«گؤزلریزی یومون؛ بئله دوشونون آیاغیزی کره ماها قویورسوز» معلم دئیه‌رک، گؤزلرینی یومدو. آخی بیز اورادا نه پوخ یئییردیک؟! بیر نایلون توپو آلیب دیغیرلاتماغا پولوموز چاتمیردی؛ بیر هفته ایدی بیر ییرتیق توپو شوتله‌مکدن جیریغیمیز چیخمیشدی. آما مارادونا اولماق ایسته‌ییردیم؛ یانی مارادونا اولماق ایسته‌ییردیک! منله مورتوضون مارادونا اولاجاغینی کیمسه یوخ، تکجه اؤزوموز دئییردیک! اونون بونون اله سالمالارینی وئجیمیزه آلمادان، سحردن آخشاما کیمی، بیر توپون دالیسینجا آوارایدیق. گؤزو باغلی آی کوره‌سی‌نین اوزه‌رینده آدیملایارکن، الیمی شالوار جیبیمه سوخوب، بو ایکی هفته‌ده توپلادیغیم قارا پوللاری یوخلادیم. مورتوض دا بونو دویورموش کیمی، الی ایله جیبینده‌کی پوللاری شاققیلداتدی. ندنسه بو دؤنه، بونلارین ایچیندن مارادونا چیخاجاغینی اینانمیشدیم. تاپدیغیمی ساققیزا وئرمکدن جانیم چیخمیشدی؛ آما چیخمیردی کی چیخمیردی! ساققیزدان چیخان عکسلری توپلاییب، اؤزوموزه گؤره بیر کولئکسیون قوشموشدوق. هامیسینی بیر بالاجا چانتادا ساخلاییردیق. کولئکسیون مارادوناسیز ایدی؛ بوتون عکسلریمی وئریب مارادونا ایله دَییشردیم، آنجاق کیمسه ده اولموردو! اولاندا دا، بیر کؤنزین الینه دوشوردو؛ هئچ اوزونه دَییشه‌سی دئییلدی! بیر یول بیرینه چیخاندا، بوغوشوب، آرادا چکیب جیردیلار. جیریقلارینی دا، آغیزلارینا باسیب چئینه‌دیلر! آی کوره‌سیندن یئر اوزو نه گؤزل گؤرونوردو؛ گؤردوکلریمیزی دئمه‌لی ایدیک! بیریسی دنیزدن، بیریسی مئشه‌دن، بیریسی بولودلاردان، بیریسی اوزه‌رینده اوچان طیاره‌دن دانیشیردی. منه چاتدیقدا، بیر آن توموب، سونرا ایسته‌مه‌دن گؤزلریمی آچاراق، مارادونا دئدیم! هامی، مورتوض بئله، گولوشوب کئچیندیلر! معلم گؤزو باغلی، باشینی توولایاراق، آیریسی‌نین آدینی چکدی. دوداغی قاچماسین دئیه زورلا اؤزونو ساخلامیشدی. منله مورتوض یان یانا دوراندا، کیمسه باتا بیلمزدی؛ جاندان مایا قویوردوق! «دییوگو آرماندو مارادونا» دئیه‌رک، سانکی توپ آیاغیمیزا یاپیشیب، کیمسه آلا بیلمزدی. قولئری بئله دیریبله‌ییب، قولا دیغیرلادیردیق. ایکی نفر بیر یئرده مارادونا اولا بیلردیمی؟ اولاردی؛ کیمسه کیمسه‌نین یئرینی داریشلیق ائله‌میردی! بو دونیادا نئچه نفر مارادونا اولماق ایسته‌ییر؟ هر نه قدر ده اولورسا؛ منیم کیمی، یانی بیزیم کیمی، بونو ایسته‌یه بیلمز -بیر عکسیندن اؤترو وار یوخونو قویا بیلمز! اوشاق‌لار آیدان دوشوب زنگین وورولماسینی گودوردولر. مورتوض فیکره دالدیغیمی گؤردوکده، الینده‌کی چؤرک دوموشونو یاری بؤلوب منه وئردی. آغزی دولو: «دیییرم بویون ساندیویچه گئتمیاخ هن؟ من دؤزنمیرم». یاریمچیلیق دوموشه بیر دیش ووروب: «هن بابام؛ منده دایانامیرام؛ زح وورولسایدی بی…». مورتوض دالی ردیفده‌کی‎لرله دانیشماغا باشلادی. منسه ایچیمه دالیب، تخته‌نین یازیلارینا جومدوم…
زنگ وورولان کیمی مدرسه‌دن ائشییه آتیلدیق. بیر بیریمیزین اوزونه باخاراق، قاچماغا باشلادیق. فیکریمی بیر یئره ییغا بیلمیردیم! چیخماسا نئجه؟ بیردن منه چیخدی مورتوضا یوخ؟ بیردن اونا چیخدی منه یوخ؟ بیریمیزه چیخیرسا، ائله ایکیمیزین اولاجاق! بیردن ایکیمیزه ده چیخدی؟ اوندا آی اولار! نییه اولدن بونا گؤره دانیشمامیشدیق؟ گوجومو بیله‌ییمه ییغیب، مورتوضدان سورماق ایسته‌دیم. مندن بئش بتر فیکره دالیب، یئره زیلله‌نه‌رک، قاچیردی! مارادوناسینا دوشونوردومو؟ «مورتوض دینمیرسن؟!»
«نه دیییم؟… سن اؤزون بتر فیکیرده‌سن؛ یا اؤزو گلر یا عکسی، چوخ فیکیر وئرمه!» دئیه گولومسه‌دی. گولمه‌ییمی ساخلایانمادیم: «بیردن سنه چیخسا نئینرسن؟»
«نه بیلیم والله!» قارشیسینداکی بالاجا داشا بیر شوت ووراراق، دیغیرلانیب هارا گئتدییینی ایزله‌دی.
