آچیل سحر، اویان گونش
آچیل بو سون نفسده، بو قارانلیق قفسده،
سن ایله من تاپیم یئنی حیات.
ایشیق‌لارین ساچیلسین،
چیچک‌‌لریم آچیلسین،
بو ائل‌‌لره باغیشلاسین نجات.
سلام حؤرمتلی شاعر‌لر، یازیچی‌لار، موسیقیچی‌لر و ادبیات سئون‌لر کی بو گون آذربایجانین تانینمیش یازیچی و شاعری، ادبیاتیمیزین پارلاق سیماسی اوستاد کریم مشروطه‌چی سؤنمزین آدگونو مناسیبتیله قورولان تدبیرده اشتراک ائدیبسیز.
من اؤنجه اؤز طرفیمدن و آذری مجله‌سی‌نین امکداش‌لاری طرفیندن بو تدبیری قوران‌لارا منتدارلیغیمی بیلدیریرم. ایران آذربایجانی‌نین سئویملی شاعری و باجاریقلی ترجمه‌چیسی و یازیچیسی اوستاد کریم مشروطه‌چی جنابلارینا دا تبریک دئییب و اوستادا جان ساغلیغی و همیشه کیمی ادبیاتیمیزدا زیروه‌ده اولوب و یازیب، یاراتماق آرزو ائدیرم.
بیر نئچه بند‌ینی اوخودوغوم «آچیل سحر» شعری ۵۰-نجی ایللر شاه رئژیمی‌نین علیهینه مبارزه ائدن سیاسی مبارز‌لرین چوخ سئودیگی ماهنیلاریندان اولوب و زمانیندا دا بؤیوک رول اویناییب و اوزون ایللر خالق ایچینده دیل‌لر ازبری اولموشدور.
من آتام دوکتور حسن ریاضی (ایلدیریم)ین واسیطه‌سیله اوشاق واختیمدان ادبی و مدنی جمعیت‌لرده حضوروم اولوبدور. کرج شهرینده رحمتلیک شاعر اوستاد «علیایی»، رحمتلیک شاعر و لغت‌شناس اوستاد «آلاو» و رحمتلیک طنز شاعری اوستاد «ساپلاق»ین ائو‌لرینده کئچیریلن ادبی مجلیس‌‌لرده اوستاد سؤنمزی تانیمیشام. او زامان‌لار من بو مجلس‌‌لرده بعضی واختلار آذربایجان تاری ایفا ائدیردیم و اوستادلاریمیز طرفیندن ده تشویق اولوردوم. چوخ زامانلاردا «آچیل سحر» ماهنیسینی ایفا ائدیردیم. بو ماهنی فارس موسیقیسینده «مرا ببوس» آهنگینده ایدی کی «حیدر رقابی»نین شعری، «مجید وفادار»ین آهنگی و «حسن گل نراقی»نین سسیله مشهور اولموشدور. من بو ماهنی‌نین هم فارس و هم تورکوسونو ایفا ائدیریم، اما تورکو شعری‌نین شاعرینی تانیمیردیم. آتامدان سوروشدوم، او دئدی: شعر سؤنمز معلمدن‌دیر، اما چوخلاری ائله بیلیرلر کی بو شعر علیرضا اوختای‌ین شعری‌دیر.
زامان کئچدی، «آذری» مجله‌سی بو قرارا گلدی کی بیر اؤزه‌ل نومره‌سینی اوستاد کریم مشروطه‌چی «سونمزه» حصر ائتسین. ۱۳۹۷-نجی ایلینده مجله‌نین ۳۷-نجی نومره‌سی اوستادا حصر اولوندو. بو اؤزه‌ل نومره‌ده آذری مجله‌سی‌نین باش یازاری حسن ایلدیریم اوستادلا مفصل بیر مصاحبه آپاردی و او مصاحبه‌ده بیر سوالی کی منیم و بیر چوخ ادبیات و اینجه صنعت هوسکار‌لاری‌نین سوالی ایدی، اوستاددان سوروشدو. او سوال: «آچیل سحر شعری‌نین شاعری کیمدیر؟» سوالی ایدی. او مصاحبه‌ده رسمی او‌لاراق اوستاد سونمز طرفیندن شعر حاقیندا گئنیش معلومات وئریلدی و شعرین و ماهنی‌نین نئجه یارانماغی آذری مجله‌سی‌نین اوخوجو‌لارینا آیدینلاشدی.
سؤزومون سونوندا آیدین سحر‌لره و صاباحا امیدله باخان سئویملی اوستادیمیز سؤنمزه، اونون حیات یولداشینا و حؤرمتلی مشروطه‌چی عائله‌سینه و اوستادین سئونلرینه بو آد گونونو تبریک دئییب و بیر داها اوستادا جان ساغلیغی و خوش گونلر آرزولاییرام.
