ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

shahane mushfiq qiziعشق اولسون!!
شهانه مشفق قيزي- كؤچورن: ابوذر جعفري

پاييز تزه گلميشدي. داها دوغروسو، هله تزه-تزه اؤز گليشيني ثبوت ائتمك ايسته‌ييرميش كيمي هاوالار سون گون‌لر سويوماغا باشلاييردي. اونيورسيته‌دن چيخيب ياغيشين آلتيندا دئمك اولار كي، قاچا-قاچا اؤزومو مئترويا چاتديرماغا تله‌سيرديم. ياغيش ائله برك ياغيردي كي، باشيمي قالديرماغا، اطرافيما گؤز يئتيرمه‌يه ماجال تاپميرديم. ائودن چيخاركن آنامين «بو گون ياغيش هاواسي وار، اؤزونله چتير گؤتور» مصلحتينه قولاق آسماديغيم اوچون ده پئشمانچيليق كئچيريرديم ايچيمده. آمما اون‌سوزدا استفاده ائتمه‌يه‌جه‌ييمي بيليرديم آخي… يايدا عينك، ياغيشدا چتير استفاده ائتمك هئچ عادتيم دئييل. عينك‌دن استفاده ائتمه‌مه‌ييمين سببي هر شئيي اؤز رنگينده گؤرمك ماراغيم‌دير. گونشي ده، دنيزي ده، آغاجي دا، بير سؤزله هر شئيي اؤز رنگينده گؤرمك ايسته‌ييرم. بلكه ده بو چوخلاري اوچون معناسيز بير ايستك كيمي گؤرونه بيلر. آمما نئيله‌ييم، سئوميرم صنعي بوياني. چتير ايسه اوشاقليقدان هئچ سئومه‌ديييم بير اشيا اولوب. اوشاق واختي ياغيشي چوخ سئويرديم. ياغيش ياغاركن حيه‌طه، ياغيشين آلتينا قاچماغا جان آتارديم. ائله ايندي ده ياغيشا اولان سئوگيم قاليب، آما ايندي ياغيشين آلتيندا اولماقدانسا، اونا كناردان، مثلن، ائويميزين بالكونوندان، يا دا پنجره‌دن باخماغي داها اوستون توتورام. نه ايسه… ياغيشين آلتيندا مئترويا دوغرو قاچاركن گورولتولو آلقيش سسي مني دايانماغا مجبور ائتدي. گؤزومون آلتيندان سس گلن طرفه دوغرو باخاندا يولون او بيري تاييندا بير بينانين قارشيسيندا ييغيلميش اينسان اوردوسو ديققتيمي جلب ائتدي. گؤره‌سن، بو جماعتي بو سويوق هاوادا اورا ييغيشماغا وادار ائدن سبب نه اولا بيلَردي؟ بو سوالين جاوابي ياغيشدان دا، سويوقدان دا، ائوه گئجيكمك قورخوسوندان دا داها واجب ايدي. محض بونو اؤيرنمك اوچون استقامتيمي دَييشيب همين ازدحاما دوغرو گئتمه‌يه باشلاديم. بو دفه آدديم‌لاريمي داها سورعتلي آتير؛ تئز بير زاماندا اورايا چاتماغا چاليشيرديم. ائي، بو ماشين‌لار دا امكان وئرير كي… پيادانين يولوندا دا پيادايا امكان وئرميرلر…
ازدحاما ياخينلاشاركن سس‌لر داها آيدين سئچيلمه‌يه باشلاييردي، كيمسه دانيشيردي… ياخينلاشديم…بويوم بالاجا اولدوغوندان هئچ بير شئي سئچه بيلميرديم. انسان‌لاردان عذر ايسته‌يه-ايسته‌يه ازدحامين اورتاسينا دوغرو ايره‌لي‌له‌ديم. مني سوزن عصبي باخيش‌لاري، داليمجا دئيينَن انسان‌لاري، گؤرسم ده، فيكير وئرمه‌دن ايره‌لي‌له‌ييرديم. نئيله‌ييم، گؤرمورم آخي…
آخير كي، صحنه‌ني گؤره بيله‌جه‌ييم راحات بير يئر سئچديم اؤزومه… ايندي گؤرك نه‌لر اولور…
صحنه‌نين اورتاسيندا بير تريبون قويولموشدو. تريبونون آرخاسيندا الينده ميكروفون توتان 45-50 ياشلاريندا بير كيشي دانيشيردي، داها دوغروسو، دئمك ايسته‌ديك‌لريني قارشيسينداكي ورقه‌دن اوخويوردو. بو منظره‌ني گؤرنده بير فيكير مني گؤتوردو: ورقه‌ده‌كي‌لري اؤزو يازميشدي، يوخسا كيمه‌سه يازديرميشدي؟ نه ايسه، بوندان منه نه… كيشي‌نين گؤرونوشو چوخ سليقه‌لي ايدي. قارا كوستيون، آغ كؤينك، كؤينه‌يين دويمه‌لريني آخيرا قدر دويمه‌له‌ميش، اوستوندن ده قارا رنگلي قولستوك تاخميشدي. گئييمي سليقه‌لي اولسا دا، قاباغا چيخان قارني بو سليقه‌يه خلل گتيريردي. اونو گؤرركن دوشوندويوم ايلك شئي بو اولدو كي، بو قارني اولماسايدي، هئچ اولماسا بيرآز بوندان بالاجا اولسايدي نئجه گؤزل اولاردي، ياشيندان دا داها جاوان گؤرونه بيلردي… نه ايسه، اساس مساله اونون گؤرونوشو، سليقه‌سي يوخ، دانيشديق‌لاريندا ايدي:
–          عزيز سئچيجي‌لريم (هه، دئمه‌لي بو آدام نامزد ايميش)، من آرتيق بير دفه سيزينله گؤروشموشوم. مراميم، مقصديم و صاف نييَتيم سيزين هر بيرينيزه آرتيق معلومدور…
صاف نييَت؟ صحبت دئيه‌سن، كومئدييايا انكشاف ائدير آخي… گؤزله‌يك گؤرك، آخيري نئجه اولاجاق؟
–          بو گون ده بورايا توپلاشماغيميزين اساس مقصدي هم سيزينله صميمي مناسبت ياراتماق، هم ده سيزه شَن ساعات‌لار بخش ائتمك‌دير. منيم بوتون حياتيم بويو تك مراميم اولوب: وطنيمه، خالقيما ناموسلا، وجدانيملا خدمت ائتمك! بو گون اولو تانريم منه بو مراميمي داها گؤزل بير شكيلده حياتا كئچيرتمك اوچون بير شانس وئريب؛ اگر سيز ده منه بو شانسي وئرسه‌نيز اَمينم كي، پئشمان اولماياجاقسينيز. من وظيفه‌م مدّتينجه سيزينله سيخ-سيخ گؤروش‌لر كئچيره‌جك، سيزين پروبلئم‌لرينيزه قولاق آساجاق و بو پروبلئم‌لري آرادان قالديرماق اوچون اليمدن گله‌ني ائده‌جه‌يم. من وكيلي اولدوغوم بو ميللتين سسين دؤولتيميزه ده دويوراجاغام. بوندان سونراكي ايل‌لر عرضينده سيزين حيات سَويه‌نيزي ماكزيموما، پروبلئم‌لرينيزي ايسه مينيموما چاتديرماق اوچون دايانمادان ايشله‌يه‌جه‌يم…
«نامزد» سؤزونو بورايا چاتديراندا گورولتولو آلقيش صدالاري قالخدي. تعجوبله اطرافيما باخاندا، هر كسين اوزونده بير سئوينج، بير راضي‌ليق ايفاده‌سي گؤردوم. ائله بيل دانيشان آدام وئردييي وعده‌لري ائله اينديجه حياتا كئچيرميش، خالقين بوتون درد-سريني آرادان قالديرميشدي. بو انسان‌لار نه‌يه بو قدر سئوينيرديلر، گؤره‌سن؟ آخي بو دانيشيلان‌لارين قورو وعده‌لردن باشقا بير شئي اولماديغيني بيلمه‌لي ايدلر. بلكه ده من سهو ائتميشم دوشونه‌رك يئنيدن فيكريمي همين نامزدين دانيشيغينا جمع‌لشديرمه‌يه چاليشديم:
–          عزيز هموطن‌لريم، من بير چوخلاري كيمي سيزه يالانچي وعده‌لر وئرمك فيكيرندن چوخ اوزاغام. سيزه وئره بيله‌جه‌ييم تك سؤز اوندان عيبارتدير كي، اگر مني سئچسه‌نيز، منه اعتبار ائتسه‌نيز، سيزين اعتبارينيزا لاييق اولماق اوچون اليمدن گله‌ني ائده‌جه‌يم. عشق اولسون آذربايجان خالقينا!!!
يئنه ده گورولتولو آلقيش‌لار قوپدو. دانيشان آدام بير نئچه ثانيه فخرله، غرورلا ازدحامي سئير ائديب مؤحتشم بير اَدايلا صحنه‌دن ائنمك اوچون پيلله‌كن‌لره دوغرو آدديملادي. بو يئريشده ائله بير اَدا وار ايدي كي، ائله بيل آرتيق سئچيليب خالقين وكيللييي وظيفه‌سيني اؤز عهده‌‍‌سينه گؤتورموشدو…
ائله او صحنه‌دن ائنميشدي كي، آچيق-ساچيق گئييملي، ياشي 60-ي كئچميش، آنجاق هله ده اؤزونو جاوان قيز كيمي آپارماقدان اوتانمايان مغنّي قادين اويناق بير ماهني‌نين صدالاري آلتيندا اؤزونو صحنه‌يه آتدي. اونو گؤرركن دوشوندويوم ايلك شئي بو اولدو كي، گؤره‌سن بو سويوقدا بو جور آچيق پالتارلاردا اوشومور؟ صحنه‌يه چيخماغي ايله ده هئچ سئومه‌ديييم بير ايفاده‌ني ايشلتمه‌سي بير اولدو:
