شوورک بیر اوغلان‌دیر، قولاق‌لاری بؤرکدن ویریب چؤله. باشین سؤیکه‌ییب اتوبوسین آتوشگه‌سینه، گؤز تیکیب ساری تورپاقلی داغ‌لارا، داش‌لارا. بورنی ایی چالیر؛ باش دولاندیریر، گؤزی ساتاشیر بویلی بیر آروادا؛ باشماغین چیخاردیب، ایاق‌لاری باغا تکین یاییلیب یئره. جاوان قیز لئچگی‌نین اوجی‌نان بورنون توتوب، اونا بوز- بوز باخیر. دالداکی کیشی بیر آروادنان پیچیلداشیب، قاققیلداییب گولورلر. قاباقدا ایلشن آرواد اوشاقدان بورما گؤتورور؛ اوشاغین چیغیرتیسی قالخیر. اوغلان باشین ترپه‌دیر، بؤرکون گؤتوروب ال چکیر اوستونه، توز قالخیر. گؤز‌لری آخینیر. بو یورغونلوغون ایچینده آداخلیسینا فیکیرلشیر. کاغیذی دالبادال جبهه‌یه گؤندریب اونون اوره‌یین اسدیرمیشدی. داها اوغلان دؤزنمه‌میشدی بو آیریلیغا. اَینی باشینا باخیب دئییر:
– آنجاق بئله گئده بیلمه‌رم آداخلی‌بازلیغا. ایاغیمی ماشیندان یئره قویجاغین گره‌ک سعادت حامامین بیرجه گؤره‌م.
توزلی ساکین بوش صندلین اوستونه قویوب، هردم هووشه‌نیر؛ گؤز آلتی باخیر، آپارمییا‌لار؟! اونی آپارانین الی یامان بوشا کئچر. یولداشی یادینا دوشور. باشین چؤند‌ریر آتوشگه‌یه ساری. شوفیر آینادان گؤرور. پیتیق بوغی بورما بیر شوفیردیر. یوغون سسی‌له دئییر:
– آی اوغلان جبهه‌دن نه خبر؟!
اوغلان غملی دئییر:
– جبهه‌ده نه اولار به‌یم. گولله، خمپاره، یارالی، ایلان…
– ایلان؟! … سن ده گوردون؟!
سسی بیر آز بوغولور:
– هه، نییه گؤرمه‌دیم. یولداشیمی ایلان اؤلدوردی. داشین آلتیندان فیشیلدییا – فیشیلدییا چیخیب ائله سنگرین دالیندا ویردی. آمان وئرمه‌دی. سوزولدی کیسه‌‌لرین آراسیندا یوخ اولدی.
الین چکیر بوغونا:
– ایلانی هلم هلم اؤلدورمک اولماز! اولدوزدان سونرا هئچ زاددان قورخوسی یوخدور. ائشیتمه‌ییبسن دئیرلر، ایلان اولدوز گؤرمسه اؤلمز.
شوفیرین دالیندا ایلشن کیشی گؤز‌لرین برلدیر، دئییر:
– ایلانین قنیمی قارتال‌دی، قارتال.
اوغلانین قولاق‌لاری شهله‌نیر:
– عجب! بونلاری ائشیتمه‌میشدیم.
بیر آهیل کیشی باشین دولاندیریر، ایکی صندلین توشوندان گؤز تیکیر اوغلانا:
– منیم اوغلومی گؤرمه‌دون؟ آدی حیدردی.
– یوخ حاجی تانیمیرام.
