هامینیزدان زهلم گئدیر
محمد سرافراز قراملکی
بالیقچیلار اونون لشینی چوخلو زحمت‌ایله بالیق توروندان آییریب، چایین قیراغیندا یئره اوزالتدیلار. قوجا تیترهین اللری ایله توتون قوتوسونو تیتره ین دیزلرینین اوستونده آچیب، تله سیک بیر سیگار ائشیب قورو دوداقلارینین اورتاسیندان سارالمیش دیلینی سیگار کاغاذینین اورتاسینا چکه‌رک آلیشدیراندان سونرا درین بیر نفس ووروب “اونو چایا بوراخین گئتسین، یوخسا شیدیرقی بیر یاغیش یاغاجاق” دئدی.
کیمسه اونون سؤزونه اؤنم وئرمه‌دی. گنج اوغلان بیر حالدا کی ایندی اؤزونه گلمیشدی جنازه‌یه باخاراق دالی – دالی قاییدیب، قوجانین یانیندا اوتورب “ایندی نه اولاجاق؟” –دییه، سوروشدو قوجادان. قوجا گینه بیر درین نفس ووروب چایا باخاراق “هئچ، چای جوشاجاق ” دئدی.
کوله بؤرکونو باشیندان گؤتورب الینین دالیسی ایله آنلیندان آخیب اوزونه یاییلان تر داملالارینی سیله رک، اونو تانیسین دییه دققتله گؤزدن گئچیردن سونرا “بونو چایدا بوغوبلار” دئدی.
نازیک اوزون ایسه، نفس – نفس ووراراق دیل آلتی “بیزه نه کیم بونو بوغوب. بو دا بو گونوموزون شانسیندان، اؤزگه لری تور آتار قیزیل ان آزیندان اؤلو بالیق گلر تورونا، بیزه ده اؤلو بالیق کی سهل‌دی قارنی یاریق بیر بدبخت اؤلو گلر. آللاه جلالیوا چوخ شوکور.
اوزو چاپیق، جنازه نین دؤره سینه نئچه دؤور دولاناندان سونرا باش بارماقلارینی قاییشینین دالیسینا سوخوب “یوخ – یوخ، مندن سوروشسوز دییرم بووووونووووو اول اؤلدوروب، سونرا سویا بوراخیبلار” دئدی.
کوله : “هه بو دوز دئییر. بونو اؤنجه اؤلدوروب، سونرا سویا بوراخیبلار” دئدی.
گنج اوغلانین دییه سن قورخوسو تؤکولموشدو. بیرالینی قوجانین چیینینه قویوب اینجه – اوزون بوینون جنازه یه ساری اوزالدیب باخاندان سونرا “من بونو تانیرام. هر سحر – آخشام گون چیخیب باتاندا ائله بو دؤوره برده اولار. من اوزاقدان گؤرموشم. چایا باخاراق دانیشار، آمما هئچ واخ بیلمه دیم نه دئییردی ” دئدی.
اوزو یاریق “نه دییجاقیدی بئکار بیر آدامیدی دا، حتما” او شئیی کی گؤرمه یه جاغیدی گؤروموشدو، ائله اونا گؤره ده داها هئچ زاد گؤرمیجاق ” دئدی.
قوجانین سیگارینا یاغیشین ایلک داملاسی دوشه رک، آلیشان کؤزو تاااااااس دییه سؤندو. قوجا گؤیه باخاراق “اؤزونوزه بیر اؤرتو تاپین، ایندی دیکی یاغیش یاغا ” دئدی.
گنج اوغلان گؤی اوزونه باخاراق، دوداقلارینی بوزوب یولداشلارینی گؤزدن گئچیردی.
قوجا نوه سینین یالنیش دوشوندوگونو آنلاییب، گینه سؤنموش سیگارینا درین بیر نفس ووردو. سؤنموش سیگارین زهره لی قوخوسو پیچاق کیمی بوغازینی یاردی. بو گونه جن سیگاری نییه ترک ائله یه بیلمه‌دیگینی دوشوندو.
اینجه اوزون ” هه هه آی بالا سن بو ده ده وی بیر طبیبه گؤستر ” دئدی گنج اوغلانا.
کوله ساغ بؤیرو اوسته اوزاناراق ” اولان بو نه درددی بو گون بیز دوشدوک ؟ بس بالیق توتماغیمیز نه اولاجاق ؟ بیز بیر تیکه چؤره ک دالیسیجانیق، بو قوجا دا چئرت – پئرت دانیشیر. یاغیش یاغاجاق، چای جوشاجاق ” دئدی.
