سماعه فیرلانیر او بارماق‌لار
هلیا بشیرزاده

قیز آپارتمانین قاپیسینی اؤرتوب، آچاری توللادی باشماققابی‌نین اوستونه. آیاققابیسینی گئییب، یاتاق اوتاغینا کئچدی. سیییرمهدن حامام حوله‌سینی گؤتوردو. پالتارلارینی چیخارداندا، آینادا گؤزو دوشدو ساچ‌لاری آراسینداکی بارماق‌لارا. ساچینی او یان بو یان ائله‌ینده، بارماغین بیری یئره دوشدو. اَییلیب، بارماغی گؤتوردو. کیشی‌نین بارماق‌لاری ایدی. هلبت آیریلاندا، بارماق‌لاری قیریلیب قالیب ساچی‌نین آراسیندا دئیه، اؤز اؤزونه دوشوندو. اونلاری ساچیندان آییریب سانادی. دوز اون دَنه ایدی. یاخشی یولدا تؤکولوب ائله‌مه‌ییبلر! بارماق‌لاری توالت میزی‌نین اوستونه قویدو. ائله بیل اوشویوردولر، تیتره‌ییردیلر. چوخ غملی گؤرسَنیردیلر! غریبه بیر حسله اونلارا باخیب، آجی- آجی گولومسه‌دی. اؤزونه دئدی: یادیندا قالسین گلن سئری گؤروشه گئده‌نده، اونلاری دا اؤزونله آپارارسان. سونرا ضبطی آچیب، آشپازخانایا گئتدی. سوسوزلامیشدی. لیوانی سویلا دولدوراندا، بیر غریبه آغری آیاق بارماق‌لاریندان بدنینه گیردی. سونرا بارماق‌لاری باشلاندی تَرپنمه‌یه. لیوانین سویونو باشینا چکدی. بارماق‌لاری هله تَرپه‌نیردیلر. آیاققابی‌لارینی چیخارتدی. موزیک ریتمی چوخالدیقجا، بارماق‌لاری دا آرا وئرمه‌دن تَرپهنیردیلر. بارماق‌لاری‌نین اوستونده دایانیب، باشلادی تیک وورماغا. ایکی دَنه ساغا، ایکی دَنه سولا. یخچالین قاپیسینی آچدی. اوچ تیک ساغا، سو شیشهسینی یئرینه قویدو، اوچ تیک سولا. یخچالین قاپیسینی اؤرتوب، اونا سؤیکندی. دوردوغو یئرده تیک ووروردو. اول یواش- یواش، سونرا بَرک- بَرک بودلارینی او یان بو یانا آتیردی… ایندی نییه اویناماغی توتموشدو؟ حامام ائله‌ملی ایدی. کیشی‌نین عطری ساچلارینا دولموشدو، عود اییسینه اوخشار بیر قوخو، بلکه ده کُندر. اونون حالینی دَییشَن بئله بیر قوخو. بیر جور خلسه‌یه آپاریردی او قوخو، اونو. هر زامان گؤروشه گئدنده، او عطرین اییسیندن یونگول بیر یوخو گؤزلرینه دولوردو…
سونرا دا حامام ائله‌یه بیلردی. ایندی یورغون ایدی. بلکه ده او قوخونون ساچلاریندان گئتمه‌سینی ایسته‌میردی. بارماق‌لاری‌نین اوستونده اوتاغا قاییتدی. موسیقی اوج توتوردو. مراکش موزیکی ایدی. ترومپت سسی اوجالمیشدی. ایندی ائستئیپ ووروردو، بیر سئری قاباغا، بیر سئری دالا، بیر سئری ده اؤز دؤرونه.
آغری دامارلارینا دولاشاراق، دیزلریندن کئچیب بودلاریندا تَرپندیکجه، موج دا بارماق‌لاریندان باشلانیب گلیب بودلارینا چاتیردی، سونرا او آغرییا قاریشیب گلیب گؤبه‌یینده دایانیردی.