کیشی‌نین یانیق باخیشی اوغلانی غملی ائله‌ییر. بیر آه چکیر. شوفیر یاواش- یاواش وئریر قیراغا. قهوه‌خانا قاباغیندا ساخلاییر. رنگی روفی گئتمیش میز صندلی دؤشه‌نیب چؤل اوزونده. اوجادان دئییر:
– ایشی اولان دوشه بیلر. بیر ربع‌دان سونرا حرکتده‌ییک. یوبانان قالاجاق یئرده. ‌ ‌ ‌ ‌ ‌ ‌
اوغلان ساکین گؤتوروب قویور صندلین آلتینا؛ دوشور یئره. شوفیر بیر استکان چایا قوناق ائله‌ییر. گؤزون تیکیر اوغلانا. معنالی باخیر. چفیه‌نن بویون بوغازی‌نین ترین آلیر. قاش‌لاری دوگونلنیر:
– آخی سن هارا، جبهه هارا ؟! منیم سن بویدا بیر اوغلوم وار؛ اوتوروب کؤلگه‌ده درسینه باخیر، کئفین چکیر.
اوغلان چایین یاری ائله‌ییبدی. بیر آز شوفیرین اوزونه دوموخور. چایین قالانین تؤکور یئره. چالپالانیر، هوپور تورپاغا. استکانی قایتاریر میزین اوستونه:
– الَلرون آغریماسین، یامان یاپیشدی. ‌ ‌ ‌
فورس ائله‌ییب میرتدانا – میرتدانا ایاق چکیر ماشینا ساری. شوفیرین باخیشی دالیجاق قالیر. اَلین اؤلچور:
– آی اوغلان سنه چای یاخچی ده‌ییر؛ سن گره‌ک بیر لیوان شوورن شربتی ایچه‌سن، داها بئینون سرینلییه.
اوغلان بوینون دیکلدیر،گؤز‌لری جوتله‌نیر چؤله. آلچاق دامخالاری گؤروب اوره‌یی ایشیقلانیر. شام‌اسبی‌نی سووشورلار. اویان بویانا باش دولاندیریر. نئچه واختدان سونرا آداخلیسین گورمگه اوره‌گی چیرپینیر. شوفیر گوز آلتی آینادان باخیر:
– سرکار هاردا دوشه‌جک‌سن؟
اوغلان سایماز دئییر:
– مشگین دروازا‌سیندا.
بورکون باشینا قویوب، ساکین گؤتوروب، گوله – گوله مسافرلره باخیر:
– هاموز یورولمیاسوز!
شوفیرنن ده گؤروشوب دئییر:
– سن ده یورولمییاسان عمی. اوغلووا دئیرسن گونه چیخماسین، یوخسا قارالار.
مسافر‌لرین گولوش سسی ماشیندان قالخیر. آهیل کیشی اووجونداکی قارا کیشمیشدن نئچه‌سین آتیر آغزینا. قاشلاری گئدیر یوخاری:
– آی ساغول اوغلوم! سؤزی آت یئره، سوز یئیه‌سی اؤزی گؤتورسون.
اوغلان ساکین آسلیر چیگنیندن. قیرواق گئدیر سعادت حامامینا ساری. قاپینی آچیب ایاق چکیر ایچری. حامامچی صندلین دالیندان دوروب اوغلاننان گؤروشور:
– یورولمییاسان قیزیل باش اوغلان، خوش گلیبسن.
اوغلان گولور:
– قیزیل باش؛ نییه قیزیل باش؟!
– هه؛ سیزین کیمین اوره‌کلی جوان‌لارا اوننان سونرا بیر سؤز یاراشماز.
هاچاری الینده اوزادیر اوغلانا ساری:
– اوچومجی ایشکافا پالتارووی قویا بیلرسن. ‌ ‌ ‌ ‌
اوخییا، اوخییا سئوینیر. حامامچی آلتدان – آلتدان باخیر، گولومسینیر، دئییر:
– خئیر اولسون، بوغلارون یامان اوینوییر؟!
اوغلان ماهنیسی‌نین دالین گلمیر؛ گؤز تیکیر یئره، گولور:
– خئیردی اینشاللاه.
