قاتیل‌لر
فیروز مصطفا- کؤچورن: زکیه ذولفقاری
اوللر بو قدر دوغما اولدوقلارینی بیلمیردیلر. واخت کئچدیکجه هر شئیی تدریجن آنلاماغا باشلادیلار. دئمه، باجی قارداش ایمیشلر. اونلار بیر بیری ایله سسسیزجه، یالنیز اؤزلرینین باشا دوشدویو بیر دیلده “دانیشیردیلار”. قارداش چوخ دجل ایدی، دینج دورماغی خوشلامیردی. باجی ایسه اؤز ساکیت “حوجره‌سینده” دینجلمگی سئویردی. قارداش اؤز باجیسی اوچون نسه خوشاگلن بیر شئی ائتمک، ان آزی اونا ایلتیفات گؤسترمک، اونون قوللوغوندا دورماق ایسته‌ییردی. آما هله لیک بونو باجارمیردی. داها دوغروسو، بونا ایمکانی چاتمیردی. اونلار قونشولوقدا، لاپ ائله بیرلیکده اولسالار دا هله ال اله توتوب اوز اوزه دایانا بیلمیردیلر. هره‌سینین اؤز عالمی، اؤز “یوواسی” واردی. آما ایکیسی ده دوغما و یاخین اولدوقلارینی دایم حیس ائدیردیلر.
اونلار حیس ائدیردیلر کی، هاراداسا، بیر قدر اوزاقدا، هله‌لیک اونلارین سسی چاتمایان داها گئنیش، داها ایشیقلی بیر عالم وار.
اونلار امین‌ایدیلر کی، گونلرین بیر گونو همین او گئنیش عالمه چیخاجاق، همین او ایشیقلی دونیایا قدم باساجاقلار. دئیه سن، او گون یاخینلاشماقدا ایدی. اونلار تله‌سیردیلر. اونو دا اولدن دویوردولار کی، او گئنیش، او ایشیقلی عالمده اونلاری گؤزله‌ینلر وار.
سون واختلار اونلارین ایستی، ایلیق “یوواسینا” بیر سویوقلوق چؤکمکده ایدی. دوزدور، اونلار هله ایستی سویوغون نه اولدوغونو دوز عمللی بیلمیردیلر. آما اؤز کیچیک ووجودلاری ایله حیس ائدیردیلر کی، اونلارین هوسله، حسرتله گؤزله‌دیکلری ایشیق گئت گئده اوزاقلارا چکیلمکده‌دیر. سانکی کیمسه او ایشیغی اوغورلاماق ایسته‌ییردی. اونلارسا بو ایشیقسیز یاشایا بیلمزدیلر….
– اونو ردد ائله گئتسین.
– واللاه، اوره‌گیم گلمیر.
– اوچو وار، بسیمیزدیر. بیری ده بو یاندان گلمک ایسته‌ییر. کیمدیر اونو ساخلایان؟ آغیر زمانه‌دیر، چؤرک چاتدیرماق اولمور.
– آللاه یاراتدیغینین روزیسینی اؤزوندن قاباق وئریر.
– بوش بوش دانیشما. بورادا آللاهلیق بیر ایش یوخدور. دئدیم، ردد ائله گئتسین…
– یئددی آیلیقدیر…
– لاپ اولسون دوققوز آیلیق.
– یئکه اوشاقدیر… اوره‌گیمین آلتیندا ترپه‌نیر… لاپ نفه‌سینی ده حیس ائدیرم…
– نه اولسون کی؟
– من اونو محو ائدیم؟ اؤز اوشاغیمین، اؤز بطنیمده کی کؤرپه‌نین قاتیلی اولوم؟ آللاه بونو باغیشلاماز منه…
– یئنه باشلادین؟ یئنه آللاه بنده صؤحبتی؟ –
– آخی…
– معناسیز شئیلر دانیشیرسان، واللاه. حاضیرلاش، صاباح قونشونون ماشینیندا آپاراجام سنی شهره. اورادا تانیش حکیم وار. دوغراییب آتسین…
– گوناها باتارام…
– نه گوناه؟ بیم تکجه بیزیک بو جور گوناها باتان؟ بیم گؤرونمه‌میش ایشدیر؟ بونو هامی ائله‌ییر کی… اوندا بوتون دونیا گوناه ایچینده‌دیر کی… یاخچی کی، بو باره ده جینایت مجلله‌سینده بیر شئی یوخدور. بلکه ده وار، منیم خبریم یوخدور… حاضیرلاش. صاباح گئدیریک…
– آخی…
– آخیسی زادی یوخدور. بیزیم نییمیزه لازیمدیر بیر چتن کولفت؟ ائله اوشاق دوغوب تؤرتمک بو کاسیبلارین آلنینا یازیلیب دئیه سن. باخ گؤر بو وارلیلارین، میلیون قازانانلارین نئچه اوشاغی وار؟ بیر یا، اوزاقباشی، ایکی… آما بو کاسیب بدبخت… منیم بؤیوک کولفتی ساخلاماق ایمکانیم هاراداندیر؟ فهله‌یم، داش یونانام، ناظیر زاد دئییلم کی… بیر الیمه باخ، گؤر نه گونده‌دیر، لاپ یونولمامیش داش پارچاسینا اوخشاییر…
– سن منی آنلاماق ایستمیرسن…
– سن ده منی…
…
سویوق. ظولمت. سوکوت.
اوللر حیس ائدیردیلر کی، اونلاری دویان، اونلاری بیر قدر، اوزاقدان دا اولسا بئله، اوخشایان بیر ال وار. ایندی بو ال ده سویوموشدو سانکی.
باجی اؤز عالمینده ایدی: او، اؤزونون ساکیت “یوواسیندا”آرین آرخایین”دینجه لیردی – “.
قارداش نسه ناراحات ایدی: اونون دینجلمک فیکری یوخدو، اتجه بالا قوش کیمی چیرپینیردی.
بیر دفعه بوغوق بیر اوغولتو ائشیتدیلر. سانکی اونلاری هاراسا، اوزاق، اوزاق اولدوغو قدر ده قارانلیق بیر یئره آپاریردیلار.
اونلار، قارداش و باجی، ایشیغا چیخماق ایسته‌ییردیلر. بس هارادا ایدی او ایشیق؟ نییه گؤرونموردو؟ عکسینه، اونلار ظولمته دوغرو اوزوردولر. اونلارین هر ایکیسی یئرلرینده ترپنمه‌یه باشلادیلار…
سونرا اوغولتو کسدی…
یئنه سوکوت.
آز سونرا اینیلتی ائشیدیلدی.
اوزاقدا سویوق بیر شئیین ایشیلتیسی دویولدو. یوخ، بو، اونلارین چوخدان بری گؤزله‌دیکلری ایشیق دئییلدی. او سویوق ایشیق، او سویوق پاریلتی اؤزو ایلنسه بیر فلاکت گتیرمکده ایدی. بو، لاپ آیدین حیس اولونماقدا ایدی.
اونلارین جانیندان بیر اوشوتمه کئچدی.
قارداش بیر زامان اؤز باجیسی اوچون نسه ائتمک، اونا نسه اؤزونون ده بیلمه‌دیگی خوش بیر ایلتیفات گؤسترمک ایسته ییردی.
دئیه سن، ایندی بونون واختی گلیب یئتیشمیشدی.
اینیلتی گئت گئده آرتماقدا ایدی.
اونون اؤز باجیسینا “کؤمک ائتمک” زامانی یئتیشمیشدی. باجیسینین قورخویا دوشدویونو آشکارجا حیس ائدیردی. قیز “یووانین” لاپ “درینلیگینه” چکیلمیشدی. قارداش اونو سانکی یاخینلاشان مودهیش فلاکتدن قوروماق اوچون ایره‌لیگه دوغرو دارتیندی. هر نئجه اولسا دا او، اؤزونو باجیسیندان قوچاق و جسارتلی حساب ائدیردی.
ایندی اینیلتی قیشقیریغا چئوریلمیشدی.
سویوق پاریلتی یاخینلاشماقدا ایدی.
هر طرف قیرمیزی رنگه بویانمیشدی. اونلار رنگلری هله تام آیدینلیغی ایله سئچه بیلمسه‌لر ده حیس ائدیردیلر کی، بو، اونلارین چوخدان بری گؤزله‌دیکلری ایشیغین رنگی دئییل. بو، نسه باشقا ایشیق ایدی. اصلینده، بو، سویوق ایشارتینین گتیردیگی بیر رنگ، قان رنگی ایدی. بو، لاپ یاخیندا اولان، اونلارا دوغرو سورونن فلاکتین رنگی ایدی.
ایندی اونلار، قارداش و باجی، ال اله وئریب بو قارانلیق عالمدن خیلاص اولماق ایسته‌ییردیلر، آما اونلارین اللری بیر بیرینه چاتماییردی.
ایندی اونلار آغیز آغیزا وئریب قیشقیرماق ایسته ییردیلر، آما اونلارین سسی بیر بیرینه یئتمه ییردی.
سویوق پاریلتی اولجه اونون، قارداشین سینه سینه دیرندی. نسه خیرچیلدادی.قارداش لاپ”درینلییه” چکیلمیش باجیسینین چیرپیندیغینی آیدینجا حیس ائدیردی. داها سونرا بو سویوق ایشارتی درینلیی، باجینین سیغینیب تیتره دیگی “یووایا” دوغرو سورونمه‌یه باشلادی…
بایاقکی قیشقیریقی و اینیلتینی هیچقیریق عوض ائتمیشدی…
…
– یوخ، آللاه بو گوناهی باغیشلامایاجاق…
– یئنه ده آللاه؟ آللاهینا شوکور ائت کی، ساغ سالامات قورتاردین. بو معناسیز فیکیرلری ده باشیندان آت گئتسین…
– ائکیز ایمیش سن دئمه..
– نه؟ ائکیز؟
– هه ده…بیری اوغلان ایمیش، او بیریسی قیز… حکیم اولجه اوغلانی گؤتوروب. سونرا بیلیب کی، بیری ده وار. قیز… بیزیم اوچ اوغلوموز وار، من همیشه قیز آرزولاییردیم. باجیسیز دا قارداش اولار؟ بیز باجی قارداشی محو ائله‌دیک. من ایندی اؤزومو جللاد یئرینده گؤرورم. من قاتیلم… ایکی آدامین قاتیلی…
– بس ایندییجن بونو حیس ائتمه‌میشدین؟
– نه‌یی؟
– اونلارین جوت اولدوغونو؟
– یوخ… بیر ده کی، ایندی بونو بیلمگین نه معناسی وار کی؟..
– یوخ ائی… بیر وار بیرینی ردد ائده‌سن، بیری ده وار ایکسینی بیردن…
– نه فرقی وار کی؟ من قاتیلم، قاتیل… یا بیرینین قاتیلی اولدون، یا دا ایکیسینین…
– گؤرن اونلاری هارادا دفن ائده‌جکلر؟
– دفن؟ بیم بطنده محو ائدیلن اوشاقلاری دفن ائدیرلر کی؟..
هر طرفه سویوق بیر سوکوت چؤکموشدو