کیشی‌نین اوتاغی توتغون ایدی. کوچه‌ده ایستی یئل اسیردی. توز- تورپاق گؤیه قالخمیشدی. کیشی‌نین عطری تورپاغین قوخوسونا قاتیشمیشدی. عود قوخوسو، بلکه ده… ایستی تورپاغین قوخوسو…
موسیقی ایرهلی گئتدیکجه، بارماق‌لار دا میزین اوستونده تَرپه‌نیب، او یان بو یانا آتلانیردیلار. ایندی طبل سسی گورلانمیشدی، او آغری دا اؤزونو بَرک- بَرک اونون گؤبه‌یینه چیرپیردی. گؤبه‌ییله تیک ووروردو. اوچ دَنه بیر سئری، یئنه بیر موج، اوچ دنه ده بیر سئری.
کیشی‌نین آلنی‌نین تَری اونون بوغازینا دامجیلاییب آشاغا سوزولوردو. او توتغون هاوادا کیشی‌نین عود قوخوسو وئرن بارماق‌لاری اونون شئهلی دَریسی اوسته زویوردو…
بارماق‌لار هله چیرپینیردیلار، آهنگ سَسینه. آغری گؤبه‌ییندن سوووشوب، دؤشلرینه چاتمیشدی. نفسی آغیر گلیردی. اوچ تیک دؤشلری‌یله… ایندی آغری ساغ الی‌نین بارماق‌لارینا گیریب، ظریف بیر موج‌لا قول-لاریندان سوزولوب سول الی‌نین بارماق‌لاریندا دایانیردی.
عود قوخوسو وئرن بارماق‌لار ساچلاری‌نین آراسینا گیرمیشدی، ساچلارینی بَرک- بَرک یاپیشیب چکیردی… اونون دوداق‌لاری تَپییب، غریبه بیر آغری بدنینه دولموشدو. آجی بیر آغری، بلکه ده شیرین، بلکه ده سویوق، بلکه ده ایستی بیر آغری. بارماق‌لار ساچینی چکیردی. ساچلاری آغریییردی…
بارماق‌لار میزین اوسته آتیلیب دوشوردولر، آغری ایسه بوتون بدنینی بوروموشدو. بدنی بالا- بالا اسیردی. آغریدان اؤزونه بوکولوردو. بیر آن دایانیب، نفس آلیب باشینی توولادی. ساچلاری هاوایا سَریلدی. عود قوخوسو ساچلاری‌نین آراسیندان تؤکولوردو. بارماق‌لار چیرپینیب چیرپینیب، میزین اوستوندن یئره دوشدولر. موسیقی اوجا چاتمیشدی. بارماق‌لار یولا دوشوب اونا ساری گلیردیلر، او ایسه فیرلانا- فیرلانا اونلاردان اوزاقلاشیردی. آغری بدنیندن چیخیب، ساچلارینا چاتمیشدی. ساچلاری هاوادا اویناییردی، چکیلیردی، آغرییردی.
فیرلاندیقجا آیاغی‌نین آلتی یوموشالیردی. ایستی تورپاغین اوسته فیرلانیردی، توز- تورپاق هاوایا قالخیردی، ایستی یئل دَریسینه کئچیردی. موسیقی‌نین سسی یئلین سسینده یاواش- یاواش ایتمهیه باشلامیشدی. یئلین سسی قولاغینا دولوردو، تورپاغین قوخوسو بورنونا.
بارماق‌لار اونا چاتمیشدیلار. اونون آیاغی اوسته آتلانیب دوشوردولر. او اؤز بارماق‌لاری‌نین اوجوندا دایانیب، فیرلانیردی. کیشی‌نین بارماق‌لارینی آیاقلاماقدان قورخوردو. بارماق‌لار آیاغیندان یاپیشیب، بوشلامیردیلار. قورخوردو او بارماق‌لاردان …
فیرلاندیقجا یونگوللَشیردی. تورپاقدان آیریلیب، توزون اوسته فیرلانیردی. یئردن آیریلیب، یوخاری قالخیردی. ایندی بارماق‌لاردان آرا آچمیشدی. او یوخاری‌دان آیاغی‌نین قاباغیندا چیرپینان بارماق‌لارا باخیب، گولومسه‌ییردی. او بارماق‌لاردان آجیغی گلیردی. او بارماق‌لارا اوره‌یی یانیردی. او بارماق‌لاری سئویردی. یوخاری قالخدیقجا، کیشی‌نین عطری ساچلاریندان آیریلیب، هاوادا ایتیردی.