ایشکافی قیفیللاییر، ریزینین سالیر قولینا. فیته‌سین دولوییر بئلینه. نئچه پیلله انیر آشاغا. سونرا ایکی پیلله چیخیر اوسته، قاپینی آچیر. ایچری‌دن بوخارلانمیش هاوا بوغلانا – بوغلانا باسیر چؤله. اوغلان قاپینی اؤرتور. ایستی سودا جانین یومشالدیر. دللکی سسله‌ییر. دللک تورباسین کؤپوکلندیریر. قویلییر اوغلانین باشینا، یاییر جانینا. دولچانی سوینان دولدوروب تپه‌دن اندیریر اوزی آشاغییا. کیسه‌نی گئییر الینه. دومه‌شیره‌نی چکیر اوستونه. اوغلانین کوره‌گینده آپاریر گتیریر. چیرک پیلتله‌نیر. اوغلان بوینون دولاندیریر دللکه ساری:
– کئشکه او بیری حاماملار تکین بورانیندا خزینه‌سی اولئیدی.
دللکین قارنی ساللانیب، ایکی قات اولوب کیسه‌نی کوره‌گی‌نین اورتاسیندا دولاندیریر. نیقیلدییا- نیقیلدییا دئییر:
– چوخ‌دا مهم بیر زاد دئییر. آنجاق دوز دئییرسن، زینال حامامی، محمدیه، ملا هادی؛ بونلارین هامیسیندا وار، بیردان سونرا.
کیشی‌‌لرین داها سسی گلمیردی. بوخارلانمیش هاوادا ایتمیشیدیلر. اوغلان دورولانیر. چؤل اوزده ایاغینا سویوق سویی توتور. دایانیر پیلله‌ده؛ بوینون اوزادیر، سسله‌ییر:
– هووووی!
بوغچاچی قاچیر، قتفه‌نی آتیر اوغلانین باشینا. بیرده فیته وئریر. اوغلان یاش فیته‌نی آچیر قوروسون؛ دولوییر بئلینه. اوزی گؤزی پؤرتوب. دومه‌شیره ایشین گؤرمیشیدی. حامامچی ائشیکدن بوغچاچینی سسله‌ییر، اودا قاپینی دیر قویوب، ایاق چکیر چؤله. انجیر جوللاب‌لاری میز اوستونده اوغلانین گؤزونه ساتاشیر. استکانین بیرین گؤتورور؛ ایکی بارماغین سالیر استکانا، انجیر‌لری تئز- تئز قویور آغزینا، سویون دا چکیر باشینا. هاچاری سالیر ایشکافا. ساکین سوروتمه‌سین چکیر قویور دیبده. اَل آپاریر ساکین ایچینه. بیر بوز ایلان قارا خطلنمیش فیشیلدییا – فیشیلدییا بوینین اوزادیر، دیلین یاپیشدیریر اوغلانین بیلنگینه. قیرواق سوروشور، ایشکاف‌لارین آراسیندا یوخ اولور. اوغلان ساغ الین آتیر سول بیلنگینه، چیغیریر. بوغچاچی پیلله‌‌لری تله‌سیهلی انیر، قاچیر اوغلانا ساری. قاپازی سالیر باشینا، چیغیرا – چیغرا اویان- بویانا گئدیر:
– ایلان، ایلان، ایلان گیریب حاماما…
کیشی‌لر فیته بئل‌‌لرینده بوغلانا – بوغلانا تؤکولوبلر چؤله. جومالانیبلار اوغلانین باشینا. بوغچاچی‌نین گؤز‌لری چیخیب کللییه. دیلی توتار توتماز دئییر:
– ایلان چوخ قالیب ساکین ایچینده، قودوز اولوب؛ قورخمالی‌دی.
اوغلان اوزی قویلی یئره دوشوب چوبالاییر. سور- سوفتی اولوب کؤمور تکین. توزلی پالتارلاری ایشکافین بیجاغیندا قالیب. آق کؤینگی‌نین قول‌لاری ساکین ایچیندن آسلانیب یئره ده‌ییر.