ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری


حکایه‌جیک‌لر / حسین واحدی

1-    دايان، يارديم ايسته‌يير بو قادين!
هر گون شهرين كمر يولوندان كئچنده او ياشماقلی و اوزونو اؤرتموش ياشلی قادينی گؤروردو،  چوخ راحاتسيز ائديجی بير آن اولوردو.  بئلی آزجا بوكولموشدو و الين اللره آچميشدی…
ائلمان اوركدن آه چكيب تانريدان اونا يارديم ايسته‌دی. اونا ياخينلاشيب، آرابانی ساخلاييب، شوشه‌نی ائنديريب، آزجا پول وئريب؛ ننه تانريم سنی قوروسون، منه ده دوعا ائت- دئدی!
ياشلی قادين؛ اوغلوم! عؤمور بويو ساغلام ياشاياسان، تانری سنی ساخلاسين، ايجاره ائوده اوتورورام و كيمسم  يوخدور … دئدی.
ائلمان دريندن آه چكيب، حزين باخيشلا اوندان آيريليب، يولونون آردين توتدو…

2-    اوشاق محبتی
سئوين، پالتارلارين گئيمك ايسته‌ييردی، آمما كؤينه‌يين باشينا كئچيرده بيلمه‌ييردی. تومانين ترسينه گئييردی! آناسی گليب اونا يارديم ائديب، گئيينديردی. يانيجا آليب بازارا گئتديلر. بازارين توكانلارين بير- بير گزير، آناسی ايسته‌دييی شئی‌لری آليردی. قيزيل بازاريندا، توكانلارين بيرينين يانيندا، اوزو ياشماقلی بير قادين اونلارين يانينا گليب يارديم ايسته‌دی! سئوين- ين آناسی اؤزونو توتاراق ائشيتمك ايسته‌مه‌دی بو سسی! او حئينی آبيرلی ديله‌نن قادينين اوشاغی سئوين-دن دوندورماسينی ايسته‌دی. سئوين ايسه، ائشيتدی بو سسی! سئوين ايكی الی ايله ياپيشدی دوندورماسيندان. سئوينه- سئوينه وئردی اوشاغا!!

3-    يورولماز قاريشقا
اؤزوندن نئچه قات بؤيوك و آغير اولان بير بوغدانی داشيييردی. چوخ دقتله يولونو گئدیردی. قاباقدا بير چؤپ واريدی و قاريشقا اونا يئتيريب داياندی. سانكی “اورست” داغینین اؤنونده دايانميشدی.
ساعاتلارجا اورادا دايانمادان بوغدانی اويانا كئچيرمه‌يه چابا گؤسته‌ريردی. بؤيوك بير يئر كوره‌سی، اوجسوز- بوجاقسيز بير عالم و خيرداجا بير چؤپ و بير يورولماز قاريشقا!
بوغدانی ديكينه توتوردو، بوغدا يئنه آشيردی؛ آمما يوز دفعه بو يوران ايشی تكرارلادی. بير دفعه اونو ديك توتماغی باجارا بيلسه‌يدی اونا يئترلييدی! بويانا كئچيب،اويانا كئچيب، بوغدادان واز كئچمك ايسته‌ميردی. دونيادا بوتون يئمك‌لر سونا چاتميش كيمی!!
… سونوندا بوغدانی ديك توتوب چؤپه دايانديرا بيلمه‌يی باجاريب، اويانا آتدی و اؤزوده چؤپدن كئچيب اوزون بير يولونا داوام ائتدی! گؤرن بو اوزون يولدا نه قده‌ر چؤپ وار؟

4-    كؤچمن قارانقوش
سون باهار گلمك اوزره‌دير. يولداشلاريم دئيير: قالديغيميز يئردن باشقا يئره گئده‌جه‌ييك. آتامدان سوروشاندا: هاراگئده‌جه‌ييك؟ من تانيماديغيم يئرلردن سؤز آچير. هردن اؤز- اؤزومه ائله داريخيرام! دئييرم نه اولار ائله بو يام-ياشيل يئرده قاليب ياشاياق. آمما آتام دئيير:
-بير آيين ايچينده بورادان گئتمه‌سك هاميميز سويوقدان اؤله‌ريك. قارانقوش‌لار ايستی يئرده ياشايارلار. ائليميزين بؤيوگو دئييب.
ايكی گوندن سونرا اورمو گؤلونون يانينا گئده‌جه‌ييك. آتام دئيير:اورمو گؤلو، چوخ گؤزلدير و اورادا آياقلاری اوزون فيلامينقولار، ساری جئيرانلار، قوچ‌لار و… ياشاييرلار. ايندی چوخ ماراقلی اولموشام تئزليك‌له قالديغيميز يئردن اورمو گؤلونو گؤرمه‌يه گئدم…
كؤچمك گونو گليب يئتيشميشدی و يولداشلاريم‌ايله بيرليكده بير قيراقدا اوچماغا حاضير اولموشدوق. ائلين بؤيوگونون اوچماغی‌ايله هاميميز گؤيه ساری يوللانديق. شهرلرين اوستوندن كئچنده اوشاقلارين هاميسی بيزه ال ساللاييرديلار و ائله بيل اونلار بيزيمله بيرگه اوچماق ايسته‌ييردیلر…
يول چوخ اوزونويدو، آمما هئچ يورولماق بيلمه‌ييرديم، يالنيز اورمو گؤلونه چاتماق ايسته ييرديم. بؤيوكلو-كيچيكلی داغلاری، اورمانلاری، شهرلری آشيب گئديرديك. گئتديگيميز يئره آز قاليرديق. آتام، آنام‌ايله بيرليك‌ده يانيمدا اوچوردولار و من چوخ سئوينيرديم.
… اوزون يولچولوقدان سونرا، آرزيسين چكديگيم يئره يئتيشميشديك، آمما اورمو گؤلو… اورمو گؤلو من آرزيسين چكن دئيیلميش. چوخ آغلاديم بورا گلديگيمه، بورا چؤلدن باشقا بير زاد دئييلميش. آتام يانيما گليب، آغلاما قيزيم بورا سولو بير گؤلويدو، قوروماسينين نده‌نينی بيلمه‌ييرم، سنی آپاراجاغام گؤزل «وان» گؤلونه، دئييرلر اورا چوخ سولو و گؤزل دير… سن آغلاما، گؤزل قيزيم …!

6 پاسخ

  1. سلام عزيز دوستوم واحدي جينابلاري . دوغرودان دا اللرينيز آغريماسين آذربايجان سيزين كيمي گنج يازار لارا گووه نير.

  2. سلام ايشيق سايتينی دولانديرانلار
    هميشه مطالبييزدن فايدا آپاريرام. آللاه سيزلری ساخلاسين
    بو گؤزل حيكايه جك لر چوخ دويغوسال و اوره يه ياتان يازيليبلار. چوخ ساغ اولون

  3. سلام دوست گرامی .
    اگر اجازه دهید از برخی مطالبتان در این سایت در نشریه خودمان (گلشن راز ) و به نام خودتان استفاده کنیم.
    موفق باشید .
    یا حق .

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *