چئویرن: ریحانه پورغنی
ترجمه: ریحانه پورغنی
ریحانه پورغنی

وجودو اوچدو
ریحانه پورغنی

ترافیک ایشیغی قیرمیزی ایدی. پیادا کئچیشی دالیندا دوردو. دال‌با‌دال سیقنال سسی خیابانی بوروموشدو. بیر موتور‌سیکلت کوکرویه-کوکرویه دوز قیچ‌لاری‌نین قاباغیندان یئیین کئچدی. هورکوب دال‌دالی گئتدی. آز قالا آرخا دوشوردو. قادینا باخان گنج موتورسیکلت سوروجوسو دؤنوب، کوبود سسله برکدن گولدو. اوغلانین ناتاراز گؤزلریندن ساچان قیغیلجیم‌لار قادینین اوزونو یاندیردی. آجیقلی باخیش‌لارینی اوغلاندان آلیب، سوروشوب چیگین‌لرینه دوشن شالینی تیترک ال‌لری‌ ایله باشینا چکدی. موتورسیکلتین اگزوزوندان چیخان توستو گؤزونون قاباغیندا قارا بیر بولود سره‌له‌میشیدی. نئچه آددیم اوتایدا دوران اوزون قارا مانتو گئین، قیریشمیش اوزو شسلی قامتینه یاراشمایان قادین؛ «بالا بیرزاد اولمادی کی؟» سوروشدو. -یوخ- دئیه باشینی ترپتدی.
-«اولسون قورخما قیزیم، کؤپک اوغلونون آرپاسی آرتیق دوشوب» دئدی.
یاشیل ایشیق یانیر، ماشین‌لار آغ چیزگی‌لرین دالیندا دوزولورلر.
قیچ‌لاری دالینجا سورونه_سورونه خیاباندان کئچیر. یان گزینتیده ماراقلا ویترین‌لره باخان، یار-یولداشی ایله آددیملایان، سرعتله ایش-گوج‌لری‌نین دالینجا گئدن جماعتین آراسیندان یول تاپیپ کئچمه‌یه چالیشیردی. قادین ساللانا_ساللانا قارا بیر کؤلگه کیمی او رنگلی جماعتین ایچیندن کئچیب گئدیری.
هاوانین بورکوسوندن نفسی دارالیردی. تر آلنیندا مونجوقلانمیشدی. دیلی داماغینا یاپیشمیشدی. بیر میوه سویو ساتان دوکانین قاباغیندا دایاندی. رنگ‌به‌رنگ میوه سولاری یئکه شیشه قاب‌لاردا فیرلانیردی؛ ماوی، یاشیل، قیرمیزی. جماعت دوکانین قاباغیندا سیرا باغلامیشدی.
گؤزو رنگ‌به‌رنگ میوه سویو بارداغینی دونیانین ان قیمتلی وارلیغی کیمی الینده توتان، قیرمیزی کورده‌له ایله باغلانان قوشا هؤروک‌لری چیگین‌لری‌نین اوستونه دوشن، قیرمیزی گوللو دون گئیینَن بیر بالاجا قیزا ساتاشدی. دونیانین ان موتلو اینسانی‌نین گولوش‌لری دوداغیندا اولان بالاجا قیز آناسی‌نین الیندن یاپیشیب اورادان اوزاقلاشدی. قادینین بئینینده کولک اسدی. او کولَگین جان یاندیران شاختاسی، یایین اورتاسینداکی او ایستی، بورکولو آخشامدا قادینین ال‌لرینی، اوزونو، توم وجودونو بیر پارچا بوزا دؤندردی.
گؤزلری‌نین قاباغینا بیر تور چکیلدی، آیاق‌لاری دولاشا_دولاشا دوکانین قاباغیندان کئچیب گئتدی.
بیر کوچه‌یه دؤندو. دوز بیر آی بوندان قاباق بو کوچه‌نین اؤنوندن کئچنده، شانسدان دؤنوب کوچه‌نین ایچینه باخاندا، گؤزو بیر دکتر اوفیسی‌نین پانئلینه ساتاشمیشدی. «دکتر اکرم افشارنیا، متخصص بیمارهای زنان و زایمان» تعجب‌لنمیشدی. اؤز اؤزونه «بو دکتر بو خلوت، سس‌سیز کوچه‌ده نه ایش گؤرور؟» دئمیشدی. کوچه‌ده بیر الکترونیک جیهازلار اعمالات خاناسی، بیر وکیل اوفیسیندن باشقا بیر ایش یئری یوخویدو. قالانی کپنَگی باغلی قیفیل‌‌لاری پاسلانمیش دوکان‌لار ایدیلار. هئچ بیلمیردی روزگار اونا نه یوخو‌لار گؤروب کی دوز بیر آی سونرا او دوکتوره ایشی دوشه‌جک.
اوفیسین قاباغیندا دایاندی. گوجله نفس آلیردی. دلیجه‌سینه چیرپینان اوره‌گی آز قالیردی باغیرینی دلسین. ال_آیاغی سوستالمیش، یئرینده دونوب قالمیش، تون‌لارجا آغریلیقدا اولان آیاق‌لارینی گوجله ترپَدیب، سورونه-سورونه ایچَری گیردی.
دیوارلاری بوز رنگله بویانمیش بوغاناق، داریسقال، داخمایا بنزر اوفیسده سکرتر باشقا کیمسه یوخویدو. نارین گؤزلو، سیسقا سکرتر، قادینی گؤرمک همن دوداغی قاچدی.
-«هن بس گلدین! دونن پئشمان‌لاییب گئتمه‌سَیدین ایندی جانین قورتولموشدو. پول گتیردین؟ نقد اولاها گرک، بیلیرسن دا بو ایش‌لرده گرک دیوان-دفترده اؤزوندن ایز قویمایاسان» دئدی. قادین اؤیولدویه-اؤیولدویه توالته ساری قاچدی، ایچی دیشینه چیخا-چیخا، توم نفرتینی و اکراهینی قوسدو. بیرآن ال اوزونه سو ووراندا، گؤزو آینادا قارالمیش، روحسوز، ازگین صیفتینه ساتاشدی. گؤزونو آیندان آلیب تئز ائشیگه چیدی.
-«قورخورسان؟ قورخما هئچ زاد دئییل، اون دقیقه‌یه قورتولار، اما نَیه تک گلیبسن؟ بیر نفری اؤزونله گتیرَردین کاش» سکرتر دئدی. قادین بیر سؤز دئمه‌دی، بیر دسته پولو چیخاردیب ماسانین اوستونه قویدو. منشی آغاج کیمی قورو ال‌لرینی اوزادیب پول‌لاری گؤتوروب سایماغا باشلادی.
قادین سکرترین ایزنینی گؤزله‌مه‌دن دوکتورون اوتاغینا کئچدی.
دوکتور باشینی موبایلیندان قالدیریب، قادینا باخاراق:
-بوگون امین‌سن دا هن؟ سکرتر دئییردی دونن قویوب گئدیبسن. ایسته‌دیگیم سونوگرافی‌ جوابینی گتیردین؟
قادین الینی آتیب بیر کاغاذ چیخاردیب دکترا ساری اوزادیر. دکتر گؤزلوگونو تاخیب کاغاذا باخاندان سونرا، «یاخشی هر شئی یولوندا، گتیر تانسییونون اؤلچوم باشلایاق» دئییر.
-یاخشی‌دیر، کئچ سویون او تختین اوستونده اوزان؛ دکتر دئییر.
قادین دؤنوب او بدهئیبت، ایشکنجه تختینه اوخشایان رنگی گئتمیش ایکی قیچ یئری اولان اورتاسی بوش تخته باخدی. مذبحه‌یه گئدن قویون کیمی باشینی آشاغی سالیب تخته‌ساری گئتدی.
جیهازینی سویوقلوغون ایچینده حیس ائتدی، آغری بیر ایلان کیمی توم بدنینه دولاشدی. هر یئری آغریدی. بدنی آغریدی. بئلی آغریدی. اوره‌گی آغریدی. روحو آغریدی. دیش‌لرینی بیربیرینه سیخیب، گؤزلرینی برکدن یومدو، دیرناق‌لارینی تختین قولونا باتیردی. اما سسی چیخمادی. دستگاهین سسی بئینینه تؤرپو چکیردی. بطنیندن چیخان لخته لخته قان بیر خورتومدان کئچیب جیهازین محفظه‌سینه تؤکولوردو. ائله بیل قادینین گؤوده‌سیندن بیر شئی اوچوب گئتدی. قادینین رنگی سارالمیش، آیاق‌لاری تیتره‌ییردی. اوشویوردو. اورَگی بولانیردی. قادین اؤلمک ایسته‌ییردی.
-قورتولدو، دورما آیاغا بیراز بوردا اوزان تانسییونون ائنیب، ایندی سکرتره دئیه‌رم بیر سرم وورار؛ دکتر دئدی.
قادینین یانیداکی کیچیک ماسادان تلفنونو گؤتوروب باخدی. بئش جوابسیز زنگ. تلفن یئنه چالدی. توشا باسیب آچدی. بیر بوغوناق، کوبود کیشی سسی اوتایدان:
«نئینه‌دین؟ بو گون ایشی قورتاردین یا یوخ؟» دئدی.
-دئدیگینی ائله‌دیم، اونو اؤلدوردوم؛ قادینین سسی تیتره‌یه-تیتره‌یه، کینله دئدی. یاواش-یاواش گؤزلری یومولدو.
گونشین آلتیندا آلتین کیمی پاریلدایان اوجسوز بوجاقسیز بیر بوغدا تارلاسی‌نین اورتاسیندا دایانمیشدی. ایکی قولونو ایکی یاندان آچیب دوردوغو یئرینده اؤز اطرافیندا فیرلانیردی. بیردن گؤیون بیر قاتیندان بیر قارا قارغا گلیب سول چیگنینده اوتوردو. قادین ترپنمه‌دی، قارغا اگیلیب وار گوجویله دیمدیکله‌یه-دیمدیکله‌یه قادینین باغرینی دلیب، چیرپینان اؤره‌گینی سؤکوب، قانی سوزوله-سوزوله دیمدیگنه آلیب، اوچوب، گؤیده یوخ اولدو.
قادین هر زامان کی کیمی یئنه ده سوسدو. بوم‌بوش جانسیز، آیازلی گؤزلرینی، سئرچه‌لره زیلله‌دی. سئرچه‌لر هورکویوب پیریلداییب اوچدولار. قادین اَگیلیب بوم‌بوش قالان باغرینا باخدی. قارنیندان بیر توتام سامان چیخاردیب، اورَگی‌نین بوش قالان یئرینه باسدی.
۹۹/۱۰/۵

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

وجودو اوچدو/ ریحانه پورغنی

ریحانه پورغنی
www.ishiq.net

آذربایجان ادبیات و اینجه‌صنعت سایتی

وجودو اوچدو/ ریحانه پورغنی

ریحانه پورغنی
www.ishiq.net

آذربایجان ادبیات و اینجه‌صنعت سایتی

وجودو اوچدو/ ریحانه پورغنی

ریحانه پورغنی
www.ishiq.net

آذربایجان ادبیات و اینجه‌صنعت سایتی