علی عمی آتینی قامچیلایاراق، کؤهنه داشقاسی‌نین اوجوندا اوتوروب، چیلگزین اوز یوخاریسینی آغیر آغیر چیخیردی؛ آغ ساققالینی قاشییا قاشییا چئوره‌نی سوزوردو. اوغرونجا داشقانین آرخاسینا کئچیب، اللریمیزی قیراقلارینا یاپیشدیراراق، آسلاندیق. آت داشقاسی‌نین اَیری اویرو تکرلری، والایلایا والایلایا، اوز یوخارینی جیرماقلاییردی. آسلاق گئتمک نه ده یاپیشیردی! چالا چوخورون فرقینده اولمادان یوخاری چیخیردی. قوجانی یوخو آپارمیشدی، آت دایاندی! یئنه قامچی ایشه دوشدو. آسلاندیغیمیزی گؤرونجه سؤیوش وئریب، قامچیلاماغا باشلادی. سؤیوشلری گلیب چاتیرسادا، قامچی یاریدان قاییدیردی…
دمیر پوللاری تره‌زی‌نین اوستونده شاققیلدادیب، آداما اون ساققیز دئدیک. اسماعیل باققال آداما اون ساققیزی نه ائدیرسینیز دئمه‌دن، داماغینداکی سیقاری آلیب، تلسمه‌دن اوزانمیش کولونو یئره بوراخدی. بؤرکونو آزجا دالی ایته‌له‌ییب، پوللاری تره‌زی‌نین اوستونده‌جه‌، سایماغا باشلادی. بویو تره‌زییه چاتماسا دا، دورماغا حالی یوخ ایدی! هاندان گئجدن ایشینی بیتیریب، «آداما دوققوز ساققیز اولار» دئیه‌رک، سیقاریندان درین پوک آلدی. ساققیزلارین اوستونه دوشوب سئچیردیک؛ سانکی ائشیک قاتلاریندان ایچریسینی اوخویوردوق. بیریسینی سئچیب، قاباقجا سئچدیییمیزی یئرینه قایتاریردیق! اوووجوموزداکی‌لاری یئرینه آتیب؛ یئنیدن سئچمه‌یه باشلاییردیق. همشه یوخاری بازیکنلار قیرمیزی جیلیدلی‌لردن چیخیر دئیه قیرمیزیلاری چوخ گؤتوروردوم. اسماعیل باققال سؤزونو ائشیتدیییمیزی سیناماق اوچون: «آداما دوققوز ساققیز اولار ها» دئیه دونقولداندی. بئینیم قارالدی ساققیزلاری گؤتور قوی ائتمکدن! بیر دولو اوووج گؤتوروب، دوققوزونو تره‌زی‌نین اوستونه قویدوم. مورتوض دا ساققیزلارینی منیمکی‌لرین یانینا بوشالتدی. اسماعیل باققال میزه سؤیکه‌نیب آیاغا قالخدی؛ «آداما دوققوز ساققیز» میزیلداناراق، ساناماغا باشلادی. مورتوضا گؤز ووردوم. ساققیزلاریمی گؤتورنده تره‌زی‌نین بوشقابینی یئره آشیردیم. باققالین قاشلاری دویونلندی! سارالمیش بیغلاری‌نین آردیندان «کور اششح» دئیه‌رک، آغیر آغیر، بوشقابی یئردن قالیردی. بو آرادا مورتوض ایشینی گؤرموشدو! یئره جالانان ساققیزلاردان آداما دوققوزونو سئچیب، توکاندان چیخدیق. آردیمیزجا دئیینه‌رک آفتافاسینی گؤتوروب، گؤزله‌نیلمز بیر سورعتله، بالا مسجیدین ماوالینا ساری گؤتورلندی: « توتومان نه دیییم اوشاخ… ابیل عمی‌یه دئ نیسیه‌لرینی گتیرسین».
کؤهنه روبابین کؤهنه قاپیسی‌نین سککیسینده اوتوروب، ساققیزلاری آچماغا باشلادیق. تلسدیییمدن بیرینجی‌نین عکسینی جیردیم؛ نه یاخچی بیر آرا یئرده قالمیش اویونچو ایدی! یا مارادونا اولاسان یا دا هئچ نه اولمایاسان! گؤزومون قیراغی ایله مورتوضو سوزه سوزه، بیر آیریسینا کئچدیم. آچدیقجا، ساققیزینی دا آغزیمیزا باسیب چئینه‌ییردیک. گئتدیکجه جیبیمیز بوشالیب آغزیمیزین شیره شیرتیغی آخیردی. اوره‌ییم، آغزیمداکی یومرو ساققیز کیمی، شیشیب دؤیونوردو! سونونجونو آچاندا، گؤزلریمیز بیر بیرینه ساتاشدی. گؤزلریمی یوموب، ساققیزی جیلدیندن سویوندوردوم. آچاندا روبئرتو باجو، توپ آیاغی‌نین آلتیندا، منه باخیردی! مورتوضون عکسی الی‌نین ایچینده ازدیییندن، هئچ روبئرتو باجو کیمیسی‌نین ده چیخمادیغینی آنلادیم. سویو سوزوله سوزوله، مارادوناسیز گؤزلری ایله، اوزومه دیکیلدی. بوزوشدوردویو عکسی چئینه‌مه‌یه باشلادی. یا دیرناغینی چئینه‌یردی یا دا کار کاغاذی! آغلاماسین دئیه گولمه‌یه باشلادی. اؤزو دئمیشکن، آغلاماغی‌نین قارشیسینی قوندارما گولوش آلا بیلردی. بوش بوشونا چوخ آغلاییب گولوردو؛ آغلاماقدان گولمه‌یه، گولمکدن آغلامایا داشینیردی. سؤزلرینی منه دانیشیردی؛ بیر گون اولماسام موتورض سؤزونو کیمسه‌یه دئیه بیلمز دئیه، اؤزومه گووه‌نیردیم. نارین اوست دیشلری، آغزی‌نین قیلیغیندان یانا، همشه ائشیکده قالیردی! بوینو هیندیشقا بوینو کیمی اؤزوندن قاباق گئدیردی. هامی همیشه گولدویونو سانسا دا؛ هاچان گولوب هاچان ناراحات اولدوغونو، دیش‌لری‌نین نه قدر ائشیکده قالدیغیندان سئزیردیم. گولمه‌یی‌نین آغلامایا دؤنوشدویو آن، بیردن نسه یادینا دوشدو! چَدنه گؤزلرینی بؤیودوب، بوغازیندان بیر سس چیخارتدی. الینی کاپشئن جیبینه باسیب، ویزدیغی ایکی ساققیزی الینه آلدی. بیر منه بیر ده الینده‌کی‌لره باخیب، هانسینی منه وئره‌جه‌یینی سالیب چیخدی. قیرمیزینی سئچیب، سارینی منه اوزالتدی! ایچیمه قوشقو جالاندی؛ چدنه گؤزلرینده گؤرمه‌دیییم باخیشی گؤروردوم. آلت دوداغینی یوخاری دیش‌لرینه سیخاراق، گؤزونو مندن یاییندیردی. دووشان دیشلریندن نه حالدا اولدوغونو آوارا بیلمه‌دیم! مورتوض دوردوغو یئرده، آغزینا آلدیغی یاد گؤرکمله، اوزاقلاشیردی مندن! ساققیزینی آچماغا قورشانمیشدی. تیترک اللریمله ساققیزیمی آچماق ایسته‌ینده، عکسینی جیردیم. جیریغین قاتینی آچاندا؛ علی دایی! باشی چاپیق علی دایی! کره ملی تیمینه، آلتی ایکییه، اوستون گلن علی دایی! مورتوضون دیشلری همشه‌کیندن داها چوخ ائشیکده قالمیشدی. گؤزلری بئینینه چیخمیش حالدا، ایکی الی ایله اؤنونه توتدوغو عکسه باخیردی. سویوق جانیما ایشله‌دی! عکسین دالی اوزوندن مارادونا، باشی‌نین اوستونده آلتین جامی ساخلامیشکن، گؤز گؤز ائله‌ییردی. عکسی آلیب یاخیندان باخماق ایسته‌سم ده، اللریم قورویوب یانیما دوشموشدو. مورتوضون دیشلری قاباریب بوغازیمی ییرتماق ایسته‌ییردی. آتیلیب دوشوردو؛ آغزینداکی لوپا ساققیز آیاغیمین یانیندا یئره دوشدو. آغزیمداکی ساققیر بوغازیمی قومارلاییب، نفسیمی کسمک ایسته‌ییردی. مورتوض اوزاقلاشاراق، یوخا چیخیردی. قاچدیغی هر آددیمدا، اوره‌ییمی شوتله‌ییردی. کوچه‌لری‌نین باشیندا بورولوب گؤزدن ایتدی. قارشیمداکی زیبیللره باخاسی قالدیم. مورتوض مارادوناسینی گؤتوروب یوخا چیخمیشدی. آغیرلیغیمی کؤهنه روبابین تاختا قاپیسینا سالدیم. دالیم بوشا گئتدی؛ قاپی آچیلیب، آرخام اوسته، پیلله‌لرله آشاغی دیغیرلادیم. باش گؤزوم چیرپیلا چیرپیلا حیطه دوشدوم. سول قولومون دیرسه‌ییندن بیر سانجی باش قالدیریب جانیما دولاشدی؛ آغریدان ایلان کیمی قیوریلیردیم. دیرسه‌ییمدن قالخیشان تیتره‌ییش، بوتون جانیمی تیتره‌دیردی. دیکه‌لیب قالخماق ایسته‌ینده، گؤزلریم قارالیب، بیر داها یئره سریلدیم. بؤیروم اوسته، ساغ قولوملا سول قولومو قوجاقلادیم. زوققولتودان گؤزلریم دولدو. کیمیسه آغیر آغیر دمپایی‌لرینی سوروتله‌یه سوروتله‌یه یاخینلاشیردی. گؤزلریمی آچدیغیمدا کؤهنه روباب، قارنی ایله، اوزومه کؤلگه سالمیشدی. دن دوشموش دولون قاشلاری دویونله‌نیب، منه باخیردی. هؤروکلری چییینلریندن آشاغی ساللانمیشدی. «یئتیم بوردا نییه اوزانمیسان؟». اوره‌ییم تیتره‌دی؛ گؤز یاشلاریم یاناقلاریمدان آغزیما سوزدو. قالدیریب حوووضون قیراغیندا اوتورتدو. اوشاغی گؤندریب نرگیزی چاغیتدیردی. ابیل عمی بیلسیدی نه ائده‌جکدیم؟ گئجه گئج گلیر؛ اؤزومو یوخویا وورا بیلردیم. قولومو باغلاماسالار، گیزله‌ده بیلرم. بیر زاد اولدوغونو هاردان بیلیرسن؟ زوققولتوسوندان باشینا یئکه بیر داش دوشدویو بللی دیر! کئچن ایل بایرامدا ساغ قولوم سیناندا، هئچ بئله آغریسی یوخ ایدی! قالخیب توپا برگردان ووراندا، قیچیمین آلتیندان ووروب، قولوم اوسته یئره سرمیشدیلر. بایرام تعطیلاتی زهرمار اولموشدو هئچ، ابیل عمی ائله بیر سیلله وورموشدو، قولاغیم بیر هفته‌یه کیمی کوفولداییردی. قولومو باغلاماسالار بئله، بیچاق گؤتوروب ایلمک دویونله‌ینده هر زاد اوزه چیخاجاقدی. هر نه اولورسا اولسون، اوشاق ائوده ایشله‌ییب دده‌نین الیندن توتماسی گره‌کیردی؛ یوخسا ایکی قیرانا دَیمزدی! نرگیز ساخلاییب، کؤهنه روباب ایسه قولومو یوخلاییردی. خینالی الینی دیرسه‌ییمده گزدیریب: «ایری سوموح سینیب» دئدی. دیرسه‌ییمین گؤیرتیسینی نرگیزه گؤستریب باشینی توولادی. نرگیز کالاغا‌ییسی‌نین(روسری) اوجو ایله گؤز یاشلارینی سیلیردی. سینیق قولوم باش گؤزومون چاپیلاماسینی اونوتدورموشدو. داغدان باغدان دانیشاراق، باشیمی قاتدیقلارینی بیلیردیم؛ آنجاق منیم باشیم، مورتوضون الینده آچیلان، مارادونانین یانیندا ایدی. دیشلری‌نین نئجه اؤزوندن قاباق گئتدییی، آتیلیب دوشدویو، اوزاقلاشیب یوخ اولدوغو، بیر آن اولسون بئله گؤزومون اؤنوندن چکیلمیردی. مورتوض منسیز توپ اوینایاجاقمی؟ اویناماز! من اولماسام، اونا توپ آتماسام، بیر قول بئله وورا بیلمز؛ همشه دیریبله‌ییب بوش قوللاری اونا آتیردیم. سن اولماسان من توپ اوینایانمارامی اؤزو دئییردی! نئجه کی کئچن ایل بایرامدا اوینامادی. تیملرین هامیسی همشه بیزی یان یانا گؤرموشدولر. یایدا اهبر قره بیر مینی‌بوس توتوب، کوچه‌ده گؤرن اوشاغی میندیریب تبریزه آپاردی. بیر فوتبال مدرسه‌سی ایله دانیشیب، مرندن ده بیر فوتبال مدرسه‌سی‌نین گتیرمه‌سینی آنلاشمیشدی؛ آنجاق بیزلری آپاردی! تبریزه کیمی چالدیردیق؛ اهبر قره اورتایا دوشوب، سیقاری داماغیندا، بورجوتدوقجا بورجوتدو. یاماقلی شالوارلاریمیزلا چمن مئیدانینا دوشدوک! مئیدانا یاماق کیمی گؤرونوردوک! تیملری سئت پالتارلاری ایله گونشین قاباغیندا پاریلداییردی. مامانلاری میوه سویو زادی اللرینده، بیر قیراقدا، آلقیشلاییردیلار. موربی‌لری عجاییب تاکتیکلر اؤیره‌دیردی. اهبر قره‌میز، سیقار داماغیندا، هر سؤزونده یامان یوغوز یاغدیریردی؛ توپو یاخچی وورمایاندا آنامیزی سؤیوردو! بیرآزدان ایتیرن اؤزوموزو تاپیب، اویونوموزو اوینادیق. سسلرینی قیسیب دالی اوتوردولار؛ آجیقلا شیلتاقلیغیمیزا باخیردیلار. نه قورخو بیلیردیک نه یورولماق؛ راستیمیزا گلن ایلک و بلکه سون میدانی شوخوملاییردیق! توپ منله مورتوضون آیاغینا بئله یاتمامیشدی؛ گؤزو باغلی بیر بیریمیزی تاپیردیق. اون بیرینجی قولو ووراندا، فیشقانی چالدیلار! آجیقلاریندان بیزه وئره‌جک ناهارلارینی دا وئرمه‌یب، مینی‎بوسا میندیریب، یولا سالدیلار! عکسیمیز مرندین گونده‌لییینه(روزنامه) گئتدی. دازالاق کلله‌لریمیزله صفحه‌نین اورتا باشیندا دایانمیشدیق. عکس ایله دیبینه وورولان یئکه تیتری «غلبه مدرسه فوتبال مرند بر ستارگان مدرسه فوتبال تبریز» کسیب دوواریمیزا وورموشدوق… کؤهنه روباب خیرچیلدادیب قولومو یئرینه سالمیشدی. بوغازیما قَهَر ایلیشدی؛ گؤز یاشلاریم سس‌سیزجه یاناقلاریما سوزدو. بو سینیق قولوم ایله باشیما نه داش سالاجاقدیم؟ او قیلیقدا کی روباب باشینی توولاییردی، آزی بیر آی قولومو بوینوما آسمالی ایدیم! کؤهنه روباب حوصله ایله سارغیجلاری قولوما سارارکن، نرگیز: «گئجه ددن گلمه‌میش گیر یات، گؤراخ صاباح باشیمیزا نه گلیر…» ابیل عمی‌نین سسی قولاغیمدا جینگیلده‌دی: «سن ائشیحده نه پوخ یییردین کی قولون سینا؟!…» دانیشماغا ایجازه وئرمه‌یه‌جکدی! باشیما نه اویون گلدییینی نئجه آنلاتاجاقدیم؟ قولومو نرگیزین کالاغاییسی ایله بوینومدان آسمیشدیلار. الیمدن توتوب گئتمک ایسته‌ینده دللح عیباد، یئکه جعبه‌سی قولتوغوندا، آغیر آغیر پیلله‌لری ائنمه‌یه باشلادی. گلیب حوووضون قیراغینا چاتاندا، بیزی ایندیجه گؤرور کیمی، باشدان آیاغا منی سوزدو: «گینه بو گئدییه نولوب؟!» کؤهنه روباب نرگیزه ماجال وئرمه‌دن: «هئشزاد؛ کاسیبی دوه اوستونده ایلان سانجار؛ دوردوغو یئرده باشینا داش دوشوب». دللح عیباد باشینی توولایا توولایا آغیر آددیملاری‌نین آردینی توتدو. یاریدا قانریلیب نرگیزه باخاراق: «صاباح گتی باشینی دیبدن ووروم؛ ذئهنی دورولسون…» دئدی.
بیر بوجاقدا قالمیشدیم. نرگیز آجیقلی آجیقلی سوپورگه چکیردی.‎ بیر تیکه چؤرک آغزیمدا بؤیویوردو! فَران مدرسه مغنه‌سینی یوخاری قالدیریب، آیقین بایقین قولوما باخیردی. بیر سوره سوپورگه‌یه باخیب، فیکره دالدیقدا، دفتر کیتابی قارشیسینا تؤکوب یازمایا باشلادی. بئله ایشلر اولاندا، باشینی دفتر کیتابا سوخوردو! گؤزوم دفترینده دولاشان قلمده قالمیشدی. باری ساغ قولوم سینایدی؛ مشق زاد یازمایایدیم! قاپی‌نین سسی ایله یئریمدن داشلاندیم. حامید ایچری دورتولوب، باشیمین اوستونو آلمیشدی. «صاباح توپوموز وار آخی؛ اؤینویه بولرسن؟» دومبا گؤزلری ایله جاوابیمی گؤزله‌ییردی! بارماغی ایله دوداغی‎نین قیراغینی چکیب، دیشلرینی بیر بیرینه سیخدی. «هن بابام اوینارسان، الیوینن اوینامیرسان کی…» الینی شالوارینا سوخوب، خوروزونو ال‌له‌یه ال‌له‌یه، بوز بوز باخیردی. «چتین اولار، ولی اوینارسان؛ اولماغین یاخچیدی…» داها نه دئدییینی ائشیتمیردیم. ویر ویر دانیشیردی؛ خوروزو ترپندیکجه دئیینیردی. فَران