دونیا قادین‌لار گونو موبارک اولسون
لال حاجيه- کؤرپه- کؤلگه
ملیحه عزیزپور
(1): لال حاجیه
بوزارميش چادراسيني بئلينه باغلاييب، يئپ- يئكه باشماقلاري ايله كوچه‌نين دووارينا سؤيكه‌نيب،آوارا-سرگردان باخيشلاريني گليب- گئده‌نين اوزونه سرير. اونون اؤنوندن كئچركن گولومسه‌ييب، باشيملا سلام دئييره‌م. ماراقليجا ايكي آدديم ايره‌لي گليب، سسينين بوتون توتغونلوغو ايله “هلام… شئفين؟!” ديیه قارشيمدا دايانير. يئنيدن كئيفيني سوروب گئتمك ايسته‌ييرم. آرخامجا باغيريب دئيير: ” باهبي… اهبه اؤيدو” . يانليش دويدوغومو سانيرام. گئري دؤنوب قارشيسيندا دايانيرام. “نئجه اولدو؟” دئيه اوندان سورورام. اليني الينين اوستونه چيرپيب وايسيناراق تكرارلايير: “اهبه اؤيدو.” اونون سؤزوندن شاشيرام هم ده گولمه‌ييم گلير. او آن ميرت ائديب دئييرم:
“حاجيه!!! بس منيم سيرغامي هاواخت آلاجاقسان؟ تويا گئده‌جه‌يم ها!!”
منه قاش- قاباق ائدركن، باشيني توولاييب، باشماقلاريني سوروتله‌يه- سوروتله‌يه گئدير. يولومون داواميني توتوب گئديرم. اونونلا ضارافات ائتديييم اوچون اوزولورم. آخي او اؤزو مني گؤردويو زامانلار سوركلي ارينين اؤلمه‌سي اوچون دوعا ائتديييمي ايسته‌يردي، منسه اؤزومو او يولا ووروب دئيرديم: “او اؤلسه منه موشتولوق نه وئره‌جكسن؟” او ايكي اليني گؤيه قالديريب، اريني قارغيييب، منه سيرغا آلاجاغينا آند ايچردي.
* * *
ارينين اؤلمه‌سيندن بير هفته‌دير سوووشور. حاجيه اونون تئرياك-سيقارا قوخولو كؤينه‌ييني باغرينا باسيب، كوچه باشيندا آغلاياركن، اوشاقجاسينا باغيرير: “آللاه…بعيشله مني…بيمه ديم…بيمه ديم…آللاه…” .
قونشولار اونو ساكينلشديرمه‌يه چاليشيرلار، منسه بوغازيمداكي قهري ياستيغيملا بوغماغا.
(2): كؤرپه
آنا اون- اوچونجو دؤنه دوغدو. يئنه‌ده كؤرپه‌سينين اينقه‌سيني دويمادان آييرديلار اونلاري. آنا، آغزيني يئردن گؤيه قده‌ر آچيب باغيردي. دوغوم سانجيسيندان دئييل، آيريليق آغريسيندان دا يوخ. دؤشلري پاتلاييردي يازيق قادينين.
قودوز سيچانلار اونون امزييينه داراشديلار. بير داملا سودو يئره دوشمه‌مه‌لي ايدي يوخسا…
آنا آجيمادي. عئيني بيرينجيدن اون ايكينجييه‌جه‌نين ترسينه. آنا گولدو عئيني، بيرينجيدن اون ايكينجييه‌جه‌نين ترسينه…
* * *
كؤرپه‌ني بير داخمايا آپارديلار. اوراسي اؤلوم كاني ايدي دئيه‌سن! داخمانين هر بوجاغينا اورادا اولان كؤپكلري ايللر بويو آجليقدان قوروياجاق قده‌ر سوموك قالانميشدي.
قانجيقلار اولاشيرديلار. اونلارين دا امزيكلري پاتلاياجاق قده‌ر شيشميشدي. اويسا كؤرپه‌ني گؤرجك گؤزلري گولدو. آخي كؤرپه، اونلاري او جان آليجي آغريدان قورتاران تك كيشي ايدي . قانجيقلار كؤرپه‌ني اميزديرمك اوچون سيرا چكديلر، آنجاق اونلارين هئچ بيريسينين امزيييني توتمادي اوشاق. اونلار اؤز اؤزلريني اممه‌يه باشلاديلار. اونلار اميشديكجه كؤرپه قوسدو. اونلار هوروشدوكجه كؤرپه سوسدو.
* * *
قانجيقلار، راحاتلانميش كيمي گؤرونوردولر، آنجاق كؤرپه سانجيدان آغلاماغا باشلادي. اونون قارني ائله شيشميشدي كي حاميله قادينا بنزه ييردي و بو گؤرونتو اونا هئچ ياراشميردي. قانجيقلار، يئنه ده امزيكلرينين آغريسيندان هوروشمه‌يه باشلاديلار. كؤرپه اونلاردان قورخموشدو كيمي گؤرونوردو. بير آزدان سونرا او دا باغيرماغا باشلادي . سانكي دوغوم سانجيسي چكيردي یازیق اوشاق.
قانجيقلارين هوروشمه‌سي كسيليردي. كؤرپه ده سوسموشدو آرتيق و بو حال كؤپكلري چوخ شاشيرديردی. آخي او دا راحاتلاشميشدي. كؤرپه، بير سورو سيچان دوغموشدو.
(3): كؤلگه
اللرينه باخدي. ديرناقلاري اوزانميشدي بير آز. ساغ الينين باش بارماغيني آغزينا آپاريب، ديرناغيني چئينه دي. نيشانا بارماغيني دا… اورتا بارماغيني دا…اوزوك بارماغيني دا…جولو بارماغيني دا هابئله.
سول الينين ده ديرناقلاريني چئينه‌دي بير به بير. بارماقلارينين باشي گؤينه‌دي. ساغ الينين باش بارماغيني آغزينا آپاريب او قده‌ر سوموردو كي، بارماغي پاتلادي. نيشانا بارماغي دا…اورتا بارماغي دا…اوزوك بارماغي دا…جولو بارماغي دا هابئله. سول الينين ده بارماقلاريني سوموردو بير به بير. اللري اييلدي. اوره‌يي بولاندي بيردن بيره. يئره توپوردو … توپورجه‌يي قانلي ايدي. آغزيني سيلمك ايسته‌دي. اللري قالخمادي. گوزگو قارشيسينا كئچدي. دوداقلاري پارچالانميشدي. ديشلري اوزانميشدي. هؤرومجه‌يه بنزه ييردي گوزگوده. آجيغي گلدي اؤزوندن. گوزگونو سينديرماق ايسته‌دي. اللري قالخمادي. ديشارييا قاچدي. كؤلگه‌سي اوزانميشدي. اؤزونو چئينه‌مه‌يه باشلادي.