چیبین
افسر عباسی تقی دیزج (افشار)

هاوادا بیر تور آتیب گئنه گلیب اوزونه قوندو. بیرینین باشینا قیشقیرارجاسینا؛ «اَل چک سیرتیق!»- دئدی و الینی هاوایا توللادی، آما بوشا کئچدی. چیبین گئنه اوزونه قوندو. دیلسیز آغیزسیز چیبین‌له باش باشا قویماقدان اؤزونو کیچیک دوشورموشدو. بو سفر اَلی ایله چوخ یاواش چیبینی اوزاقلاشدیردی. چیبین اوتاغین اوزوناسین دولانیب گلدی. گؤورچین قوشو کیمی صاحیبینه دؤنوردو. آرالاریندا بیر انسیت باغلانمیشدی سانکی.
قالخیب توالته گئتدی، آینادا اوزونه باخدی. دهشته قاپیلدی، بو نه ایستیر مندن آللاهیم؟ الینی اوزونه چکدی. بیر قابارتی حیس ائتمه‌دی، تکرار آینایا باخدی. چیبین اوزونده اوتورموشدو. ایکی اَلی ایله اوزونو اؤوکه‌لدی، سو ووردو، گئنه ده آینایا باخدی. اوره‌ک چیرپینتیلاری آرتدی.
تئز سویونوب حاماما دوشدو. سویون آلتیندا اؤزونو یومایا باشلادی. اوزونو صابونلا لیف‌لدی، سویون فشارینی آرتیردی و اوزونه توتدو. دووارا باخدی. گؤزله‌ییردی صاحیبینی!
الینده کی صابونو دووارا تولازدادی. صابون دووارا دگیب اؤزونه قاییتدی، باشینی چکدی و صابون یئره دوشدو. چیبین یئرینی دگیشتیرمیشدیر و اَللری ایله باشینی تومارلاییردی. گؤزونو چیبیندن آییرمادان حامامدان چیخیب قاچماغا چالیشدی. قاپینی اؤرتدی و چیبینی حامامدا حبس ائتدی.
آرتیق اوزونده بیر شئی حیس ائتمیردی. قاشینما حیسی یوخ ایدی، سینیرلرینه بیر شئی دوخونموردو. حامامدان چیخیب، قورولاندی. بیر آز یئریدی داها سونرا بیرینین اوستونه قوندو…