ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

ishiq15
بير آخشام کافه‌ده
ائلشن وفالي

منيم بئش اَريم وار. نه آز، نه چوخ. دوز بئش دانا. بيري بيله‌مه قوش‌ديلي اوخويور. ييرمی‌دؤرد ساعات زنگ ووروب، گؤزه‌لليييمدن دئيير. فيلم‌لرده هامی‌نین بيري‌بيرينه دئدييي گؤزه‌لليکلردن يوخ، گيزلين گؤزه‌لليک‌لردن دئيير. بدنيمده سياحت ائله‌ييب، دريمین يوموشاقليغيندان، ساچلاريمین عطريندن، قولاغيمین اينجه‌ليييندن، گؤزومون قره‌گيله‌سيندن، ديزيمین بوکويونون حساسليغندان دئيير. اؤزومون حيس ائله‌ديکلريمدن او دانيشير. کله‌کؤتور سسله يوخ، يوموشاق و احساسلي بير سسله قولاغيما میزيلدايير.
ايکينجيسي ايله فيلمه باخيريق. مبل ايچينه قويلانيب، چيراقلاري سؤندوروب، گؤزلريمیزي تيکمیشيک تلويزيونا. میز اوسته قهوه، بير آز توت‌فرنگي، بير کاسا فينديق بادام، بير آچيق لپ‌تاپ. فيلمدن سونرا دانيشيريق. او منه فيلمین باش تاپيلمايان يئرلريندن دئيير. اما اوّلجه مندن نه دوشوندويومو دئمه‌می‌ ايسته‌يير. ائوده بير پيشيک‌ده وار. پيشيک مبل اوستونده ياتيب. خورولتو سسي گلير. او ايسه دانيشير؛ دال‌با‌دال. فيلمدن ائله معنالار چيخاردير کي نئجه، دئيه‌سن کارگردانين‌دا بئينينه چاتماييب. سونرا دانيشماقدان يورولوب گئديريک خياوانا. خياوان هله قارانليقدير. چييين – چييينه يئرييريک. ياغيش ياواش – ياواش چيله‌يير؛ آمما بيز هله فيلمین عالمینده‌ييک. دوشونجه‌لريمیزدن دانيشماق، دونياني بيزه گئنيشلنديريب. دولانماقدان يورولموروق. بير هافيلتي سسي گلير، بير ماشين سسي. خياوانين آسفالتي پار – پار پاريلدايير.
اوچونجو اَر قارينپادي، آمما زيرنگ قارينپالاردان. منيم پيشيرديييمی‌ بَيَنمیر. اؤزو گلير آشپازخانايا. دئيير ائله بير شئي پيشيريم بارماقلاريني دا ياليياسان. بونو دئيه – دئيه اؤزوده بارماقلاريني يالايير. آيي کيمی‌ بير شئيدير، آما دوزلو و مهربان. يئمک پيشيرمه‌نين يول – يؤنده‌مین اؤيرتمکده صبيرليدي. میزي دؤشه‌مکده‌ده سلقه‌ليدي. يوغون هيکلينه باخماياراق اينجه ظريف سلقه‌سي وار. ليوان دوزمکده، خيارا دوز سپمکده، سالادي قاريشديرماقدا گؤرمه‌لي استيلي وار. دوغورداندا پيشيردييي چوخ دادلي‌دير.
دؤردونجوسو لاپ دوشاب اَردي. دبک‌دير. سفئه‌دير. هئچ نه‌يي جيددي توتا بيلمیر. دلقک‌دير. ايييرمی‌دؤرد ساعات هيريلدايير. گئدير گلير منله باش – باشا قويور. داريخاندا دئيير گل گول – گول اويناياق. بيردن بيره بوزي سالير پالتاريمین ايچينه. دلي تکين قيشقيرتيمدان کئف ائله‌يير. ساري ديشلري همیشه ائشيکده‌دي. همیشه سفئه بير شئييه قاققا چکيب گولور. هردن آخشاملار ايچيب کئفله‌ننده لاپ سفئه‌له‌يير. دئيير ايندي اون میليون پولون اولسئيدي نئيلردين. دئييرم بيلمیرم. دئيير من بيليرم. دورور ائوده بير جيبي دولو پوللو کيشينين اداسين چيخاردير. چوخ گولمه‌ليدي. مندن ايسته‌يير دورام گئده‌ک بير باهالي رستورانا. دئييرم مني‌ده اؤزووه تاي سفئه‌لتمه؛ آما اوره‌ييمده اونونلا خيال قورماقدان خوشلانيرام.
بئشينجي اَريم يوللارين يورقونودو. همشه سفرده‌دير. اتوبوسدا باشيمی‌ قويارام چيينينه ياتارام. منله ايشي يوخدور. اؤزو گؤزه‌ل بير يئر تاپيب چادير قورماغي باشارير. آغاجلارين آدين بيلير. کپنک‌لره عاشيقدير. گوللرين هامیسين تانيير. بير گول دَريب گؤزلريمی‌ يوماندان سونرا گولو بورنومون آلتينا توتور. دئيير گولون آدين دئ. دئينمیرم يادا ترسه دئييرم؛ آما او هئچ واخت سهو ائله‌میر. گئجه‌ني تانيير. اونون گيزلين و نابلد سسلرين ائشيدير. آخي او شه‌هرده ده ياخشي بير موسيقيچي‌دير. ياخشي‌دا سسي وار. هردن اوخويور. مندن‌ده اوخومامی‌ ايسته‌يير. دئيير بيلمیرسن آدامین اؤزو اوچون اوخوماسينين نه کئفي وار. اونون يانيندا کئف چکمک آسان ايشدير.
***
يولداشيمین اللّي ايکي ياشي وار. ائولنمه‌ييب. قهوه پولومو حسابلايير. دئييرم گلن سفر منيم نؤوبمدي. سوروشور ارلريم نئجه‌يدي؟ ائله اوجادان دئيير کي يانيمیزداکي اوغلانلا قيز دؤنوب باخيرلار بيزه. بير – بيريمیزين گؤزلرينه باخا – باخا پيققيلداييب، گولوروک.
منبع: “آذری- ائل دیلی و ادبیاتی” درگیسی، نومره 1و 2 یئنی نشر دؤرو (19 و 20)

2 پاسخ

  1. سلام. چوخ گؤزل و سون درجه ده تعلیقی اولان بیر حئکایه دیر. اوخویاندا اوره کدن سئودیم و یازینین فورماسیندان لذت آپاردیم. تورکجه میزین حئکایه سینی گنج یازیچیلاریمیز ایره لی یه سورمکده دیرلر. یاشاسینلار.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *