چئویرن: ایشیق
ترجمه: ایشیق
ایشیق

اؤلوم ائوی(۳)
قاسیم پناهی

اؤنجه تبریزین هاوا لیمانینا گئتدیک. سعید آدلی کیمسه روحو چاغیرماق اوچون بیزه یاردیم ائتمه‌گه گله‌جکدی. بیر آز گؤزله‌دیکدن سونرا بیریسی تئرمینالدان چیخیب بیزه دوغرو گلدی. آشاغی_یوخاری ایگیرمی سکگیز یاشی اولاردی. ساچلارینی دیزلی کسدیرمیشدی. یاشیل کؤینه‌گینین آلتیندان بیر آغ تی‌ شرت گئییب دوگمه‌لرینی آچیق بوراخمیشدی. گونش گؤزلوگونو تی‌ شرتینین بوغازیندان آسلاییب ووقارلا بیزه ساری آددیملاییردی. زینب’له نرگیز اونو تانییر کیمی ال قالدیردیلار. گولر اوزلو اوغلان یئتیشیب هامیمیزلا سلاملاشدی. سونرا اوزونو نرگیزه چئویریب اونو باغرینا باسیب منیم جانیم نئجه دیر ؟ دئدی.نرگیز ده چوخ صمیمییتله اونو یانیتلادی. قیسقانجدان یومروقلاریمی ائله برک سیخمیشدیم کی زینب منی گؤرن کیمی اوزونون رنگی آتدی. احمد منله سعیدی تانیش ائدیب سونرا آرابانی گؤسته‌ره‌رَک گئده‌گین دئدی.
سعید باشقا بیر لوکس آرابانی گؤسته‌ریب: منیم آرابام اؤزومدن تئز چاتیب. سیز یولا دوشون، منله نرگیز ده آرخانیزجا گلیریک.
بو سؤزو سانکی سرت بیر یومروق کیمی منیم باشیما ائندی. نه‌دن بو آدام نرگیزه بو قدر یاخینلیق ائدیر آما او بیر سؤز دئمه‌ییر؟ یوخسا منیم اونا اولان دویغولاریمدان خبر‌سیز می دیر؟ یوخ نییه خبرسیز اولسون، اوت دئییل کی نئچه گوندور گؤرور منیم اونا مئیلیم وار. ایچیمده نرگیزه اونو سئودیگیمی آچیق_آشکار دئمه‌دیگیم اوچون اؤزومو دانلایاراق احمدین آراباسیندا ایلشدیم. بیر آزدان سونرا بلور ایداری_تیجاری کومپلئکسینین اؤنونده’ایدیک. بیرلیکده آرابادان ائندیک. نرگیزله سعید ده ال_اله بیزه ساری گلدی‌لر. احمد سعیدله نه‌سه آلماق اوچون بیزدن آیریلاجاقلارینی سؤیله‌دی.سونرا علاوه ائتدی کی شام ائله‌مک اوچون ساعات ۲۰:۳۰دا شهریار رئستورانیندا اولاق. اونلار بیزدن آیریلدیقدان سونرا زینب بیر آز دولانیب پالتار زاد آلماغی تکلیف ائتدی. کونولسوزجه اونلارین یانینجا آددیملاییب پاساژا گیردیم. سعیدین نرگیزه باخیشلاری بئینیمده دولانیردی. بیر آن ایسته‌دیم اونلاردان آییریلیب بیر داها عیمارته قاییتمایام. ائله بو آندا نرگیز الیمدن توتوب بیر دوکانین اؤنونه چکدی. آغ بیر سارافون گؤسته‌ریب نازلا او منه یاراشار دئیه ایشارت بارماغینی دوکانین شوشه‌سینه سؤیکه‌دی. من ده البتته کی یاراشار دئیه اونو دوکانینین ایچینه آپاردیم. گنج اوغلاندان سارافونو آلیب پرو ائتمک اوچون نرگیزه وئردیم. بیر آن سونرا کابینین قاپیسینی آچیب منی چاغیراراق یاراشیر می دئیه سورو وئردی. ایلک دفعه‌ایدی اونون اینجه اندامینی بو قدر آچیق_ساچیق گؤروردوم. باشدان آیاغا آچییلمامیش غونچایا بنزر تنینی سوزوب گولر اوزله: ایندی دوغرودان نرگیز اولدون دئدیم. بیر آن ایچینده اللرینی کابینین ایچینه اوزانمیش بوینوما آتیب دوداقلاریمی اؤپدو سونرا دا بیر گؤز ووروب قاپینی باغلا دئدی. نرگیزین بو حرکتی یئنه ده ایچیمده مین بیر سورون یاراتدی.
پاساژدان چیخارکن خاطیرلادیم کی ائویمیزه باش چکمه‌لییم. زینب’له نرگیزی باش_باشا بوراخیب گؤروله‌سی ایش‌لریم وار دئیه اونلاردان آیریلدیم. اؤنجه ائویمیزه گئتدیم. قاپینی نه‌قدر دؤیدوم کار وئرمه‌دی. ائله بیل بورایا کیمسه‌ کؤچمه‌میشدی. آقازاده‌’دن معلومات آلماق اوچون اونون دفترینه گئتدیم. هئچ کیمسه یوخ’ایدی. کاتیبه اوتوردوغو ماسانین اشیاءلارینی بیر کارتونا ییغیردی. منی گؤرجَک حیاتینی دگیشدی دئیه الینی آغزینا آتیب آغلادی. غریبه اویونا دوشموشدوم. منه یاردیم ائده بیله‌جک هر کس بیر_بیر اؤلوردو. بو اویونون سونو نه اولاجاق؟ نه‌دن بو اولایلار منیم چئو‌ره‌مده باش وئریر؟ منی بو اویونا کیم قاتدی؟ هه،آقازاده‌نین او یولداشی اولدو. شوبهم یوخدور هر شئی اونونلا باغلی دیر. من باشقا بیرینه زیان وئرمه‌دن بو ایشی بیتیرمه‌لی‌یم. احمد’ه زنگ ائله‌ییب شام پیروقرامینی کنسل ائتمه‌گی ایسته‌دیم. او دا راضیلیق وئردی.
ساعات ایگیرمی دؤرده اون بئش دقیقه قالان سعید’دن باشقا هامیمیز عیمارتین سالونوندا اوتراجاقلاری بیر ماسانین اطرافینا یوارلاق شکیلده دوزوب اوتورموشدوق. بیر آن سونرا سعید الینده شاهمات تاختاسینا اوخشار بیر شئی گتیریب ماسانین اوستونه قویدو. سونرا دئدی کی بونون آدی وی‌یا تاختاسی دیر و اونلا روحو چاغیراجاق. بیزدن ده ایسته‌دی کی ایشاره ائتدیگی واخت او دئین‌لری قورخمادان تکرار ائد‌ک. ساعات ۲۴:۰۰ تامامدا لامپالاری سؤندوردوک. هر یئر قارالدی، تکجه ماسانین اوزرینده‌کی شام اطرافینا ایشیق ساچیردی. سعید هامیمیزی سس‌سیزلیگه دعوت ائدیب نه‌سه پیچیلداماغا باشلادی. سونرا دوعالار اوخودو. بیز ده گؤزلریمیزی یوموب اونونلا بیرلیکده سؤزلرینی تکرار ائدیردیک. بیردن دیواردان بیر شئی یئره دوشدو. سعیدین اوجا سسله سن روح‌موسان؟ دئدی. سسینه گؤزلریمیزی آچدیق. بیر آندان سونرا وی‌یا تاختاسینین اوزرینه قویدوغو نلبکی ترپه‌نیب بلی اوستونده دایاندی. سعید یئنه اوجا سسله، سن ائرکک می‌سن؟ سوردو. یئنه ده نلبکی ترپه‌نیب بلی اوستونده دایاندی. سعید اوزونو منه چئویریب ،بیر شئی می سوراجاقسان؟ دئدی. باشیمین ایشارتیله هه دئدیم. تیتره‌ین اللریمین ایچینی ماسانین اوستونه داها سرت باسیب بیزدن نه ایسته‌ییرسن سوردوم. اوشاقلار قورخو دولو گؤزلری‌ایله بیر_بیرینه باخیب سونرا باخیشلارینی وی‌یا تاختاسینا تیکدی‌لر. سعیدین الیفبا حرف‌لرینین اوستونه قویدوغو داش ترپه‌نیب سیرایلا ‘ ق’ ، ‘ ا ‘ و ‘ ن ‘ حرفینین اوستونده دوردو. زینب قورخوسوندان اؤزونو احمدین قوجاغینا آتاراق باغیردی. نرگیزین ده گؤزلرینین یاشی سوزدو. سانکی بیر ال قارنیمین ایچینی بوروشدوروردو. دوشگون سسله کیمدن ایسته‌ییرسن؟ سوردوم. بو دؤنه هئچ بیر ایشارت گلمه‌دی. بیر داها سوردوم ، یئنه ده هئچ بیر ایشارت گلمه‌دی. سعید تاختانی گؤتوروب علاقه کسیلدی ، بیر ده صاباح آخشام سیناماق اولار دئدی. قیزلار آغلایاجاقلار کیمی سعیده باخیردیلار. احمد باخیشلارینی بیر یئره تیکیب دوموخوب قالمیشدی. سعید یئریندن قالخیب لامپالاری یاندیردی.
احمد ایندی نه ائده‌جه‌ییک دئیه سورو وئردی. بیردن ایکینجی قاتداکی اوتاقلاری خاطیرلادیم. کیمسه سسینی چیخارمادان تئز دئدیم: نه ائده‌جه‌گیمیزی من بیلیرم.
هامیسی منیم سؤزومون آردینی گؤزله‌‌ییردی. او گون آیاق سسینین منی ایکینجی قاتدا اوتاقلارین قارشیسینا چکدیگینی سؤیله‌دیم.
سعید ـ بو بیر سیقنال اولا بیلر.
زینب ـ آنجاق ایندی تهلوکه‌لی دیر.
ـ آما من بیر داها او اوتاقلارا گیرمه‌لی‌یم.
احمد ـ من ده سنله گله‌جه‌یم.
قیزلار واز کئچدیرمک اوچون چالیشدیلار آنجاق کار وئرمه‌دی. بیز بو تاپماجانی چؤزمه‌گه قرار وئرمیشدیک.
احمدین وساییل‌لارینین ایچیندن بیر قووه چیراغی تاپیب ایکینجی قاتا قالخدیق. پیلله‌کنلرین بیتدیگی یئرده دایانیب قارانلیقدا بوغولموش دیبی گؤرونمه‌ین سالونا باخدیق. احمد منه باخاراق هانسی دیر دئدی. الیمین ایشارتیله سالونون قورتاراجاغینی گؤسته‌ردیم. فنارین ایشیغینا آستا_آستا ایره‌لی گئدیردیک بیردن قاچماق سسی گلدی. سس بیز گئدن یؤنه ساری قاچیردی. بیر آز آیاق آلدیق. آرتیق اوتاقلارین اؤنونده’ایدیک. کیمسه الیمدن توتوب سوروتله‌یه‌رَک قیرمیزی اوتاقلی قاپییا ساری چکدی. باغییرتیما احمد اؤزونو توللاییب منیم یئرله سورونن آیاقلاریمی توتدو. آنجاق گؤرونمه‌ین کیمسه ایکیمیزی ده چکیب اوتاغین ایچینه توللادی. قاپی باغلاندی. اوتاق بیر_بیریمیزی گؤره بیلمه‌یه‌جگیمیز قدر قارانلیق’ایدی. اللریم پاییز یارپاقلاری کیمی اسیردی. چتینلیکله سسیمی چیخاریب بورادا می‌سان؟ دئدیم. احمد داها دوشگون سسله هه دئدی. قالخیب قاپینی آچماغا چالیشدیم آنجاق آچیلمادی. قاپینی دؤیه‌رَک سعیدی چاغیردیم. احمد ده منله بیرلیکده سعیدی سونرا دا زینبی چاغیردی آنجاق اونلاردان هئچ بیر خبر اولمادی. سانکی سسیمیزی ائشیتمه‌ییردیلر. آرخامی قاپییا سؤیکه‌ییب اوتاغا دؤندوم نه‌سه اوزومه ساری گلیردی بیر آز اگیلیب بوروق وئردیم. اوزون ساپلی بیر قمه قاپییا ساپلاندی آردینجا تاواندان آسیلمیش نه‌سه یئره دوشدو. بیردن هر یئر اود توتدو. احمد باییلاجاق کیمی قاپییا سؤیکه‌نیب قالمیشدی. اوزونه بیر شیلله ووردوم اؤزونه گلدی. اودون ایشیغینا هر یئری گؤرمک اولوردو. تاواندان چئشیدلی قوشلار اؤلوسو، قویون جمده‌گی و آدام باشی ساللانیردی. اوتاغین اورتاسیندا‌کی ماسانین اوستو آل قانا بویانمیشدی. اوسته‌لیک ایکی اوچ قمه و بیر بالتا دا اوزرینه ساپلانمیشدی. دیوارلار ، پنجره‌لر ،تاوان و اوتاقدا اولان بوتون اشیاءلارین اوزرینده قان وار’‌ایدی. بو گؤرونتونو گؤره‌رکن آز قالدیم قوسام. آیاقلاریمین اوستونده چتینلیکله دایانمیشدیم. احمد بوتون گوجویله قاپینی دؤیوب یاردیم ایسته‌ییردی آنجاق هئچ کیمسه‌ سسینی ائشیتمه‌ییردی. اود داها آلوولانمیشدی. آرتیق ایستی اوزوموزو قارسیردی. توستو بوغازیما دولموشدو. گؤزلریمی یوموب بیر باشا اؤسگوروردوم. آیاغیما توتاجاق کیمی بیر شئی دگدی. موکئتی چکیب بیر طرفه آتیب توتاجاقدان یاپیشیب قالدیرماغا چالیشدیم. بیر ایکی دؤنه یوخلادیم چوخ برک قاپانمیشدی. بوتون گوجومو قوللاریما ییغیب بیر داها چکدیم. جیریلتی سسیله اوتاغین آلتینا گئدن بیر یول آچیلدی. یئردن فنری قاپیب احمدی چتینلیکله قالدیریب پیلله‌کن‌لردن آشاغی ائندیردیب آردینجا اؤزوم ده ائندیم. سرداوادا فنرین ایشیغی بیر_ایکی مئتیر اویانلیغی گؤسترمیردی. قاباغا دوشدوم آرخامجا احمد الینی دیوارا سورته‌رَک آددیم آتیردی. آدامین بئینینی چاتلادان ایرین قوخوسو نفس آلماغیمیزی برکه سالمیشدی. بیر آز گئتدیکدن سونرا آیاغیمین اؤنونده بیر قادین اسکئلئتی گؤردوم. آرتیق قورخویا آلیشمیشدیم بو گؤرونتو منی هئچ ده شاشیرتمادی آنجاق احمد گؤرونجه باغیریب آرخادان اللرینی بئلیمه دولادی. اونو بیر آز ساکینلشدیریب آددیملادیم. نفسیمیز کسیلن زامان بالاجا بیر قاپییا چاتدیق قاپی ائشیگه آچیلیردی. بیرلیکده نئچه آددیم دالی گئدیب قاپییا سرت تپیک سالدیق دارانق سسیله قاپی آچیلدی. عیمارتین دال طرفیندن ائشیگه چیخدیق. اللریمیزی دیزیمیزه سؤیکه‌ییب ایکی قات اولوب نفسیمیزی دردیک سونرا عیمارتین اؤنونه طرف قاچدیق. بؤیوک قاپینی آچیب ایچه‌ری گیردیک. قاپینین سسینه اوشاقلار قورخوب بیزه ساری دؤندولر. بیزی گؤرونجه شاشیریب قالدیلار.
سعید ـ سیز یوخاریدا دئییلسیز ؟
نرگیز ـ هاردان چیخدینیز ائشیگه؟
زینب ـ اوز_گؤزونوز نییه قارالیب؟
احمدله بیر_بیریمیزه باخیب اونلارا یاخینلاشیب ایکی کیشیلیک مئبئلین اوستونده اوتوروب بوتون اولایلاری اونلارا دانیشدیق. سونرا حله‌لیک بیر داها ایکینجی قاتا کیمسه‌نین چیخمایاجاغینا قرار وئردیک.
صاباح تئزدن یوخودان آییلیب پالتارلاریمی دگیشیب عیمارتین ائشیگینه چیخدیم. نرگیز ائیواندا اوتورموشدو. یانیندا اوتوروب تئز دورموسان دئیه سورو وئردیم.
نرگیز ـ هه یوخوم گلمیردی. هاوا چوخ گؤزل دیر.
اؤزومه اوره‌ک وئریب الیمی بوینونا آتدیم. هه گئرچکدن ده.
نرگیز هئچ تپکی گؤسترمه‌دی. اؤزومه بیر آز داها اوره‌ک وئردیم.
ـ سعید کیمدیر؟
نرگیز ـ داییم اوغلو.
ـ سئویرسن‌می اونو؟
گؤزلریمه باخیب گولومسه‌یه‌رَک ، قیسقانیرسان‌می؟ دئدی .
یئنه ده جان آلان گولومسه‌مه‌سی جانیما اود آتمیشدی آز قالیردیم ال آیاغیمی ایتیرَم.
ـ سئون قیسقانار.
نرگیز ـ بس منی سئویرسن؟ نییه دئمیردین؟ سئودیگینه امین اولماق اوچون سعیدله رول اویناییردیق.
بیر آز گؤزلرینین ایچینه باخیب ساچلارینی تومارلادیم سونرا یاناغیندان اؤپوب امین اولدون مو دئدیم. او دا گوله‌رَک هه دئدی.
ـ من کنده گئتمه‌لییم. سونرا گؤروشه‌ریک.
نرگیزـ نه‌یه؟
ـ او گون مسجیدین اؤنونده بیر آغ ساققال گؤردوم. ایچیمدن بیر سس دئییر او بیزه یاردیم ائده‌جک.
نرگیز ـ بس من ده گلیرم. دؤز گئیینیم.
بیر آزدان سونرا نرگیزله برابر عیمارتین اؤنونده‌کی دؤنگه‌دن ائنیب کنده ساری گئتدیک. همین آغ ساققال مسجیدین اؤنونده اوتوروب تسبئح چئویریردی. یاخینلاشیب سلاملاشدیق. دانیشارکن ایسته‌مه دن سؤزجوک‌لرین بیر سیراسینی اوزالدیردی. باشیمیزا گلن هر شئیی اونا دانیشیب یاردیم ایسته‌دیم. کیشینین قیریشمیش بنیزی آغ آپپاق اولدو. کوتونون جیبیندن بیر مندیل چیخاریب گؤزلرینین بوجاغینی سیلدی. سونرا اوره‌گه یاتان یوموشاق سسله دانیشماغا باشلادی.
قوجا ـ خانین ایکی اوشاغی وار’ایدی. بیر قیــز ، بیر اوغلان. قیزین آدی نرگیز، اوغلانین آدی آراز’ایدی. ایکی ائرمنی قوللوقچوسو دا وار ایدی. قیزلا من یاشــید”ایدیق.اونو چوخ سئویردیم. هردن اونو گؤرمک اوچون ائوین اطرافیندا دولاناردیم. بیر گون نرگیز منه یاخینلاشیب قوللوقچولاردان قورخدوغونو سؤیله‌دی. او گوندن ایشیم ائوین اطرافیندا دولانماق اولدو.
قوجا درین بیر نفس آلیب داوام ائتدی.
بیر نئچه گوندن سونرا قوللوقچو آرسئنی مئشه‌ده کیمسه‌یه دوزاق قوردوغوندا گؤردوم. سس‌سیزجه بیر یئرده گیزلندیم. کندلی‌لردن تانیدیغیم بیری مئشه‌دن اودون آپارماغا گلمیشدی. آرسئن اونو ایزله‌ییب یاواش_یاواش اونا یاخینلاشدی. سونرا قارتال اوونا شییغییان کیمی کیشییه سالدیریب الینده‌کی بالتانی باشینا ائندیردی. اوندان سونراسی یادیما گلمه‌دی بیر آن اؤزومه گلیب گؤردوم گئجه اولوب. سونرالار بیلدیم ائرمنی آرسئن’له حیات یولداشی سیروارت ایبلیسه تاپینیبلار و اللریندن گلن هر تورلو جینایتی ائدیرلر.
قوجا دانیشاراق بیر الینده تسبئح چئویریب بیر الیله ماوی مندیلی‌ایله گؤزلرینی سیلیردی. مندیلی جیبینه قویوب بیر قوتو سیقارئت چیخاریب اوووجونون آراسیندا کیبریتله آلیشدیریب داوام ائتدی.
بیر گون ائوین یانیندا بارماقلیقلارین آراسیندان نرگیزی آختاراندا غریبه بیر اولایلا قارشیلاشدیم. خانلا حیات یولداشی آت آراباسینا مینیب هاراسا گئتدی‌لر. آراز آرابانین آرخاسینجا قاچیردی بیردن آرسئنی گؤروب اولدوغو یئرده دیک دوردو. آرسئن یاخینلاشیب اونون قولاغیندان یاپیشیب سوروکله‌یه‌رک ائوه ساری آپاردی. چاشیب قالمیشدیم او نئجه اورک ائله‌ییب خانین اوغلونون قولاغیندا توتموشدو!!
بیر نئچه ساعات سونرا نرگیزله بولوشدوق. آتا _آناسینین شهره قوناق گئتدیک‌لرینی سؤیله‌دی و دئدی‌ کی اونلار اولمایاندا آرسئنله سیروارت اونلاری اؤلدورمک ایسته‌ییرلر. من نرگیزه خانین آرخاسینجا گئده‌جه‌گیمی سؤیله‌دیم آنجاق او بو ایشه راضیلیق وئرمه‌دی. دئدی آتاسی دؤنرکن هر شئیی اونا دئیه‌جک.
اوندان سونرا نرگیزله بولوشا بیلمه‌دیم. سونوندا خان گلدی. ائوده قوللوقچولاردان خبر یوخ‌ایدی. خان اوشاقلارین تیکه‌تیکه دوغرانیلمیشین ائوده تاپمیشدی. من خبری ائشیتدیگیمده خانین یانینا گئدیب هر شئی اونا سؤیله‌دیم. بیر نئچه آتلی گؤندریب اونلاری یئرده ده گؤیده ده اولسالار تاپیب گتیرمه‌لرینی بویوردو. ایکی گون سونرا آتلیلار اونلاری گتیردی. خان سرداوا دا سیروارتی آغیر ایشکنجه آلتیندا اؤلدوردو. سونرا دا آرسئنی مئشه‌یه آپاریب موتورلو میشارلا دوغرادی. آنجاق بو سون اؤلوم اولمادی. آرسئن خانلا حیات یولداشینی دا اؤلدورمک اوچون ائوی طیلسیمه سالمیشمیش. خان ائوه دؤندوگونده حیات یولداشی اؤزونو سرداوادا آسمیشدی. او گوندن خان یوخ اولدو. بیر داها اونو کیمسه گؤرمه‌دی. ایل‌لر سونرا خبر چاتدی خان تورکیه‌ده حیاتینی ایتیریب.
قوجا سؤزونو بیتیردی آنجاق من حله‌ده گؤزومو اوندان چکه بیلمیردیم. هئچ اؤزومده دئییلدیم. ایچیمده‌کی سورغولار بئینیمی پارتلاتماغا آز قالمیشدی. من بو اویونون هاراسیندایام؟ نه‌دن من بو ائوه گتیریلدیم؟ خانین اوغلو منله، قیزیسا سئودیگیم قیزلا آدداشمیش! بو نئجه اولور؟…
نرگیزین سسیله اؤزومه گلدیم.
نرگیز ـ منیم آتاملا_آنامدان بورالی‌ایمیش. آنام مئشه‌ده اؤلوب. آتام دا بیزی گؤتوروب آمئریکایا قاچیر. سونرا…
قوجا نرگیزین سؤزونون آراسینا گیردی.