–          ال‌لري گؤرمورم…
ائله بو سؤزه بند ايميش كيمي بوتون ميللت باشلادي گورهاگور ال چالماغا. قادين ايسه آچيقدا قويدوغو ساللاق قارنيني اوينادا-اوينادا اوخوماغا، داها دوغروسو، ديسك‌ده اوخويان ماهني‌ني آغيز حركت‌لري ايله گؤسترمه‌يه باشلادي. جماعت بير جوشموشدو كي، گئتديكجه داها دا غضبله ياغان ياغيشي، قيلينج كيمي كسكين سويوغو بيله حيس ائتميرميش كيمي هامي يئرينده رقص ائديردي. اونلارا باخديقجا هم آجييير هم ده حسد آپاريرديم. ياني، بير ميللتي ايكي ياغلي سؤز، بير اويناق ماهني ايله آلداتماق بو قدر مي آساندي؟ ائله بو واخت تئلفونومون جيبيمده تيتره‌ديييني حيس ائتديم. تئز تئلفونومو چيخاريب باخديم، اكراندا آنامين آدي و نؤمره‌سي يازيلميشدي. اكرانين يوخاري حيصه‌سينده «جاوابسيز زنگ‌لر» اشاره‌سي ده وار ايدي. آللاه بيلير نئچه دفه زنگ ائديب، ائشيتمه‌ميشم. تله‌سيك زنگي آچديم، آمما بو سس-كويده سسيمي ائشيده بيله‌رم‌مي اَمين دئييلم:
–          الو
تئلفونون او بيري باشيندان نه ايسه خيريلتي‌لي سس گلدي. اوّلجه‌دن ظن ائتديييم كيمي بو قدر قاريشيقليغين ايچه‌ري‌سينده آنامين سسيني ائشيتمك ممكن اولموردو. اونون نه دئدييني ائشيتمه‌دن اونون مني ائشيديب آنلاديغينا اومود ائده‌رك دئديم:
–          آنا، من سنين سسيني ائشيتميرم، آمما ناراحات اولما، بورادا بير تدبير وار، اونا گؤره گئجيكيرم؛ ايندي چيخيرام بوردان، بير ساعاتا ائوده اولارام. هله‌ليك.
بونو دئييب گؤزله‌مه‌دن تئلفونو سؤندوردوم. اونسوزدا اونون سسيني ائشيده بيلميرديم آخي…
آنامين زنگينه جاواب وئرنده بير طرفدن ده فيكيرم صحنه‎ده‎كي مغنّي‌ده، اونون حركت‌لرينده ايدي. ظاليم قيزي آذربايجان ديلينده ائله بير جمله بيليرميش كيمي تك بير جمله‌ني تكرارلايا-تكرارلايا دورموشدو:
–          ال‌لري گؤرمورم… عشق اولسون آذربايجان خالقينا!…
آرتيق بو كومئدييايا دؤزه بيلمه‌يه‌جه‌ييمي دوشونه‌رك اورادان اوزاقلاشماغا قرار وئرديم. گؤردويوم بو منظره اونسوزدا يئرينده اولمايان عصب‌لريمي داها دا كورلاميشدي. سورعتلي آديم‌لارلا اورادان اوزاقلاشماغا، داها دوغروسو قاچماغا باشلاديم. اورادان اوزاقلاشديقجا سس ده آرخامدا قالير، منيم سورعتيمه چاتا بيلميردي. لاكين صحنه‌يه چيخان هر كسين ديلينده ازبره چئوريلميش او جومله غيري‌اختياري منيم ده دوداقلاريمدان سوزولوردو:
–          عشق اولسون آذربايجان خالقينا!!!
البته، سيزين كيمي‌لرين سؤزونه هله ده اينانان، اعتبار ائدن بو صاف نييَتلي خالقا عشق اولسون!!!
ياغيش ايسه هله ده ياغماغا داوام ائديردي. آنچاق بو دفه سانكي مني ساكيتلشديرمك، تسكين ائتمك ايسترجه‌سينه داها آراملا، داها ملايم…

4 پاسخ

  1. باسلام.این شعر بنام سند آذری بودن قشقایی ها زبان به زبان قرنها برزبان اقشار این قوم حفاظت میشود
    بو یل گدیر تبریزه.قنات ریزه ریزه
    خدام بیر یل وربیراه.بیز گدگ الکمیزه
    (ایمانی قشقایی)

  2. selam eleriz aqrımasin çok gozel ki bu fürseti bizimiçin yaratmishsiz oz elfbamizda bu öykunı okuyak. bizim senifdaki moshkulumuze gore bele doşonurem ki bir ökude önemli majerada olmasa onun gozeliginen çok da eksilmez

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *