او گون ایلقار درسه حاضیرلیقسیز گلمیشدی. چوخ قورخوردو کی، موعللیم اوندان ائو تاپشیریغی سوروشار. مکتبه یاخینلاشاندا هیجاندان آیاغینی گوجله سورویوردو. اؤز-اؤزونه دوشوندو:«نه اولایدی،گؤرونمز اولایدیم،موعللیم مندن درس سوروشمایایدی».
درس باشلاندی. موعللیم بیر-بیر اوشاقلارین آدینی چکیب گلمه‌ینلری قئید ائدیردی. اؤز آدینی ائشیدنده ایلکین یاواشجا «بوردایام،-دئیه دیللندی» اوشاقلار اطرافا بویلاندیلار. موعللیم ده بیر آز سوسوب صینیفه گؤز گزدیردی. «من بوردایام» – دئیه ایلکین برکدن قیشقیردی.
-گؤره سن ایلکینه نه اولوب کی گلمه‌ییب؟- دئیه موعللیم نه ایسه یازدی.
ایلکین سئوینجیندن دیک آتیلدی «اوهو! دئیه سن من دوغرودان دا گؤرونمز اولموشام». او صینیفده گزیب قیزلاردان بیرینین ساچینی دارتدی، باشقا بیرینین قلمینی یئره آتدی. صینیفده چاخناشما دوشدو. هامی بیر-بیرینی گوناهلاندیریب، موعللیمه شیکایت ائدیردی. ایلقار او کی وار فیریققا چیخاردی. اونو نه گؤرور نه ده ائشیدیردیلر. ایلقار ایندی تام آزاد ایدی، ایسته‌دیینی ائده بیلیردی. او، مکتبدن چیخیب یاخینداکی دوکانا گئتدی. دوکانداکی سویودوجودان بیر دوندورما گؤتوروب ساتیجییا یاخینلاشدی. پولو اونا اوزادیب دئدی:-زحمت اولماسا دوندورمانین پولونو چیخین. چاتیجی اونا فیکیر وئرمیردی. اؤز ایشینده ایدی. ایلقار اؤزونو ایتیردی. بیلمیردی نه ائتسین؟ اؤز-اؤزونه دوشوندو:«دوندورمانی گؤتوروب پولونو اؤده‌مه‌دن گئدیم؟ یوخ یاخشی دئییل. آخی بو اوغورلوق ساییلیر. نه اولسون کی منی هئچ کیم گؤرمور! او دوندورمانی یئرینه قویوب دوکاندان چیخدی.
درسلر قورتارانا یاخین ایلقار مکتبه قاییدی. صینیفدن چیخان اوشاقلارا یاخینلاشیب صؤحبت ائتمک ایسته‌دی. آنجاق اونون بوتون جهدلری هدر ایدی. هئچ کیم ایلقاری گؤرمور، دویموردو.
ایلقار ائوه قاییتدی. مطبخده آناسینا یاخینلاشدی:آنا،من گلدیم. آنجاق آناسی اونا فیکیر وئرمه دن ناهار بیشیریردی:ایندی ایلقار بالام گله جک. منیم یئمه‌ییم ایسه هله حاضیر دئییل.
ایلقار قوناق اوتاغینا گئدیب اوزو اوسته دیوانا اوزاندی و آغلاماغا باشلادی:«من داها گؤرونمز اولماق ایسته‌میرم. ایسته ییرم کی آنام منی گؤرسون، یولداشلاریم منیله اویناسین، موعللیم مندن درسی سوروشسون…»