اوزو یاریق ؛ قوجا و باشقا یولداشلارینین سؤزلرینه اؤنم وئرمه دن بیر موفتتیش کیمی “چوخ عامیلی وار. اولا بیلر آروادی ایله ساواشا، بورجلو اولا، یا مخدیره تاپانمایا، یا یا یادا نه بولوم آللاه شیطانا لعنت ائله سین، هئچ کس دن باش تاپماق اولماییری” دئدی.
ایلدیریم سسی بالیقچیلارین سؤزلرینی بوغازلاریندا بوغدو، قارا بولودلار داغلارین دالیسندان یوگوروب گونشین قاباغینی آلدیلار. هامیسی هراسان گؤی اوزونه باخاراق قوجانین سؤزلرینین دوز اولدوغونو دوشوندولر. یاغیش دورمادان یاغماغا باشلادی؛ گؤی اوزو جیریلمیش دوغرودان. آز گئچمه‌دی سو داغدان آخیب ایلان کیمی یئرده سورونمه یه باشلادی. کیمسه جنازه یه اؤنم وئرمه دن قاچیب اؤزونه بیر امن یئر تاپدی. گنج اوغلان قوجانین الیندن یاپیشیب بالیقچیلارین یانینا گئتمک ایسته دی، آمما قوجا ” بوراخ الیوی گئت ” گنج اوغلانا دئدی. گنج اوغلان باشدان آیاغا ایسلانمیش بیر بیچیمده ” بوردا اوتورماغین نه فایداسی وار؟ آخی چایین سویو یوخاری گلمکده دیر، گؤرمورسن مگر ” دئدی قوجایا.
قوجا الینی گنج اوغلانین الیندن آییریب جنازه یه باخاراق “سن گئت اؤزونه بیر یئر تاپ. من ایسته ییرم بو نون سون دفعه چایا نه سؤز دئدیگینی بیلم ” دئدی. بالیقچیلار اوزاقدان گنج اوغلانا اوجا سسله ” اده اونو بوراخ اونون بئینی بوشدو، گل بورایا ؛ اوردا قالسان اؤلمه‌یین حتمی‌دیر” دئدیلر. گنج اوغلان آغلایا – آغلایا قوجایا یالوارماقا باشلادی؛ آمما دییه‌سن قوجا کار اولموشدو؛ بیر هئیکل کیمی ایکی گؤزون جناره یه زیلله ییب باخیردی. گنج اوغلان اؤزونو بالیقچیلارین یانینا یئتیردی. قوجا ایسه جناره نین کناریندا اوتورب آچیق قالمیش آغزینا گؤز تیکمیشدی. داغلاردان آخان سو چایین سویونو داها یوخاریلاندیردی، ائله کی سو قوجانین آیاقلارین آلتینا آلدی. قوجا سویا اؤنم وئرمه‌دن جنازه یه باخیردی. سو یوخاریلاندیقجا جنازه نی یئردن قالدیریب حرکته سالدی. قوجا جنازه‌یه مانع اولمادی. چایین سویو جنازه‌نی قورد کیمی سوروتله یه – سوروتله‌یه گؤتوروب آپاردی.
قوجا اونو گؤزدن ایتینجه ایزله دی؛ نهایت‌ده جنازه دنیزه ساری گؤزدن ایتدی. یاغیش داها آچمیشدی. گنج اوغلان ییخیلا – ییخیلا اؤزونو قوجایا یئتیردی؛ قوجانین ایکی گؤزو چایدا قالاراق؛ بدنی بیر هئیکل کیمی قوروموشدو. گنج اوغلان قوجانی باغرینا باساراق اوجا سسله آغلاماقا باشلادی. قوجانین آغزیندان هوف چیخدی. بیر سؤز دئمک ایسته ییردی گنج اوغلانا. اوغلان قولاغینی قوجانین آغزینا یاپیشدیریب ” نه دئمک ایسته ییرسن ” سوروشدو قوجادان. ” اونو کیمسه اؤلدورمه میشدی. او اؤزو – اؤزونون اؤنجه قارنینی بیچاقلا یارمیشدی، سونرا سویا بوراخمیشدی اؤزونو؛ تا سودا بوغولاندان سونرا سویون تکینده قالیب؛ اوزه چیخماسین ” قوجا دئدی. سونرا درین بیر آه چکه رک بولورسن چایا نه دئییردی او؟ گنج اوغلان ایتمیشینی تاپان بیریسی کیمی ” هه هه نه دئییردی او چایا ” سوروشدو قوجادان. “هامینیزدان زهلم گئدیر، دئییردی چایا ” دئییب، نفسی کسیلدی قوجانین.
