صباحی اؤیکو یاریشماسیندا بیرینجی یئری قازانانلارلا دانیشیق
مهدی اصولی
صباحی اؤدولو اینترنت صحیفه‌سی‌نین یایدیغی خبره اساسن “صباحی اؤیکو اؤدولو”نون ایکینجی ایل – ۱۳۹۳ یاریشماسی‌نین غالب‌لری معینلشمیشدیر. داورلرین دیرلندیک‌لری ۶۲ حئکایه آراسیندا ایلک نؤوبه‌ده ۱۲ حئکایه سئچیلیب، سونراکی مرحله‌ده‌ایسه ۴ حئکایه‌نی (بیرلیکده) ایکینجی صباحی اؤیکو اؤدولونون غالب‌لری تعیین ائتمیشلر. غالب‌لردن علاوه، ایکی یازیچی‌نیندا اثرلری تقدیره لاییق گؤرونموشدور.
“بولاق درنه‌یی”نین بو یاریشمانین غالب‌لری‌ایله آپاردیغی دانیشیقی سیز عزیز اوخوجولارا تقدیم ائدیریک: (ایشیق)
«سمیه علی‌دوست»
بیوگرافی:
سمیه علی‌دوست، متولد ۱۸/۰۶/۱۳۶۱، اورمیه
فوق‌لیسانس فیزیک اتمی و مولکولی، نازلی بیلیم‌یوردوندا فیزیک ساحه‌سینده حق التدریس اؤیرتمن.
اورمو شهرداری‌سی‌نین همیاری آدلی برتر لیگ‌ده اولان فوتبال تیمینین مربی‌سی
نئچه ایلدیر کی ادبیات دا چالیشیرسیز؟
۷۴ دن ۷۹ کیمی فارس ادبیاتیندا داستان و شعر بؤلومونده چالیشاردیم و ایکی کیتاب “آغوش مادر” و “عش در رویا” آدیندا چاپ مجوز آلیب آنجاق چاپ اولماماسینا قرار وئردیم. همان ایللر فارسجا ایکی شعر و نثر مجموعه‌سی حاضرلاییب اؤزل آرشیویمه آرتیردیم. سونرالار درس و ورزش ساحه‌سینده چالیشدیغیم اوچون ادبیاتدان اوزاق دوشدوم و ایندی ایکی ایلدیر کی تورک ادبیاتی‌ایله تانیش اولوب و شعر، نثر و حیکایه بؤلومونده چالیشیرام.
دونیا یازارلاریندان ائتگی:
تاسفله ادبیات بؤلومونده آز یازی اوخوموشام و دونیا یازارلارین اثرلرین‌دن فایدالانمامیشام و اوخودوغوم ساده‌جه درگی‌لرده و تحکیه انجمنین ده محدود و چئشیدلی یازیلاری اولوب.
آذربایجان یازارلاریندان ائتگی؟
چوخلو اوخومامیشام.
تحکیه‌نین ائتگیسی؟
دئیه بیلرم ایلک و تکجه انجمن و بیر یئر کی منه یاردیم ائدیب، تحکیه انجمنی‌دیر و ایندیه‌دک ان دَیَرلی بیر انجمن کی گؤروب تانیمیشام “تحکیه” انجمنی‌دیر.
اؤدول قازانماغینیزین احتمالینی وئریردینیزمی؟
بو حیکایه‌نی گؤندره‌نده بعضن تصمیم توتوردوم گؤندرمیه‌م. دوشونوردوم چوخ ضعفلری وار کی گرک اوستونده ایشله‌یم. اؤزه‌للیکجه گرامری و نگارشی ضعفلر و هئچ اینانمیردیم بو اؤدولو قازانام. آنجاق قازانماغیما چوخ موتلو اولوب و داها انگیزه‌لندیم.
صباحی جشنواره‌نین تاثیری یازیچیلارا؟
دئدیییم کیمی من بو اؤدولو قازانماغا چوخ موتلو اولوب و انگیزه‌م داها چوخالدی. بو اوزدن هر یاریشی هر ایشین داها کیفیتلی اولماغینا و گئنیشلندیرمه‌یینه ضروری و لازیم بیلیرم.
سون سؤز:
بوتون ادبیات ساحه‌سینده چالیشان دوستلاری سئویب، تشککور ائدیب و سیزدن اؤزل تشککور ائدیرم.
سعیده احمدی
بیوگرافی:
سعیده احمدی یم.۶۹/۱۱/۱۱ دوغوملوسو. دانشگاه تبریز ده مهندسی کشاورزی بیتیرمیشم.
نئچه ایلدیر کی ادبیات دا چالیشیرسیز؟
اوشاقلیق دا ناغیللاری چوخ سئوردیم. هر گئجه مطلق بیر نفر تاپاردیم کی منه ناغیل دئسین. نئچه دفعه‌لر ائشیتسم ده گینه ناغیلی سونونا قدر دینلردیم. او ناغیل‌لا یاشایاردیم سئوینردیم آغلاردیم. دونیامین ایچینده بیر آیری دونیا یاراتماغی سئوردیم. اونا گؤره ده قوناق-باجی اویونونون دلی سیدیم. بیر زمان دان سونرا روتین قوناق-باجی خوش گلمه‌دیینه گؤره دوستلاریملا اؤز آرامیزدا حکایه یارادیب و اونو جانلاندیرماغا باشلادیق. بو سبک قوناق-باجی اویناماغی چوخ سئوردیم. مثال اوچون ایکی باجی اولاردیق بیریمیزین قولچاغی نوخوش اولاردی! و بیز ایکیمیز اونو ساغالماسینا مجادله ائدردیک. سورا او بیرسینین قولچاغی کوسوب ائودن گئدردی و بیز اونو آختاراردیق. بو اویونلار روزمره حیاتیمیزین اوشاقجا باخیشی‌دی. بو سناریولاری باخدیغیمیز فیلم لر کارتون‌لار و سریال‌لاردان بورج آلاردیق. منیم حکایه‌لریم چوخ بَیَنیلردی، او اوزدن بوتون هفته‌نی اولوب گئچن‌لره دیققت ائله‌مه‌یی اؤرگَندیم .نیه کی هفته سونو یولداشلاریم مندن سناریو ایسته‌ییردی‌لر. راهنمایی مقطعینه‌جَک بو اویونلار داوامی واریدی اما گیزیلینجه‌دن!
بیرگون دوستلاریملا قرارلاشدیق هرکس یاراتدیغی قوناق-باجی سناریو‌لارین یازسین و ساخلاسین. منیم ایلک یازی‍لاریم ائله بو اویونلار اولدو…
دونیا یازارلاریندان ائتگی:
هانس کریستین آندرسون ون سئحیرلی دونیا‌سیلا تانیش اولدوم. جمعیت‌لی عایله اولدوغوموزا گوره اوخوتدوغوم ناغیللاری بو دفعه نوه‌لریمیز منه اوخوتدوردو و من دویدوغوم و اوخودوغوم بوتون ناغیللاری یوره‌سل‌لشدیرمه‌یه باشلادیم. چون منیم کیمی اولان یئنی نسیل اوشاقلاری، حاضیر دئییل‌دیلر بیر ناغیلی اون دفعه ائشیتسین‌لر!
هانسل دن ساری اینک و ساحره‌لردن قاری ننه‌یه یول اولان یول، ساده جه تخیل دونیاسیندان کئچیردی و بو دنیا منده جانلاندی.
دونیا ادبیاتیندا هانسی یازاری داها اوستون توتماق کیمی بیر لیستیم یوخ. ادبیات دونیاسینا باغلی و صادیق بیر اوخوجو یام.
تحکیه‌نین ائتگیسی؟
ایلک و تک گئتدیییم انجمن۱۳یاشیم دا جولفانین «انجمن ادبی هفت هنر»ایدی.سایین آیدین آراز دبیریدیلر او زمان. ایلک اوستادیم دا سایین آیدین آراز اولوب. اصلینده من آیدین آرازین کشفی ساییلیرام. نقدلری و نظرلری همیشه منه یاردیم ائله‌دی. آچیق و نت و البته غرض‌سیز نقدلرینه چوخ مدیونام و البته هرزمان اوخوماغا تشویق‌لرینه داها چوخ.