قوجا ـ رحمتلیک آنان دا ، آتان دا و بیر چوخ آداملار آرسئنین الیله اؤلوب‌لر.
ـ بس منه بو ائوی وئرن کیشی؟
قوجا ـ سنله بو ائوین علاقه‌سینی بیلمیرم آنجاق طیلسیمین باطیل اولماسی اوچون بو ائوده سون بیر دفعه بیری اؤلمه‌لی دیر. دئدیگین آدام بلکه ده خانین روحو’ایمیش سنی بورایا گؤندریب اؤلولرین روحونو سربست بوراخاسان. طیلسیم باطیل اولمایینجاق بو اولایلارلا ایلگیده اولان هر کس بیر_بیر اؤله‌جک. یازیق صمد….
بیر آن گؤزلریمی نرگیزه ساری چئویردیم. ایشارت بارماغینی دیشلریله چئینه‌ییردی. باییلاجاق کیمی گؤزلرینین قاراسی ایتمک اوزرینده‌’ایدی. تئز آیاغا قالخیب نرگیزین بیر الینی بوینوما آتیب قولتوغونا گیریب قوجا’ایله ساغ اوللاشیب اورادان اوزاقلاشدیق. کند’دن ائشیگه چیخیب عیمارتین دؤنگه‌سینده یولون قیراغیندا‌کی بؤیوک بیر داشین دیبینده اوتوردوق. نرگیز اؤزونه گلمیشدی. گؤزلریمه زیلله‌نیب گولومسه‌دی.
نرگیز ـ قورخورسان؟
ـ اؤزومدن یوخ،باشقا بیریسینی ایتیرمکدن قورخورام.
نرگیز ـ من ده.
ـ قوجانین سؤزلرینین فرقینده اولدون مو؟ خانین اوشاقلاری بیزله آدداش’ایمیش.
نرگیز ـ منجه بو دوگون بیریمیزین الیله آچیلمالی دیر.
نرگیز بیردن چیخیش یولو بولموش کیمی باغیردی: آراز تاپدیم!
ـ نه؟
نرگیز ـ دور، تئز ائله. عیمارته گئدیب بیر داها دون آخشام‌کی اوتاغا گیرمه‌لیییک.
ـ آنجاق، اورا چوخ تهلوکه‌لی دیر.
بیز سون دفعه اورایا گیره‌جه‌ییک.
آیاغا قالخیب نرگیزله ال_اله وئریب عیمارته دوغرو یولا دوشدوک. اورایا چاتدیغیمیزدا هاوا قارالمیشدی. بؤیوک قاپینی آچیب ایچه‌ری گیردیک. اوشاقلار دئیینه‌رَک اوستوموزه توکولدو.
احمد ـ سیز هارداسیز؟
زینب نرگیزی باغرینا باساراق: مین بیر خیالا دوشدوم…
سعید ـ ایپ اوجو تاپدینیز می؟
اوزومو سعیده توتاراق·سن هاردان بیلدین ایپ اوجو تاپماق پئشینده‌ییک؟
سعید گوله‌رک: قورخما، سحر ائرکن ائیواندا نرگیزله دانیشاندا ائشیتدیم. من روح زاد دئییلم.
هر شئیی اونلارا دانیشدیقدان سونرا بئله قرارا گلدیک نرگیزله من بیر داها ایکینجی قاتدا‌کی اوتاغا گیرک. ایچیمده کئچن دؤنه‌کی قورخودان خبر یوخ‌’ایدی. نرگیزه فیکیر وئردیم ائله بیل اونون دا قورخوسو تؤکولموشدو. احمدین قووه چیراغینی گؤتوروب پیلله‌کن‌لری یوخاری چیخدیق. سالونون دیبینه قدر یاواش _ یاواش یئریدیک. غریبه‌ دیر بو دؤنه سیقنالدان خبر اولمامیشدی. ایکی اوتاغین اؤنونده نرگیز اوزونو منه توتوب هانسی دیر دئیه سورو وئردی؟
هانسی اوتاغا گیرجه‌گیمیزی دوشوندوگومده بیردن قیرمیزی قاپی یارییا قدر آچیلدی. اؤنجه من، آرخامجا دا نرگیز اوتاغا گیردی. اوتاق قاپ_قارانلیق’ایدی. قاپی آچیلدیغی کیمی ده اؤرتولدو. نرگیز منه یاخینلاشیب قولوما ساریلدی. اوتاقدان یاواش _یاواش اینیلتی سسی قالخدی. بیر آن سونرا اؤنجه ائشیتدیگیم اوغلان اوشاغینین گولمک سسی ده اوجالدی. سونرا بیر قیزین سیزیلتیسی، سونرا بیر کیشینین باغیرتیسی، سونرا موتورلو میشار سسی بیر بیرینه قاریشدی. کیمسه‌ بیزه یاخینلاشدی. آیاق سسی اطرافیمیزدا بیر نئچه دؤنه دولانیب دیوارا ساری گئتدی. قووه چیراغینین ایشیغینی آردینجا سالدیم. دیورا قیرمیزی بویا’ایله اگری_بویرو جیزگی’ایله قان یازیلیدی.سونرا آلتیندا یا سن یا نرگیز یازیلدی. نرگیز اللرینی بئلیمه دولاییب یاواشجاسینا آغلاماغا باشلادی. بئینیمده مین‌لرجه فیکیر دولانیردی. نرگیزین باشینی دؤشومه باسیب ساچلارینی تومارلایاراق سن اوتاقدان چیخ دئدیم.
نرگیز آغلایاراق تیترک سسله:یوخ، یوخ.
بیردن اوتاغین دیبیندن قولاقلاریمی کار ائدجک قدر برک سس قالخدی. یئنه ده دون گئجه‌کی کیمی اوتاغی آلوو بورودو. بیر پیچاق گلیب قولوما ساپلاندی. باغیراراق یئره دوشدوم. نرگیز ده باغیراراق باش اوجومدا اوتوردو. بیر آندا نرگیز یونگول قولچاق کیمی قالخیب دیوارا زوپاندی. آلوولانمیش ماسانین اوستوندن بیر بالتا قالخیب فیرلاناراق منه ساری گلدی. چتینلیکله بوروق وئردیم. بالتا یئرین پارکئتینه ساپلاندی. آرتیق هر یئری آلوو بوروموشدو. بیر جوت ال بوغازیما کیلیدله‌نیب سیخماغا باشلادی. بیر آندا نفسیم دارلیق ائتدی. نه قدر چالیشسایدیم کار وئرمیردی. بوغولماق اوزرینده‌یدیم. سون نفسیمده نرگیزی گؤرمک اوچون چتینلیکله گؤزلریمی اوتاقدا دولاندیردیم. نرگیز پنجره‌نی آچیب قیراغینا چیخمیشدی. منه ساری دؤنوب آغلایاراق باغیردی.
نرگیز ـ آراز سنی چوخ سئویرم.
سونرا اؤزونو پنجره’دن آشاغی توللادی. بیر آندا دوروم نورمالا چئوریلدی. نه اوتاقدا آلوو ، نه بوغازیمی سیخان ال’ایله قولوما ساپلانان پیچاق، نه گؤرمه‌گی چتین ائدن قارانلیق، نه ده اطرافدا قان ایزلری وار’ایدی.
یووووخ دئیه باغیریب پنجره‌یه دوغرو سیچیرادیم. نرگیزین آغ شالی یئلله‌نه‌رَک آشاغی دوشوردو.
سون

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اؤلوم ائوی(۳)/ قاسیم پناهی

ایشیق
www.ishiq.net

آذربایجان ادبیات و اینجه‌صنعت سایتی

اؤلوم ائوی(۳)/ قاسیم پناهی

ایشیق
www.ishiq.net

آذربایجان ادبیات و اینجه‌صنعت سایتی

اؤلوم ائوی(۳)/ قاسیم پناهی

ایشیق
www.ishiq.net

آذربایجان ادبیات و اینجه‌صنعت سایتی