینا آلمیشام. هارادان گلیب، هارا گئتمه‌سینی بیله بیلمیرم. بیر ماوی رنگ کیفی وار. بوزومتول جوراب‌لارینی باسیب، گؤن آیاق‌قابی ایچینه و اونو دا قویوب آغاج قاپی‌نین آغزینا.
او گلنده منی اصلاً اویانمادیم. او دا منی اویاتمادان ساکیتجهسینه اوزانیب یاتدی. البته‌‌ من ایستی‌دن یاتمامیشدیم. او منی یاتمیش گؤروب یوخلادی. هردن الینی آتیب، یوغون- یومورو بدنی ایله دولدورولموش ماوی کؤینگینی یئللمه‌گه باشلاییردی. قارنی ساللاق کیمین نظره گلیردی. بلکه ده کمرلرینی گؤبک‌دن آشاغی باغلایان توختاق جاوان‌لار کیمی، آستاجا گولوب، آستاجا دانیشانلاردان ایدی.
گئدیب تلیسه بورونموش و قاتما ایله تیکیلمیش سو کولمن‌یندن بیر لیوان، سرین سو تؤکوب ایچیرم. قوجا قهوه‌چی او یاندا باغچاسینی آلاق ائدیر. باشیندا دؤیره بؤرکو وار. اوزونو گؤرمورم، آمّا تصوّر ائدیرم ایستی‌دن کلافه اولموش.
آلا- قارانلیق اوتاغا قاییدیرام. غریبه یولداشیم هله خیمیر- خیمیر یاتمیش. آیری بیر ایش- پئشه تاپا بیلمیرم. گئنه تخت اوستونده اوزانماغا مجبور قالیرام. یانیمداکی ساک‌دان جیبی کتابیمی چیخاردیرام. «مینی‌ماللار» کتابی‌دیر. اوخوماغا باشلاییرام:
«سماوی موجودلار یئر کوره‌سینی تسخیر ائتمک اوچون، یئره گلیرلر. پنتاگون و ناسا جماعت‌دن بو خبرین جدّی توتماسینی ایسته‌ییرلر… گؤزو گؤی قوجا کیشی، شهرین اَن اردحاملی کافی شاپی‌نین صاحبی‌ ایدی. او کونتُرولو گؤتوروب، اوزاق‌دان تلویزیونو سؤندوردو. سورا گوله- گوله دئدی: بیز چوخدان بورداییق!»
ائشیکدن بیر سس گلیر. قوجا قهوه‌چی‌نین سسی‌دیر. بیزی چاغیریر. ساکیمی یونگول‌دن گؤتوروب ائشییه چیخیرام. بیر مینی‌بوس دایانمیش. من گئدن استقامته گئدیر. سولغون، ماوی رنگلی و خار- خار ایشلهین بیر بنز مینی بوس.
قهوه‌چی منی سسله‌نیب دئییر:
– او یولداشیوی دا اویات گلسین. اونون دا ماشینی ایندی یئتیشر. اوتاغا دؤنورم. کیشی هله ده یاتمیش.
– آی یولداش، ماشین گلیر. سن ده دور گل!
کیشی یاواشجا اویانیب، قویون رنگی گؤزلرینی اؤوکه‌له‌ییر. او حالدا دوروب تخت اوستونده اوتوروب، جوراب‌لارینی گئیمه‌گه باشلاییر.
من ماوی ماشینا ساری گئدیرم. قهوه‌چی مینی‌بوسون آلایاش و بیغلی سوروجوسو ایله دانیشیر. بو آندا اویان طرف‌دن بیزیم استقامتین عکسینه بیر قیرمیزی مینی‌بوس دا گلیر. کیشی قهوه‌خانادان چیخیر گلیر. عجیبه‌‌ بیر یئریمه‌سی وار. اوخودوغوم مینی‌مال حکایه گؤزومون اؤنونده جانلانیر. آدام کیمی یئریمیردی. بیر لحظه فیکیرلشدیم کانگورو کیمی آتیلا- آتیلا گلیر. گؤزومون اوستونده دایانان شور ترلری سیلیرم. واقعاً فکر ائله‌دیم او کیشی کانگورودور. قارنی ساللاق و قیللی ایدی. قارنی‌نین اوستونده‌کی کؤینک پارتلاماق عرفه‌سینده ایدی. آغ- قارا دوگمه‌لری قوپان کیمی دایانمیشدی.
باشیما ایستی چؤکموشدو. بیر داها اوز- گؤزومون ترینی سیلیرم. غریبه یولداش گله- گله منه ال قووزاییر. ساکینی آچیر:
– گؤرورم کتاب اوخویانسان، آپار بونو دا اوخو!
رُقعی قطعینده بیر اوزو ماوی بیر اوزو قیرمیزی کتابدیر. کتابی آلیرام. تشکّرلر دئییرم. او دا قویون رنگی گؤزلری ایله منه باخیر. قیرمیزی مینی‌بوسا مینیر. باشینی پنجره‌دن چیخاردیب دئییر:
– قهوه‌چی‌نین پولونو من وئردیم. ایستی هاوا چوخ اذیّت ائله‌سه، بیر گون گل معدنه. اورا داغلیق و سرینلیک‌دی. معدنین هاواسی سپ- سرین اولار. کتاب اوخویوب، اولدوزلارا باخاریق.
قهوه‌چی گاه بیزیم دانیشیغیمیزا قولاق آسیر، گاه بیغلی سوروجو ایله دانیشیر.
– عنوانیمی دا او کتابین اوّلینده یازمیشام…
قیرمیزی مینی‌بوس حرکت ائلیر. من هئچ بیر شئی دئیه بیلمیرم. ماوی مینی‌بوسا ساری گئدیرم. قیرمیزی کتاب الیمده ال قووزاییرام و بئله‌لیک‌له منه بیر کتاب پای وئرن غریبه یولداش‌لا وداع‌لاشیرام.
* مینی مال‌لار، رسول یونان