چئویرن: ایشیق
ترجمه: ایشیق
ایشیق

سویوق اوره‌ییمدن بئینیمه یوکسه‌لیر
سید رضا حسینی مرند

قار یاغیردی. ماشین سس‌سیزجه خیاباندا ایره‌لی‌له‌ییردی. سوروجو آتا اؤنده اوتوران اوغلویلا، دالی اوتوراجاقدا کی گلینینه گؤز گزدیریردی. اوغلانین سوسقون باخیشلاری اؤنوندن باشقاسینی سئزمیردی. دوشونجه‌لره اویوموشدو: – “منی بو قیزدان نیه آییردیلار؟ بو قیز حایات یولداشیم‌ دئمیشدیلر. آمما آتام داها دئییل…داهااااا حایات یولداشین دئییل دئیه باغیردی! من‌می حایات یولداشی سئچدیم؟ من ائولنمه‌یی بئله دوشونمه‌دیم. آرتیق ائولندیریلدیم. من کیمسه‌ایله بئله یاخین اولمادیم. آتام موبایلیمدان اونون هر ایزینی سیلدی. ندن منی ایکی ایل باشقا بیر یاشاما یؤنه‌لتدیلر؟ ندن؟ من اؤز ایچیمده یاشاییردیم. یالنیز اؤز ایچیمده…”. اوغلان قانریلیب حسرت دولو باخیشلارینی قیزا تیکدی. آما قیز سرت بیر باخیشلا اوندان اوز چئویردی. – “من دلی دئییلم. من خسته‌یم. چوخ شئی‌لری باشا دوشه بیلمه‌رم. هر ایشیم آخساقدی. یئرسیز یئره گولورم، آغلاییرام. داورانیشلاریم باشقا اینسانلاردان فرقلیدیر. بو دونیادا منه بیر گؤرو وئریلمزدن اونا آیاق باسمیشام. دئییرلر آتامین پولو بونلارین هامیسینا اوستون گلیر. سانکی سو کیرلری یویوب آپاران کیمی، پول دا منی یویوب آپاریر.”
بیر داهادا قیزا باخدی، آنجاق قیز بونون فرقینده دئییلدی. اوزگون اوغلانین ترسینه او چوخ موتلو گؤرونوردو. – “من هارا سن دلی هارا؟ اوولدن بیلیردیم یانیلیرام، آنجاق پول آدلی بیر آت میدان چاپدیریرسا بونلار اؤز دَیه‌رینی ایتیرر. هله قایین‌آتام مندن آجیقلیدی! بو منه لاپ ایلگینج! عؤمور بویو دلی اوغلوایلا نئجه یاشامالی. یاتاغی دا بئله باشا دوشموردو. آآ…باخ من یازیغین شانسینا! یاریمچیلیق آغلینا سیغیشدیرا بیلمزدی بونلاری. ایکی ایل حسرتله یاشادیم. دوغال اولاراق باشقالاریلا ایلگیله‌ندیم. پئشمان دئییلم. بوشاندیم‌دا، آنجاق بو آرادا اودوزان اونلاردی. آلدیغیم کبین عؤمور بویو منی یئتر. بونلار قالسینلار اؤز هایلارینا. اؤلورسه‌لرده، بو دلییه منه تای بیر گؤزلی تاپیلماز.” بو آن قیزین موبایلی سسله‌نه‌رک، یازیشماغا باشلادی.
آتا ماشینین گوزگوسوندن گؤزلرینی قیییب سینیرلی- سینیرلی قیزا باخیردی. – ” اوجقار یئردن بیر قیز آلیب یوخاریلارا گتیرسن بوندان آرتیق اولماز. منیم پولوم بونو قودورتدو. اؤزلویوندن اولوب، آبیریمی تؤکدو. منیم اوغلوم ساغلام اولسایدی سنی ایت یئرینه قویمازدیم. هله قالسین ائویمه گلین گله‎سن. بیر گون بو یارامازی آلمیشدیمسا، ایندیسه ساتدیم. داها یانیلمارام. بوندان آرتیق قویمارام اوغلوم اوزولسون. بیر آیریسینی تاپمیشام…” آتا دؤنوب اوغلونون اوزگون گؤزلرینه باخدی. قار دورمادان یاغیردی. ماشین‌سا اؤز یولوندا. بیر آزدان بیر داریسقال کوچه‌نین آغزیندا دایاندی. قیز موبایل‌ایلا یازیشارکن ماشیندان ائنیب کوچه‌یه ساری یورودو. اوغلان‌ قار اوستونده آیاق ایزلرینه باییلمیشدی…
گئجه یاریسی قار سورکلی یاغیردی. اوغلان ایستی اوتاغیندا تیر-تیر اسه‌رک، باخیشی پنجره‌دن آیریلماییردی. بئله بیر آنلاری یاشامامیشدی. ایللر اؤنجه، بئله بیر قیش گئجه‌سینده قیزدیرمادان آلوو توتوب یاناراق، بو گونه‌دک سؤنمه‌میشدی. یانیب، یاخیلمیشدی. آما بو گئجه آجی بیر سویوق قیزدیرمانین یئرینه اوره‌یینه چؤکموشدو. -“من چوخ آغلارام، بوگئجه گؤز یاشلاری یاد اولوب‌ منه. آغلاماق سسیمدن آنامین گلیشینی ایسته‌یه‌رم. گؤز یاشلاریمی سیلیب، منیم بو آجیناجاقلی طالئعیمه آغلاسین دئیه. حایات یولداشی ساندیغیم قیز سون گئدیشینده بیر دفه‌ده اولسون بئله باخمادی منه. من دَلی‌یم. ائله بوندان دولایی چیلغینجاسینا سئویردیم. سئومه‌یین آنلامی ندیر؟ بونلاری من باشا دوشه بیلمه‌رم. آنجاق اونو بیلیرم ایندی بوردا اولماسی چوخ یاخچی‌ایدی. اوتوروب موبایلی‌ایلا باشینی قاتمیشدی. منسه ایچدن‌لیکله اونا باخیردیم. هردن گوله‌ردیم، دانیشاردیم، یئنه منی سایمازدی. بئله بیر دوروم ساعاتلارجا سوره‌ردی. من موتلوایدیم، چوخ موتلو. او بوردایدی، چیزگیلی دونوایلا اوتورموشدو. آما گئتدی. حایاتیمدا سئویلمه‌دیم. آجیناجاقلی باخیشلار سئومک قاورامی داشیدی. بو قایغیلاردان، بو دویغولاردان یورولدوم. ایندیسه بو قارلی- قارانلیق گئجه‌ده یالنیز بوراخیلمیشام.”
قار دورمادان شَهرین اوستونو قاپسادی آرتیق. سانکی اینسان یاشاماییرمیش کیمی. اوغلان آجی دوشله‌ره دالیب، سویوق اوره‌ییندن بئینیمه ساری یوکسه‌لیردی…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سویوق اوره‌ییمدن بئینیمه یوکسه‌لیر / سید رضا حسینی مرند

ایشیق
www.ishiq.net

آذربایجان ادبیات و اینجه‌صنعت سایتی

سویوق اوره‌ییمدن بئینیمه یوکسه‌لیر / سید رضا حسینی مرند

ایشیق
www.ishiq.net

آذربایجان ادبیات و اینجه‌صنعت سایتی

سویوق اوره‌ییمدن بئینیمه یوکسه‌لیر / سید رضا حسینی مرند

ایشیق
www.ishiq.net

آذربایجان ادبیات و اینجه‌صنعت سایتی