دونیا قادین‌لار گونو موبارک اولسون
لال حاجیه- کؤرپه- کؤلگه
ملیحه عزیزپور
(۱): لال حاجیه
بوزارمیش چادراسینی بئلینه باغلاییب، یئپ- یئکه باشماقلاری ایله کوچه‌نین دووارینا سؤیکه‌نیب،آوارا-سرگردان باخیشلارینی گلیب- گئده‌نین اوزونه سریر. اونون اؤنوندن کئچرکن گولومسه‌ییب، باشیملا سلام دئییره‌م. ماراقلیجا ایکی آددیم ایره‌لی گلیب، سسینین بوتون توتغونلوغو ایله “هلام… شئفین؟!” دییه قارشیمدا دایانیر. یئنیدن کئیفینی سوروب گئتمک ایسته‌ییرم. آرخامجا باغیریب دئییر: ” باهبی… اهبه اؤیدو” . یانلیش دویدوغومو سانیرام. گئری دؤنوب قارشیسیندا دایانیرام. “نئجه اولدو؟” دئیه اوندان سورورام. الینی الینین اوستونه چیرپیب وایسیناراق تکرارلاییر: “اهبه اؤیدو.” اونون سؤزوندن شاشیرام هم ده گولمه‌ییم گلیر. او آن میرت ائدیب دئییرم:
“حاجیه!!! بس منیم سیرغامی هاواخت آلاجاقسان؟ تویا گئده‌جه‌یم ها!!”
منه قاش- قاباق ائدرکن، باشینی توولاییب، باشماقلارینی سوروتله‌یه- سوروتله‌یه گئدیر. یولومون داوامینی توتوب گئدیرم. اونونلا ضارافات ائتدیییم اوچون اوزولورم. آخی او اؤزو منی گؤردویو زامانلار سورکلی ارینین اؤلمه‌سی اوچون دوعا ائتدیییمی ایسته‌یردی، منسه اؤزومو او یولا ووروب دئیردیم: “او اؤلسه منه موشتولوق نه وئره‌جکسن؟” او ایکی الینی گؤیه قالدیریب، ارینی قارغیییب، منه سیرغا آلاجاغینا آند ایچردی.
* * *
ارینین اؤلمه‌سیندن بیر هفته‌دیر سوووشور. حاجیه اونون تئریاک-سیقارا قوخولو کؤینه‌یینی باغرینا باسیب، کوچه باشیندا آغلایارکن، اوشاقجاسینا باغیریر: “آللاه…بعیشله منی…بیمه دیم…بیمه دیم…آللاه…” .
قونشولار اونو ساکینلشدیرمه‌یه چالیشیرلار، منسه بوغازیمداکی قهری یاستیغیملا بوغماغا.
(۲): کؤرپه
آنا اون- اوچونجو دؤنه دوغدو. یئنه‌ده کؤرپه‌سینین اینقه‌سینی دویمادان آییردیلار اونلاری. آنا، آغزینی یئردن گؤیه قده‌ر آچیب باغیردی. دوغوم سانجیسیندان دئییل، آیریلیق آغریسیندان دا یوخ. دؤشلری پاتلاییردی یازیق قادینین.
قودوز سیچانلار اونون امزییینه داراشدیلار. بیر داملا سودو یئره دوشمه‌مه‌لی ایدی یوخسا…
آنا آجیمادی. عئینی بیرینجیدن اون ایکینجییه‌جه‌نین ترسینه. آنا گولدو عئینی، بیرینجیدن اون ایکینجییه‌جه‌نین ترسینه…
* * *
کؤرپه‌نی بیر داخمایا آپاردیلار. اوراسی اؤلوم کانی ایدی دئیه‌سن! داخمانین هر بوجاغینا اورادا اولان کؤپکلری ایللر بویو آجلیقدان قورویاجاق قده‌ر سوموک قالانمیشدی.
قانجیقلار اولاشیردیلار. اونلارین دا امزیکلری پاتلایاجاق قده‌ر شیشمیشدی. اویسا کؤرپه‌نی گؤرجک گؤزلری گولدو. آخی کؤرپه، اونلاری او جان آلیجی آغریدان قورتاران تک کیشی ایدی . قانجیقلار کؤرپه‌نی امیزدیرمک اوچون سیرا چکدیلر، آنجاق اونلارین هئچ بیریسینین امزییینی توتمادی اوشاق. اونلار اؤز اؤزلرینی اممه‌یه باشلادیلار. اونلار امیشدیکجه کؤرپه قوسدو. اونلار هوروشدوکجه کؤرپه سوسدو.
* * *
قانجیقلار، راحاتلانمیش کیمی گؤرونوردولر، آنجاق کؤرپه سانجیدان آغلاماغا باشلادی. اونون قارنی ائله شیشمیشدی کی حامیله قادینا بنزه ییردی و بو گؤرونتو اونا هئچ یاراشمیردی. قانجیقلار، یئنه ده امزیکلرینین آغریسیندان هوروشمه‌یه باشلادیلار. کؤرپه اونلاردان قورخموشدو کیمی گؤرونوردو. بیر آزدان سونرا او دا باغیرماغا باشلادی . سانکی دوغوم سانجیسی چکیردی یازیق اوشاق.
قانجیقلارین هوروشمه‌سی کسیلیردی. کؤرپه ده سوسموشدو آرتیق و بو حال کؤپکلری چوخ شاشیردیردی. آخی او دا راحاتلاشمیشدی. کؤرپه، بیر سورو سیچان دوغموشدو.
(۳): کؤلگه
اللرینه باخدی. دیرناقلاری اوزانمیشدی بیر آز. ساغ الینین باش بارماغینی آغزینا آپاریب، دیرناغینی چئینه دی. نیشانا بارماغینی دا… اورتا بارماغینی دا…اوزوک بارماغینی دا…جولو بارماغینی دا هابئله.
سول الینین ده دیرناقلارینی چئینه‌دی بیر به بیر. بارماقلارینین باشی گؤینه‌دی. ساغ الینین باش بارماغینی آغزینا آپاریب او قده‌ر سوموردو کی، بارماغی پاتلادی. نیشانا بارماغی دا…اورتا بارماغی دا…اوزوک بارماغی دا…جولو بارماغی دا هابئله. سول الینین ده بارماقلارینی سوموردو بیر به بیر. اللری اییلدی. اوره‌یی بولاندی بیردن بیره. یئره توپوردو … توپورجه‌یی قانلی ایدی. آغزینی سیلمک ایسته‌دی. اللری قالخمادی. گوزگو قارشیسینا کئچدی. دوداقلاری پارچالانمیشدی. دیشلری اوزانمیشدی. هؤرومجه‌یه بنزه ییردی گوزگوده. آجیغی گلدی اؤزوندن. گوزگونو سیندیرماق ایسته‌دی. اللری قالخمادی. دیشارییا قاچدی. کؤلگه‌سی اوزانمیشدی. اؤزونو چئینه‌مه‌یه باشلادی.
