بیری وارمیش، بیری یوخوموش. نجات آدیندا بیر اوغلان وارمیش. هله بو زیرک اوغلان دونیایا گلمه‌میش، آناسی بازاردان کئچیرمیش. گؤرورکی بیر یاراشیقلی قادین، گؤزه‌ل – پارلاق قیرمیزی رنگلی خارجی امزیک ساتیر، خوشونا گلیر، بیرینی آلیر.
گؤرور کی ساققاللی بیر کیشی قیشقیریر:
– امزیک، خارجی امزیک!
پارلاق ساری امزیک اونوندا خوشونا گلیر، بیرینی آلیر. بو واخت نجات آنا بطنینده اوچ آی‌ایمیش، کئف چکیرمیش. اوچ آی‌دا کئچیر. یئنه بیرگون نجاتین آتاسی تله‌سه – تله‌سه اجلاسا گئدیرمیش. قارشیسینا جاوان بیر اوغلان چیخیر.
– عمی، عنتیقه خارج امزییی وار، آلمازسان ؟
– نییه آلمیرام، – دئیه اوغلانین گؤستردییی یاشیل، پارلاق امزییی آلیر، جیبینه قویور و گولومسه‌ییر. امزیک اولور اوچ …
گونلر کئچیر. آنا احتیاط تدبیرلری گؤرور. او جومله‌دن بیر نئچه دنه عادی امزیک‌ده آلیر. بلی، گون او گون اولور کی، نجات آنادان اولور. دوغوم ائوینده دینجینی آلیب، راحاتلاناندان سونرا اؤز ائولرینه قدم قویور، عزیزله‌نیر. هره اؤز آلدیغی امزییی اوشاغین آغزینا دؤرتمه‌یه چالیشیر. لاکین نجات یاراشیقلی، پارلاق امزیکلرین هئچ بیرینی آغزینا آلمیر، عنادلا رد ائدیر، یاپیشیر اون تومنلیک امزیکدن، سورکی سوراسان. آتاسی‌دا دئییر:
اصیل کیشی‌دیر، ایسته میر یاد مالینی …