قارانلیقداکی پیشیک
ربیقه ناظیم‌قیزی
کؤچورن: ائلیار پولاد
-باخ، اوردادی، او کونجده. یاواشجا یاخینلاش. هورکوتمه.
آیاققابیلارینی چیخاریر. آستا آددیملارلا ایره‌لیله‌ییر. اییلیب الینی کونجه طرف اوزادیر. پیشیگین یومشاق توکلرینه توخونور. قارانلیقدا گؤزلری‌نین تعجوبدن نئجه بؤیودویونو حیس ائدیرم. یوز فایز، گولومسه‌ییرده.
-غریبه آدامسان ائ.
-نییه؟
-پیشیگین یئرینی تاپان منم، آما سن سئوینیرسن.
اجلاف خاصیتیم وار، بیلیرم… جاواب اؤزونو گؤزلتمیر:
-نه اولسون، نه فرقی وار؟ بیرده، من سنه اینانمایا بیلردیم.
-هه، ماراق… یوخلاماق ایسته‌دین…
عصبلشسه‌ده، بروزه وئرمیر. بو خاصیتی خوشوما گلیر، همده منی قیجیقلاندیریر. آما عصبلشمگینی‌ده ایستمیرم. قورخورام. ائله‌بیلیرم، او حیرصلنسه، نسه طبیعی فلاکت باش وئره‌جک. چووغون، توفان، زلزله، آخماق تلقیندی.
گولور. بیلیرم‌کی، گرگینلیگی گؤتورمکدن اؤترودو. حالبوکی… نسه… بو دفعه هئچ‌نه دئمیه‌جم…
-پیشیک قاچدی.
-هه. گرک دانیشمایایدیم.
-نئینییه‌جکدیک‌کی، اونو؟ اساس اودورکی، تاپدیق…
استئهزالی تبسومومو گؤرمور. اؤزومله پارالئل آپارماغیم عاغلینا دا گلمیر. عمومیتله، اونون عاغلینا منیمله باغلی نه گلیرکی؟..
-دایان ائ، گویا من بئله دئییلم؟! ساده‌جه، یورولموشام. سوروشکن بالیق آختاریرام و اونو دا تاپمیشام. داها نه لازیمدی؟ اونون پوللارینی قوپارماق؟ فیکیرلشمکدن زهلم گئدیر. خصوصن کئفیم اولمایاندا. موضونو دییشیرم:
-بالیق توتماقدان خوشون گلیر؟
-یوخ، داریخدیریجی دیر. هئچ یئمگی‌ده سئومیرم. هرچند… بیر دفعه، بلکه…
بیلیرم‌کی، آرتیق اؤزونو دنیزین ساحیلینده تصوور ائدیر. الینده قارماق. طبیعی‌کی، سوخولجانی اورا دوستو کئچیره‌جک. او ایسه اوز-گؤزونو تورشودوب دئیه‌جک کی. سسی فیکیرلریمی داغیدیر:
-هه. بیر دفعه یوخلاماق اولار.
-بالیغی نییه سئومیرسن؟ سوموکلرینه گؤره؟
-سوموک یوخ، تیغ. هه ائ، تمیزله‌مک آدامین گؤزونه دورور. آما دوزلو بالیق اولسا…
سؤزونو کسیرم:
-سویوتما کارتوفلا.
-بلکه، قایناداسان؟
-اولار…
مطبخه کئچیرم. آرخامجا گلمیر. راحاتام. یوخ، ناراحاتام. گلسه، ایش گؤره بیلمه‌یه‌جم. زهلم گئدیر مطبخده ایکینجی آدام اولاندا. گلمه‌سه، دلی اولاجام…
کارتوفلار قایناماق اوزره‌دیر. بالیق اولماسا دا، اولار. اونسوز دا ایی وئریر.
اوتاغا قاییدیرام و قفیلدن اونون گؤزلری‌نین ایچینه باخیرام:
-من هر شئیی بیلیرم.
-نه‌یی؟
-هر شئیی…
-بیلیرم‌کی، بیلیرسن. آما باشا دوشمورم‌کی، سن بونلاری هاردان، نئجه بیلیرسن؟ منی ایزله‌ییرسن؟
-دلیسن؟
-بس نئجه اولور آخی…
-حیرصلنمه.
-حیرصلنمیرم. تعجوبله‌نیرم.
-بونون نه‌یی پیسدی‌کی. دئمه‌لی، هله‌ده باجاریرسان.
-نه‌یی؟
-تعجوبلنمگی.
-سن نییه بئله عاغیللی‌سان آخی؟
-بو سنه مانع اولور؟
-یوخ.
-گویا اولسا، دئیه‌جکدین.
-مانع اولسا، دئیه‌جکدیم. منه بئله شئیلر مانع اولمور.
-یالانچی.
-یئنه مباحثه ائدیرسن. سنده ان سئومه‌دیگیم جهتدی.
-بیلیرم.
“آما هئچ دوشونموسن‌کی، منده نیی‌سه سئومه‌یه بیلرم؟” . بونو اوره‌گیمده دئییرم.
باخیشلاریمی کونجه چئویریرم. پیشیک قاییدیب. آما نه خیری؟ داها اونون یئرینی تاپماقلا تعجوب و سئوینج یاراتماق اولماز. بونو بیر دفعه ائله‌دیک…
-گل سنی اؤپوم.
گولومسه‌ییر:
-اولماز.
-باشین اوچون…
-منه دئییرسن؟
-هه… هه… هه…
سسیم گئتدیکجه آنلاشیقسیز اولماغا باشلاییر. آرادا دایانیب کونجه طرف باخیرام. اوره‌گیمده فیکیرلشیرم-کی، پیشیک گؤرمه‌سه ده، نه باش وئردیگینی حیس ائدیر.