نه حالدا اولدوغومو سئزیب، باشینی یوخاری قالدیرماق ایسته‌میردی. بالاجا ال‌لرین دفترین اوستونده گزدیییندن گؤزومو آلا بیلمیردیم. حامیدین کاپیتان قولباغی اوچون گلدییینی یاخشی بیلیردیم. فَران بیر آن باشینی قالدیردیغیندا، نسه ایسته‌دیییمی باشینی یئله‌یه یئله‌یه سورور! «او ایشقابدان بازوبندی گتیر وئر بونا…» دئییرم. یئرینده‌جه قورویوب قالیر! هاندان گئجدن قالخیب، ایشقابی آچدیغیندا، گؤزلری دولور. قولباغی حامدین اوستونه آتیب، دفتر کیتابین اوستونه شیغاییر. سحردن نه‌لر باش وئردییینی دؤنه‌لرله دوشوندویومده، مورتوضون سونونجو ساققیزینا چاتدیقدا، قاییدیب اوراسینی دَییشمک ایسته‌ییرم! مارادونا اولماسین؛ اولسا دا الیندن قاپیب، اؤزو کیمی یوخ اولوم؛ یا دا جیریب تیکه تیکه دوغراییم! فَران عکس چانتاسینی گتیریب، عکس‌لری -گؤزلریمی یومدوغوم سوره‌ده- یئره دوزموشدو! همیشه دوزدویوم سایاق؛ دسته‌جمعی‌لر بیر طرفده، کاپیتان‌لار بیر طرفده، قدیمی‌لر آیری طرفده… قالی‌نین اوستو سیرالانمیش عکسلرله بویانمیشدی. مارادونادان باشقا هر بویادان وار ایدی! قولوم بوینوما آغیرلیق ائدیردی؛ قهردن بوغولوردوم. باجیم ایلدیریم وورموش کیمی کوچه‌یه چیخیر. بیر قوللو عکس‌لری یئرینه قایتارماق ایسته‌دیییمده؛ اولمور! اویان بویانا سپه‌له‌ییرم. گئجه یاتیم سحر هر زاد اولکی کیمی اولسون؛ بونلارین هامیسی یوخو اولسون؛ بئله پوخلو پوخلو قالماسین. ایکی اللی کیف توتموش ساندویچدن یاپیشیب، یئکه بیر دیش ووروم. کالباس، شور خیار، دونیانین ان دادلی یئمه‌یی کیمی، دیلیمده دادلانسین. پولونو چوخ واخت مورتوض وئریردی؛ جیبی همشه دولو اولوردو. پوللارین دالیسیندا چوخ سؤز اولوردو؛ ائولرینه کیشی‌لر چوخ گیریب چیخیردی. مورتوض دوغولمامیش آتاسی هاراسا چیخیب گئتمیشدی. آروادلار کوچه دانیشیقلاریندا قاش گؤز ایله مورتوضو گؤستریب، آنلاشیلماز سؤزلر دئییب، گولوشوردولر؛ دوداقلارینی بوزوب باشلارینی توولاییردیلار. ایشین نه یئرده اولدوغونو باشا دوشوردوم؛ آما مورتوضون اوزونه گلمیردیم. ساندیویچه دیش ووراندا قهبه پولوندان گلدییی‌نین فرقینده دئییلدیم.‌ آما بو ساعات مورتوضون یاخاسیندان یاپیشیب، جیبی‌نین دولولوغونو، قهبه ننه‌سیندن یانا اولدوغونو، اوزونه توپوره بیلردیم. یوخ! هر زاد یئنه یولوندا اولاجاق؛ مورتوض یئنه دوستوم اولاجاق. توپ اوینایاجاییق؛ اورک سؤزلرینی منه دانیشاجاق. فَران تؤوشه‌یه تؤوشه‌یه دیزلری اوسته اوتوراراق، مغنه‌سینی یوخاری قالدیردی. سپه‌لنمیش عکسلری گؤزونون قیراغی ایله سوزوب، اووجونداکی ساققیزی گؤستردی. گؤزلری ده گولوردو! وار یوخونو بیر ساققیزا وئریب، منی مارادونایا قوووشدورماق ایسته‌ییردی. آنجاق آلدیغی کارتون عکسینی داشییردی! تله‌سیک، بالاجا یومرو اللری ایله، ساققیزی آچیب عکسینی چیخاریر. عکسین قاتینی آچیب باخجاق گولوشو ایتیر؛ گؤزلری اویان بویانا دؤیوکور. مارادونانین یئرینه سیندیرئللا چیخمیش؛ فَرانین سئودییی کارتون شخصیتی! پؤرتوب قیزاریر. بورنوندان قان آچیلاجاغینی بیلدیییندن، الینی بورون دئشیکلرینه توتاراق، قانین سوزمه‌سینی گودور. بیر خبر اولمور! اوزومه باخمادان یئرده‌کی‌لری ییغماغا قورشانیر. اوووجلاری توپلادیغی عکسلرله دولاندا، بورنوندان قان آچیلیر! اؤزونو ایتیریب عکس توپالارینی بورنونا باسیر؛ عکسلری قانینا بویاییر…
اؤزومو یوخویا وورموشام. ابیل عمی‌نین کؤلگه‌سی دوواردا سیقار توستوله‌ییر. فانوسون جانسیز ایشیغیندا، نرگیز کلفچه ده ایپ آچیر. ایپین نه رنگده اولدوغونو سئزه بیلمیرم. قارا قیرمیزی اولمالیدیر؛ دَزگاهدا بو رنگین قورتولدوغونو خاطیرلاییرام. قالی توخویا بیلمه‌یه‌جه‌ییمی دوشوننده، جانیم جیجیشیر. ایلمک دویونله‌مکدن زهلم گئتسه ده، دزگاهدان اکیلمک باهاناسی منیم سینیق قولوم اولمامالی ایدی. فَران یورغانا بورمه‌له‌نیب، میشیل میشیل یاتیب. بورون دئشیکلری‌نین بیرینه پامبیق تپدیریب، آغزی آچیق، زورلا نفس آلیر. اوزونه دوشن قونور ساچی، ساریمتیل ایشیقدا آباریب بؤیویور. ابیل عمی‌نین توستوسو دووارا سوواشیب یوخ اولور. یاری آچیق گؤزلریم، فیرلانان کلفچه‌نین کؤلگه‌سینه دالدیقجا، یومولور: کاپیتانلیق قولباغی مورتوضون قولونا سالینیر. مارادونا اولور؛ هامینی، گولئری بئله دیریبله‌ییر. قولا دیغیرلاتدیغی توپ مینی‌بوسا دؤنوشور! اهبر قره اوشاقلاری میندیریب آپاریر. دالیسینجا قاچیرام؛ قاچا قاچا قولومون سارغیجلارینی آچیرام. آت داشقاسی اؤزونو یئتیریر. سینیق قولومدان یاپیشیب یوخاری چکیر. آتی وار گوجو ایله قامچیلاییر. ماشینا چاتا بیلمه‌یه‌جه‌یینی گؤرونجه، بیر سیقار آلیشدیریب، ائویمیزه ساری چاپیر. ابیل عمی زهیملی باخیشی ایله، سینیق قولومدان یاپیشیب، دزگاهین اوستونه چکیر. الیم ایپی بویلوقلارا دولایا بیلمیر. بویلوقلارا دویونله‌نیب، دیبیندن اوزولور…
یئنه مدرسه‌یه گئج قالمیشدیم. شاختادا اوشاقلار صفه دایاناراق، مودورون انگی قیزیشمیشدی. قاپیدان قاییتدیم. هارا گئده‌جه‌ییمی بیلمیردیم؛ گونون ائرکن واختیندا یا مدرسه‌ده اولوردوم یا دا قالی توخویوردوم. بیر سوره باغلی کولوبون قارشیسیندا وار گل ائله‌دیم. گلیب آچانا چوخا چکردی؛ سویوقدان دوناردیم. بیرده من هاردان اوینایا بیله‌جکدیم؟ مشه رحمتین، روزنامه تیکه‌سینه بورمه‌لنمیش گیله‌نار قوروسونا، پولوم چاتاردی! گیله‌نار قوروسو ایسته‌ینده، گؤزوم ساققیزلارا ساتاشدی. بو قالانمیش، بویالی ساققیزلاردان بیر مارادونا چیخایدی! اینگیلیسین قاباغیندا، الی ایله ووردوغو قولون مارادوناسی! قولو تیلویزیونوندا «آلله‎هین الی» آدلاندیریردی! هامی‌نین گؤزلری اؤنونده -گولئردن بئله یوخاری- قالخیب، الی ایله توپو تورا دینقیلداتمیشدی! داوردن باشاق هامی او الی گؤرموشدو! الله‌هین الی قولومو سیندیریب دئیه، گیله‌نارلاردان بیرینی آغزیما آتدیم. ورزیشیمیز وار ایدی بو گون! مورتوض منسیز نه ائده‌جک؟ قولوم ساغالسا قارشی تیمدن اوینایاجاغام؛ مورتوض گیل ایله قارشی دوروب بورونلارینی اوواجاغام. تکی بو قولوم ساغالسایدی؛ داها کیمسه قارشیمدا دایانا بیلمه‌یه‌جک. او قدر تکیمه دووار ایله تمرین ائده‌جکدیم، داها اوغول اوشاق یانیمدا دانیشا بیلمه‌سین. یئکه‌لنده ایستادیومدا یاخشی بیر تیمه قاتیلیب، اورادان دا تبریز تیملرینه چکیله‌جکدیم. مورتوض کیمیلری دالی جیبیمه قویوب، اؤزومه بیر مارادونا اولاجاقدیم. تکی بو قولوم تئز دوزلسیدی! نرگیز سینیغی تئز بیتمه‌سی اوچون، تویوق قیچی یئمه‌لیسن دئییردی. ایشقابدا گیزلتدییی پوللاردان گؤتوروب -دیزینه قدر چکدییی قارا جورابین ایچینه قویوب- بیرآزدان بازارا چیخاجاقدی. اولمایا منی گؤره؟ گؤرسه ده گؤروب؛ الیندن یاپیشیب، منده توکان توکان اوجوزلو تویوق قیچی آختارماغا باشلایاردیم. آزجا آلدیغیمیز تویوق قیچلارینی نرگیز او قدر یوغاجاقدی، اللری تویوق الی کیمی آغ آپباق اولاجاقدی. تویوق قیچیندان زهلم گئتسه ده، هامیسینی ایچری اؤتوروب، سویوندان بیشیردییی سوپبو دا ایچمه‌لیم! شیره‌سی گئدیب سینیق یئرین سومویونو یاپیشدیراجاق. کؤهنه روباب «یئمه‌یین یاخشی اولسون، سوت زاد ایچ، اوندا ائله تئز توختارسان؛ ایکی هفته‌یه آچارام» دئمیشدی. آخشام چاغی قارنینی ییرغالایا ییرغالایا قاپیمیزدان ایچری گیرمیشدی. آغیرلیغینی دالان دووارینا سؤیکه‌ییب، بیر بالاجا قابی آناما وئره‌رک: «بو جامیش سوتوندن وئر او گئده ایشسین. بی جیققیش قالمیشدی؛ دونن مشد عیباد کَتدن گَتیمیشدی، آز دا اولسا باغیشلا…» دئمیشدی.
یالدیر مسجدی‌نین دالیسیندا علی عمی‌نین آتی اوزاناقلی قالمیشدی. قوجا الینده نسه توستوله‌ییب آتین بورنونا توتور. قوجا آتین باشی سیلکه‌له‌نیب، قیچلاری چکیلیر. علی عمی بیر سیقار آلیشدیریب، آتین باشی اوستونده، بئیار بئیار توستوله‌ییر. آتی‌نین معتاد اولدوغونو ائشیتسم ده، یاخیندان گؤرمه‌میشدیم. «حئیوان دور قورتول، ایشیمیز یاندی بویون» دئیه‌رک زیغلی باشماغینی آتین قارنینا توخوندورور. سیقاری داماغینا آتیب، آتین جیلوووندان چکیب قالدیریر. قوجا دا بیر بئله گوجو اینانمازدیم! داشقانین اوستونه چیخاراق، اویان بویانی سوزدوکدن سونرا، آتا وئرندن اؤزو ده توستوله‌ییر. اوز گؤزونون پاسلی توکلری‎نین آردیندان، بیر سوره منه باخیر. کیرلی الینی منه ساری اوزالدیب: «گل گئداخ» دئییر.
