حکایه‌جیک‌لر / حسین واحدی

۱-    دایان، یاردیم ایسته‌ییر بو قادین!
هر گون شهرین کمر یولوندان کئچنده او یاشماقلی و اوزونو اؤرتموش یاشلی قادینی گؤروردو،  چوخ راحاتسیز ائدیجی بیر آن اولوردو.  بئلی آزجا بوکولموشدو و الین اللره آچمیشدی…
ائلمان اورکدن آه چکیب تانریدان اونا یاردیم ایسته‌دی. اونا یاخینلاشیب، آرابانی ساخلاییب، شوشه‌نی ائندیریب، آزجا پول وئریب؛ ننه تانریم سنی قوروسون، منه ده دوعا ائت- دئدی!
یاشلی قادین؛ اوغلوم! عؤمور بویو ساغلام یاشایاسان، تانری سنی ساخلاسین، ایجاره ائوده اوتورورام و کیمسم  یوخدور … دئدی.
ائلمان دریندن آه چکیب، حزین باخیشلا اوندان آیریلیب، یولونون آردین توتدو…

۲-    اوشاق محبتی
سئوین، پالتارلارین گئیمک ایسته‌ییردی، آمما کؤینه‌یین باشینا کئچیرده بیلمه‌ییردی. تومانین ترسینه گئییردی! آناسی گلیب اونا یاردیم ائدیب، گئییندیردی. یانیجا آلیب بازارا گئتدیلر. بازارین توکانلارین بیر- بیر گزیر، آناسی ایسته‌دییی شئی‌لری آلیردی. قیزیل بازاریندا، توکانلارین بیرینین یانیندا، اوزو یاشماقلی بیر قادین اونلارین یانینا گلیب یاردیم ایسته‌دی! سئوین- ین آناسی اؤزونو توتاراق ائشیتمک ایسته‌مه‌دی بو سسی! او حئینی آبیرلی دیله‌نن قادینین اوشاغی سئوین-دن دوندورماسینی ایسته‌دی. سئوین ایسه، ائشیتدی بو سسی! سئوین ایکی الی ایله یاپیشدی دوندورماسیندان. سئوینه- سئوینه وئردی اوشاغا!!

۳-    یورولماز قاریشقا
اؤزوندن نئچه قات بؤیوک و آغیر اولان بیر بوغدانی داشیییردی. چوخ دقتله یولونو گئدیردی. قاباقدا بیر چؤپ واریدی و قاریشقا اونا یئتیریب دایاندی. سانکی “اورست” داغینین اؤنونده دایانمیشدی.
ساعاتلارجا اورادا دایانمادان بوغدانی اویانا کئچیرمه‌یه چابا گؤسته‌ریردی. بؤیوک بیر یئر کوره‌سی، اوجسوز- بوجاقسیز بیر عالم و خیرداجا بیر چؤپ و بیر یورولماز قاریشقا!
بوغدانی دیکینه توتوردو، بوغدا یئنه آشیردی؛ آمما یوز دفعه بو یوران ایشی تکرارلادی. بیر دفعه اونو دیک توتماغی باجارا بیلسه‌یدی اونا یئترلییدی! بویانا کئچیب،اویانا کئچیب، بوغدادان واز کئچمک ایسته‌میردی. دونیادا بوتون یئمک‌لر سونا چاتمیش کیمی!!
… سونوندا بوغدانی دیک توتوب چؤپه دایاندیرا بیلمه‌یی باجاریب، اویانا آتدی و اؤزوده چؤپدن کئچیب اوزون بیر یولونا داوام ائتدی! گؤرن بو اوزون یولدا نه قده‌ر چؤپ وار؟

۴-    کؤچمن قارانقوش
سون باهار گلمک اوزره‌دیر. یولداشلاریم دئییر: قالدیغیمیز یئردن باشقا یئره گئده‌جه‌ییک. آتامدان سوروشاندا: هاراگئده‌جه‌ییک؟ من تانیمادیغیم یئرلردن سؤز آچیر. هردن اؤز- اؤزومه ائله داریخیرام! دئییرم نه اولار ائله بو یام-یاشیل یئرده قالیب یاشایاق. آمما آتام دئییر:
-بیر آیین ایچینده بورادان گئتمه‌سک هامیمیز سویوقدان اؤله‌ریک. قارانقوش‌لار ایستی یئرده یاشایارلار. ائلیمیزین بؤیوگو دئییب.
ایکی گوندن سونرا اورمو گؤلونون یانینا گئده‌جه‌ییک. آتام دئییر:اورمو گؤلو، چوخ گؤزلدیر و اورادا آیاقلاری اوزون فیلامینقولار، ساری جئیرانلار، قوچ‌لار و… یاشاییرلار. ایندی چوخ ماراقلی اولموشام تئزلیک‌له قالدیغیمیز یئردن اورمو گؤلونو گؤرمه‌یه گئدم…
کؤچمک گونو گلیب یئتیشمیشدی و یولداشلاریم‌ایله بیرلیکده بیر قیراقدا اوچماغا حاضیر اولموشدوق. ائلین بؤیوگونون اوچماغی‌ایله هامیمیز گؤیه ساری یوللاندیق. شهرلرین اوستوندن کئچنده اوشاقلارین هامیسی بیزه ال ساللاییردیلار و ائله بیل اونلار بیزیمله بیرگه اوچماق ایسته‌ییردیلر…
یول چوخ اوزونویدو، آمما هئچ یورولماق بیلمه‌ییردیم، یالنیز اورمو گؤلونه چاتماق ایسته ییردیم. بؤیوکلو-کیچیکلی داغلاری، اورمانلاری، شهرلری آشیب گئدیردیک. گئتدیگیمیز یئره آز قالیردیق. آتام، آنام‌ایله بیرلیک‌ده یانیمدا اوچوردولار و من چوخ سئوینیردیم.
… اوزون یولچولوقدان سونرا، آرزیسین چکدیگیم یئره یئتیشمیشدیک، آمما اورمو گؤلو… اورمو گؤلو من آرزیسین چکن دئییلمیش. چوخ آغلادیم بورا گلدیگیمه، بورا چؤلدن باشقا بیر زاد دئییلمیش. آتام یانیما گلیب، آغلاما قیزیم بورا سولو بیر گؤلویدو، قوروماسینین نده‌نینی بیلمه‌ییرم، سنی آپاراجاغام گؤزل «وان» گؤلونه، دئییرلر اورا چوخ سولو و گؤزل دیر… سن آغلاما، گؤزل قیزیم …!