ساری آیریلیق
یانار اردبیلی
ساری‌گوللوک شهردن ۳۰-۴۰ کیلومترکنارلاردا، آق‌اؤرتوکلو داغلارین اتکلرینده بیر دوزنگاه‌ایدیر. اوردا ساپ- ساری گوللر یئر اوزون بوروموش و هر یانی ساری‌لا بویامیشدیلار. اوشاقلارین گوللره حئییفی گلیردی؛ ”ایینه آتسان یئره دوشمزدی“. اودور کی بیر آیاقلارین گؤتوروب، اوبیری آیاقلارین قویوب اوردان- بوردان آتیلا- آتیلا کئچیردیلر. آنجاق بیر آزدان هامی مشغول اولموشدور. بیر یاندا اوغلانلار توپ اویناییر، اوبیری یانداایسه آیدانین قیرمیزی قارمونون آناتومی اوستادی تومروس خانیم چالیردی. قیزلار هامیسی اویونا گیرمیشدیلر. بیر آزدان اوغلانلاردا توپدان ال چکیب، اونلارا یاخینلاشدیلار. قیزلار ساری‌گوللوکده بارماقلاری اوستونده سوزور و اوغلانلار اؤز تشویقلریله اونلارا قووت باغیشلاییردیلار.
خئیلک اوینایاندان سونرا اونلار یورولوب بیر- بیر چکیلسه‌لرده، آنجاق آیدا اؤزونو هله یورولماز حیس ائدیردی. اونون ال- ایاغینی گؤرمک اولموردو؛ فیرلاناندا قارا ساچلاری چیگینلری اوستوندن اوچوردو. بئله بیر واخت ”آیدین“ین آتدیغی بیر دسته ساری‌گول اونون باشینین اوستونده سپه‌لندی. گول لئچک‌لری اوشاقلارین هوراسینا قاریشدی.
***
اوزاقلاردان گلن های- کوی سسی یاخینلاشماقدایدی. بیردن های دوشدو:
– چکیلین کنارا، چکیلین کنارا! بوردان دمیر یول چکیریک.
یئرسیز گؤرونن بو هایقیریق اوشاقلاری دیسکیندیریب، رقصین هاواسیندان آییردی. تعجوبدن یئرلرینده دونوب قالدیلار.
ایشچیلر و یول چکن ماشینلار آرتیق گلیب دوشرگه‌‌یه چاتمیشدیلار. تومروس خانیم یول چکنلری ایشده جیددی گؤردوکده، دؤنوب آرخایا- ساری‌گوللوگو- سونونجو دفعه دقتله نظردن کئچیرتدی. آیدا باشا دوشدو کی تومروس خانیم ساری‌گوللوگون ناخیشلارینی گؤزلرینه هوپوزدوروب، اوره‌یینه حک ائله‌مک ایسته‌ییر. سانکی چاره‌سیز آدام کیمی‌ایدی.
بیر نئچه دقیقه‌دن سونرا اوشاقلار هامیسی یول‌چکنلرین اؤنوندن کنارا چکیلیب، بیر آز کناردان اونلارا تاماشا قیلدیلار.
بولدوزر گولشنی سؤکوب، بیر خطین اوستو‌ایله ایره‌لی‌له‌ییردی. اونون آردینجا آغیر ماشینلار تورپاقلاری یاتیردیب، برکیدیر و اونلارین آرخاسینجاایسه ایشچیلر چیگینلرینده تاختالاری گتیریب، یئره باسدیریب، اوستوندن دمیر خطلری دوزوردولر.
آیدا آتاسین اوزاقدان تانیدی. ایشچیلرین جیریق پالتارلاری یئل اسدیکجه اسیردیلر. اونلار هامیسی آریق اولسالاردا، آیدانین آتاسی هامیدان آریق و اوستو باشی جیلیز گؤرسه‌نیردی. آیدانین اوره‌یی دؤیونتویه دوشدو.
آتا چیگنینده‌کی تاختانی یئره قویوب، اوشاقلارا ساری باخاندا، آیدا اؤزون قیزلارین آراسیندا گیزلتمک ایسته‌ییردی. آتا دوم- دوز دایانیب، اؤیرنجی‌لره ساری باخاراق، آیدا حاقیندا دوشونوردو. آیداایسه قیزلارین آرخاسیندان گؤزلرین آتاسینین هئیکلینه زیلله‌میشدی. او آتاسین هر زاماندان آریق گؤروردو. آتانین صیفتینین سوموکلریده گؤزه چارپیردی. ساچلاری بام- بیاض اولموش، گؤزلری‌ایسه چوخورا دوشموشدو. آیدانین اوره‌یی آلیشدی. گؤزلریندن ایکی دامجی یاش آخماق ایسته‌دی. او گؤز یاشلارینا آمان وئرمه‌ییب، الینین دالیسیلا اونلاری محو ائتدی.
آتانین اوره‌یی ایسته‌ییردی غرور حیسی‌ایله اؤیرنجی‌لره دئسین کی، اونوندا گؤزه‌ل و گؤیچک اؤیرنجی بیر بالاسی وار و ایندی او بالاسی اؤیرنجیلرین آراسیندادیر. آنجاق باجارا بیلمه‌‌دی. قاییدیب باشقا بیر تاختانین اوجوندان یاپیشدی.
آیدانین نیگران باخیشلاری آتاسیندان اوزولمه‌میشدی کی گؤردو آتاسی نه قده‌ر گوج وئریرسه، تاختانی یئریندن قالدیرا بیلمیر. و نهایت او اؤزوده تاختانین یانینا ییخیلیب، اوزاندی. ایشچیلر آتانین دؤره‌سینی آلیب، صلوات سسینه اوخشار های- کوی قوپاردیلار. بیریسی دعا اوخویاراق آتانی سسله‌ییر، بیریسی‌ایسه اوزونه سو سپیردی. آنجاق آتانین چوخدان بدنی سویماغا باشلامیشدی. اونون آتا اوره‌یی بیر یوللوق ساریلیغا قاریشمیشدی.
آیدانین آلنی دویونله‌نیب، آنجاق هله‌ده فاجعه‌نین نه اولدوغونو باشا دوشموردو. او اؤزونو زورلا ساخلاییردی. اؤزو اوشاقلارین ایچینده اولاراق، اوره‌یی آتاسینین ییخیلدیغی یئرده چیرپینیردی. او آیدینین – نییه بیردن حالین پوزولدو آیدا؟- سوالینین جاوابیندا یالنیز دولغون گؤزلریله اوزاقلارا باخیردی. آیدانین آتاسی ایشچیلرین چیگینلرینده یولا دوشموشدو.
گون باتان چاغی هامی دوشرگه‌دن قاییدیب، شهره دوغرو گلیردیلر. آیدانین گؤزلری اؤنونده، ساری پرده اوزه‌رینده بیر آریق کیشی‌نین هئیکلی یولداشلارینین چیگینینده ییرغالانیردی. گوللری سولموش دوزنگاهین اورتاسیندان بیر قاطار نعره چکه- چکه گئدیردی. قاریشقالار تورپاغین سینه‌سینده نه‌یین سوراغینداایسه قایناشیردیلار