شهرین دیب بوجاغینی دولانیب، یوکلری یوکله‌ییب بوشالدیردیق. داشقانین اوستونده هر نه‌یی اونوداراق، گلن گئده‌نه ال ائله‌ییردیم! علی عمی کیف توتموش پئنجه‌یی‌نین جیبیندن، بیر بالاجا توربانی ائشییه چکیب، یئر یئمه‌لی وئریردی. آتین یورولدوغونو گؤرونجه ساخلاییب دینجلدیردی. دالیسیندا ماشین قالیب سیقینالا باساندا بئله، قالدیغی یئرده قالیردی! دالییا دؤنمه‌دن «سیهدیر گؤروم…» میزیلداناراق، گؤزلرینی یوموب، مورگوله‌ییردی. قوجادان «مدرسه‌نین زنگی ایندی وورولار گؤره‌سن؟»‌نی هئی سوروردوم. او دا هر دؤنه «تئزدی هله؛ گؤرمورسن قور قودوخ ائشیحده دَییر؟» دئیه جاوابلاییردی. بیر ائوه قوم آپاراندا، بوشالتماغی‌نین راحات اولماسی اوچون، داشقانین دال دالا ایچری سالماسینی ایسته‌دیلر! آجیقلانیب، قاشلارینی دویونله‌یه‌رک: «گؤرمه‌میشیخ آت دنده عقب گئتسین؛ گلین بوشالدین، ایشیم وار…» دئدی. سؤز اوزاندی؛ آز قالا ساواشاجاقدیلار! قیرین برک اولدوغونو گؤرونجه، داشقادان یئره آتیلدیم. یولومو قاباغیما آلیب، هیرسیز هیرسیز، آددیملاماغا باشلادیم. قولوم زوققولداییردی؛ مارادونا بوغازیمی سیخیردی. حوووض باشی‌نین(مرکز) ساعاتی، مدرسه‌نین قورتولوشونا هله بیر ساعات قالدیغینی گؤستریردی. قالدیریمدا(پیاده‌رو)، یئره تاخیلیب گئتدیییمده، باشیمی بیر دسته‎یه (برق چیراغی) چیرپدیم. همیشه‌کی ایشیم ایدی؛ خیاللاریما دالیب، هئچ نه‌یی گؤرمه‌دن، اؤز اؤزومه دانیشاراق گئدیردیم. دؤنه‌لرجه ابیل عمی‌نین یانیمدان اؤتمه‌سینی بئله گؤرمه‌میشدیم! ائوه گلدییینده، آجیقلا شوخلوغو بیر بیرینه قاتیب: «هارا ائله، گئچی کیمی، باش آلیب گئدیردین؟!» دئیردی. مورتوض گیل توپ اویناییرلار ایندی. یولومو مدرسه‌یه ساری اییرم. قاپی آراسیندان باخماغیم گلیر. یوخ؛ منده اویناماق ایسته‌ییرم! قولوم چولاق اولسا دا، بو آیاقلار ایشینی گؤره‌جک! مورتوضو سیندیرماغا گئدیرم؛ ائله ووراجاغام دادای دورسون! من اولمایان یئرده دارغالیق ائدیر؛ مئیدان الینه دوشوب، آنقیریر! توپدان چوخ آنقیرماق الیندن گلیر. منی اوزاقدا گؤروب، لاپ اؤزوندن چیخیب! باشیم یوموشاق بیر زادا توخونور؛ آرخایا سندیرله‌ییرم. دستک بئله یوموشاق اولا بیلمز! باشیمی قالدیراندا، ابیل عمی‌نین زَهیملی باخیشینا ایلیشیرم! آجیقدان بیغلارینی چئینه‌ییب، باشدان آیاغا منی سوزور؛ سینیق قولومدا ایلیشیب قالیر…
***
گؤز گؤزو گؤرموردو؛ برقلر گئتمیشدی. اوشاقلارین، یئکه توت آغاجی‌نین آلتیندا، کؤلگه‌لری ویرنیخیردی. کؤلگه‌لردن اوجالان باغیرتیلاری گولوشلری دویوردوم. اونلارا قاتیلیرسام بئله سئزه بیلمه‌یه‌جکلر! بیر بیرینه بارماق ائله‌ییب قودوخلانیردیلار. هردن ماشین چیراغی‌نین ایشیغی، توت آغاجی‌نین آلتینداکیلاری سئزدیریردی؛ مورتوضون هیندیشقا بوینو بیر آغاجدان بللی اولوردو. بیرآز آرالیقدا، دووارا سیخیلیب، الیمی تومارلاییرام. بو ایکی هفته‌ده سارغیجلار قولومو سیخیب، الیمی شیشیرتمیشدی. کؤهنه روباب آخشام چاغی قولومو یوخلایاندا، باشیمی تومارلایاراق: «هله واختینا قالیر بالام؛ داریخما…» دئمیشدی. چوخ داریخمیشدیم! گونلر آغیر کئچیردی؛ آخشام چاغلاری‌نین قَهَری بوغازیمی سیخیردی. هامینی قاپیردیم؛ اوشاقلار اَت آجیلیغیمی گؤروب یاخین دوشموردولر. بیر سیقار ایشیلتیسی، قارشیمدان کئچیب، کوچه‌میزه دؤندو. ابیل عمی ایدی؟ کوچه‌نین باشیندا بیرآز دایانیب، ایشیغی یئره آتاراق، گئتدی. مورتوض گیلده درس اوخودوغومو دئیه بیلردیم، یا دا قارانلیقدا، کیمسه بیلمه‌دن، ائوه سوزوله بیلردیم. هر نه اولورسا، بو آن دوروب گئتمه‌ییم گلمیردی. قارانلیقدا، دام دووارا باخماقدان، اوره‌ییم سیخیلمیشدی. یئنه سیقارلی بیریسی، باشماقلارینی سوروتله‌یه سوروتله‌یه، قارشیمدان اؤتوب اوشاقلارین آراسینا گیریر. های کویلریندن اهبر قره اولدوغو بللی دیر! یاواشجا دانیشیر. یئریمدن قیمیلداناراق، یاخینلاشیب دینشه‌ییرم؛ هاراسا توپا آپاراجاغینی دئییر. چیخیب گئدینجه آتیلیب دوشورلر. ندن ایندی کرگ بو اویونلاری سالا؟ گومانا دوشوب؛ کئچن هفته ده سالمیشدی! باشیمی دووارا سؤیکه‌ییب گؤزلریمی یومورام. مارادونا قارانلیقدان چیرتیب، قارشیمدا دورور! آرژانتین میللی تیمی‌نین کؤینه‌یی اَینینده؛ آیاغی‌نین آلتیندا بیر میکاسا توپ، گولومسونور. توپو منه وئرمه‌سینی ایسته‌ییرم. آیاغی‌نین اوجو ایله توپو منه ساری دیغیرلادیر. آخی مورتوض، قلمه کیمی بویو ایله، نئجه مارادونا اولا بیلردی؟! بو کوچه‌ده بیر نفر مارادونا ایدی، او دا من ایدیم! اوشاقلارین دانیشیقلاریندان آدیمی ائشیدیرم. «جومه‌یه کیمی چولاخ مارادونا دوزلر؟… یوخ بابام؛ او گون ننه‌سی دیییردی بو تئزلیخدا دوزلمز. اونو دای توپا زادا چاغیرمییین؛ دده‌سی ائوده قان سالیر..» بونو ائشیدینجه گؤزلریم دولدو. ماشین چیراغی ایشیقلاندیریر؛ یووارلاق(دایره) قوراراق اوز اوزه دایانیبلار. «هئش دانیشدیرماق اولور؟ ایت کیمی آدامی قاپیر؛ قولون سینیب سینیب، نییه قاپیرسان دای؟…» مورتوضون سسی گلیر؛ گولوشو اوره‌ییمی سانجیر: «آخی مارادونا اولاجئیدی؛ بو چولاخ قولوینان دای اولمانماز، اونا گؤره…» گولوشلر بیتمه‌میش، یئنه مورتوض دونقولدانیر: «قوی جهنم اولسون بابام؛ گلین بازیکونلاریمیزا باخاخ… آخی بو قارانلیخدا نه عکسی؟…بوننان ایکیسی وار منده؛ کیم دَییشیر؟… اوش گؤروم؛ اوننان اوچو واریم؛ آیریسیندان مایا قوی… او ایشمایکئلیوه بو ایکی دَنه‌نی وئریرم با… وئر گله یاخچی… پوخ یئمه گئده، چکیب جیرارام ها… ائله اولماسین او دفه‌کی کیمی ننه‌ن گلسین قاپیمیزا…» باش قولاغیم گئدیر؛ همده اوشویورم! او گون عکسلریمه بیر کیبریت ووروب اودلادیم. هامیسینی وئرسیدیم، بیر مارادونا وئرردیلرمی؟! سویوقدان انگیم تیتره‌ییر؛ سسیزجه گئتمک ایسته‌ینده، مورتوضون جیغ جیغا سسی گلیر: «هئش کیمده بو یوخدو با؛ نئچه‌سین وئررسیز بونو وئرم؟… گالا با… گرح اؤزوم سئچم…». ماشین اؤتنده دووارا قیسیلیرام. مورتوض، هامیدان هوندور، عکسی الینده اویان بویانا ییرغالاییر! شهرت‌باز گئده هر یئرده گؤزه سوخولماق ایسته‌ییر. ندن مورتوضون منسیز عاجیز قالدیغینی دوشونوردوم؟ کئفی داها دا ساز اولور! قولومو آچان گون، اللریمی او هیندیشقا بوینونا ساریب، بارماقلاریمین یئری گؤیه‌رینجه سیخاجاغام! یا دا باسیب قولونو سیندیراجاغام؛ یوخ! توپدا دابالاق آتیب قیچینی سیندیراجاغام! یا دا شار شار اوینایاندا، ساواش سالیب، داشی باشیندان چیرپاجاغام! اوشاقلار های سالیب، عکسی الیندن قاپماق ایسته‌ییرلر. مورتوض: « قولسوز مارادونایا دییین گلسین بونو الیمدن آلسین…» دئیه باغیردی. گؤزلریمه قیزیشما گلدی! ایسته‌مه‌دن کؤلگه‌لره ساری آددیملادیم. آرالیقدا دولانیب، اوشاقلاردان بیری اولدوم. مورتوض آنقیرماغینی باتیریب، دووارا سؤیکه‌نه‌رک، عکسینه باخیردی. یاخینلاشیب دوز قارشیسیندا دایاندیم! ماشین ایشیغی اوزوموزو ایشیقلاندیردی؛ گؤزلرینده یاد بیر باخیشی دویدوم! آغزی همیشه‌کیندن داها آچیق، گؤزلریمه زیللنمیشدی. عکسی الیندن قاپیب، گؤتورله‌نیب قاچدیم. مارادونا اولوب اوچماق ایسته‌ییردیم! قارانلیغین اوره‌یینی دله دله یورویوردوم. بوتون اویونچولاری دیریبله‌ییردیم؛ قولئری دیریبله‌ییب قولا دیغیرلاتماق ایسته‌ینده، باشیمین دالیسیندان نسه گوبساندی! باشیمین اوستونو آلان اوشاقلارین ایچیندن حامید: «مورتوض داش دَییب باشیندان؛ داش دوشسون باشان…» دئیه‌رک، یئره سریلن منی قالخیزماغا چالیشیدی. اسماعیل باققالین آفتافاسینی گتیریب باشیما اَییرلر…
مورتوضون ننه‌سی قاپیمیزدا یالوارماغا گلمیشدی؛ آز قالیردی نرگیزی یالاسین! ابیل عمی تیلویزیون قارشیسیندا سیقارین توستوسونو، یوغون بیغلاری‌نین آراسیندان، تولانبار کیمی ائشییه اوفوروب: «اوشاخ بو وخته جان ائشیحده قالسا؛ باشی سهلیدی، وراللار گؤتی ده جیریلار…» دئیه راضیلیقلا انگینی قاشیییردی. جوم جولاق سو گلیب ائوه چاتاندا، هله برقلر گلمه‌میشدی. دینیب دانیشیمادان، کیمسه بیلمه‌دن، بیر بوجاغا سیغینیب تیر تیر اَسیردیم. باشیما نه گلدییینی بیلن اولماسین دئیه، فَران-ین چیراق اؤنونده کؤلگه‌لرله اویناماسینا دا قاتیلمامیشدیم. آما برقلر گلن کیمی، نرگیز قیچینا چیرپیب: «اوشاخ اؤلدی» باغیرمیشدی. قان کسیلمه‌ییب، اینیمده‌کی آغ پولیوئری قیرمیزییا بویامیشدی. باشی باغلی، اوزاناقلی قالمیشام. مارادونانی اوووجومون ایچینده سیخیب، بوراخماق ایسته‌میرم. فَران باشیمین اوستونده اوتوروب، قاریشیق توکلریمی قوردالاییر. گؤزلرینی اوووجومدان آلا بیلمیر. دیرسکله‌نیب، باشینی ایکی الی‌نین آراسینا آلاراق، یاخیندان اوووجوما زیلله‌نیر. یاواشجا الینی اوزالدیب، بیر بیر بارماقلاریمی آچماغا باشلاییر. مارادونا اَریییب خمیر اولموشدو…
سون؛ ۱۴۰۲.۶.۸