آذربایجان یازارلاریندان ائتگی؟
سون زمان‌لار آذربایجان یازارلار ایچینده داوود دوستارین اؤزونه عایید اولان یازی سبکین چوخ سئویرم.
صباحی جشنواره‌نین تاثیری یازیچیلارا؟
صباحی اودولو نو ایلک گؤرنده چوخ سئویندیم. آرتیق بیزیم ده ادبی اودولوموز وار دئیه. بو ایل ائشیتدییمه گؤره استقبال چوخالیب. بو حرکتین دوامی گلمه‌لی‌دیر و داها گوجلنمه‌لی‌دیر… بونا دوشوننده کی ۶۰ دان چوخ یازار یارانیب و الینه قلم آلیب و دونیا آخینتیسی‌نی ثبت ائله‌مه‌یه چالیشیر منی سئویندیریر. البته کی گوجلو یازارلاریمیز وار و اولاجاق.
سون سؤز:
سون سؤز اولاراق صباحی اودولونون ده‌یرلی ژوری‌سیندن و اجرایی هیئتیندن تشکر ائدیرم. بولاق درنه‌ییندن ده بو دانیشیغا گؤره تشککور الییرم.
یعقوب رنجبر
اؤزونوزو تانیتدیرین.
یعقوب رنجبر(برگزیده کشوری ۷۴ شعر، مقام اول شعر استانی )، حقوق اؤیرنجیسی، دوغوم: ۱۳۶۰-مشگین‌شهر
نئچه ایلدیر ادبیات و داستان یازماقلا اوغراشیرسیز؟
اوشاقلیق زامانین دان شئعیر یازماقلا مشغولام، ایلک داستانیمی بیر ایل بوندان قاباق یازمیشام، بو بیر ایلده ۱۵-۲۰ داستان یازمیشام.
دونیا یازارلاریندان کیملری سئویب و اوندان ائتکی‌لنیب‌سیز؟
ژان پل سارتر و گابریل گارسیا مارکز. چوخلو یازیچی‌لارین آدی تئز یادیمدان چیخیر
سیز هانسیسا بیر درنه‌یه عضوسونوزمو؟ یازیچی‌نین گلیشمه‌سینده درنه‌یین نه‌قدر تاثیری اولا بیلر؟
۷۶-جی ایلدن ایرشاد ادارسینده مشکینین ادبی درنه‌یینین عضوویام، کی ۳ ایلدی «بولاق درنه‌یی» آدیندادیر. من بولاق درنه‌یینده علمی اصول‌لارلا تانیش اولوب یازیچی‌لارین اثرلریله و اونلارین اثرلر اوستونده اولان باخیشلاریلا یاخیندان تانیش اولموشام و منجه بو بیر یازیچیا گلیشمک اوچون یاخچی بیر فرصت اولا بیلر. من بولاغین بیر عضوی اولاراق بولاق دان اولدوقجا یارارلانمیشام و دئیه بیلرم کی داستان یازماغی بو انجمن ده اؤیرنمیشم، مشگین ده یئنی یئتمه‌لر اوچون بو انجمنین عضوی اولماغی وورغولاییرام و هر بیر شهرده هر یئنی یئتمه‌یه تؤوصیه ائدیرم درنک‌لره قاتیلسینلار.
جشنواره ده نئچه درصد احتیمال وئریردیز داستانین مقام گتیرسین؟
من بو جشنواریه داستان یولاماقدان هدفیم تکجه داستانیمی و اؤزومو سیناماق‌ایدی و مقام گتیرمک سون اولویت‌ده دیر.
صباحی اؤدولونه نظریز نه‌دیر؟ و بیر جشنواره ده ادبیات و یازیچی‌نین اؤزونون گلیشمه‌سینده نه تاثیری اولا بیلر؟
داوری اینصافلا اولسا، جشنواره‌لرین تاثیری چوخ اولا بیلر.
سون سؤز؟
دوشونجه، دویغو و خیال دونیاسی اولان ادبیات اولماسایدی من بلکه ده یوخموش کیمی سانیردیم اؤزومو
پری آخته
اؤزوزو تانیتدیرین
من «پری آخته»یم ۱۳۵۲ دوغوملوسو، موغانین جعفرآبادیندا آنادان اولموشام، ایندی ایسه ۱۳۶۶ دان اردبیلده یاشاییرام. ایشیم یازیچیلیقدی (شئعیر، داستان، خاطیره) تحصیلاتیم دیپلوما کیمی‌دیر، آنجاق سوووشدوردوغوم کارگاه‌لاری دوره‌لری حسابلاسان دوکتورا مدرکی‌نین واحیدلری‌له بیر اولا بیلر.
نئچه ایلدیر ادبیات و داستان یازماقلا مشغول سوز؟
۶۶ دان جشنواره‌لرده شیرکت ائدیب مقام گتیرمیشم آنجاق ۸۵ دن جیددی اولوب و پروفسیونال ایشله‌میشم،گئجه-گوندوز ایشیم صیرف یازماقدیر شئعیر، داستان، خاطیره…ایلک حرفه‌ای داستانیمی‌دا ۸۵ ده یازمیشام و سون داستانیمی دونن گئجه.
دونیا یازالاریندان کیمی سئویرسیز و کیمدن تاثیر آلیبسیز؟
چوخلو روس یازارلارینی سئویرم داستایفسکی، چئخوف و ماکسیم گورگی. چئخوفون شخصیتینه ده وورغونام داستانلاریندا اولان گیزلی غم منیم ده اثرلریمه تاثیر قویوب… ماکسیم گورگی‌ده سو آزادلیق سیمگه‌سی اولدوغو کیمی منیم ده داستانلاریمین چوخوندان سو آخیر، آنجاق چوخلو تاثیری من طبیعت دن آلیرام
آذربایجان ادبیاتیندا کیمی سئویب و تاثیر آلیبسیز؟
او تایدان او قدر اوخومامیشام تکجه محمود مهدوی‌نین ترجومه ائله‌دییی بیر ایکی داستانی اوخوموشام و بو تایدا رقیه کبیری‌نین یازدیقلارینی سئویرم و باشقا شهرلردن اوخومامیشام آنجاق اؤز شهریمیز اردبیل ده آقای کاظیمی دن و مهدوی دن نئچه تورکی یازدیغیمی چوخلو اؤیرَنمیشم و ایش‌لرینی بَیَنیرم.
سیز هانسیسا بیر درنه‌یین عضووسوزمو؟ درنه‌یین یازیچیا نه تاثیری اولا بیلر؟
من ایکی ایل بوندان قاباغا کیمی کارگاه‌لاردا اولاردیم. منی بورا یئتیرن کارگاه‌لار اولوب و داستانین ایلک قایدالاریلا تانیش اولماغیما سبب اولوب. من ایکی ایل بوندان قاباغا کیمی کارگاهدا اولماغیمی گرکلی بیلیردیم، آنجاق اردبیلده چوخلاری اثر یئرینه یازیچینی نقد ائله‌دییی اوچون ایندی کارگاهلارا نیاز گؤرمورم. آنجاق اوستادلاریملا ایلگیمی قیرمامیشام. یئنی یئتمه‌لرین کارگاها گئتمه‌سینی گرکلی دوشونورم.
نه قدر ائحتیمال وئریردیز داستانیز جشنواره‌ده مقام قازانسین:
داستانیمی قورتاراندا ۹۰% ائحتیمال وئریردیم داستانیم مقام گتیره. دوزدو باشقا یازیچیلاردان و داستانلاردان خبریم یوخ ایدی. آنجاق داستانیمدا هر سؤزومو دئیه بیلدیییم اوچون و اونا چوخ زحمت چکیب تقریبن ۱۴ سئری بازنویسی ائله‌دییییم اوچون اؤزومو اوّل بیلیردیم.
صباحی اؤدولو و بوتونلوکله جشنواره‌لرین ادبییات و یازیچیا نه تاثیری اولا بیلر؟
من چوخ سئوینیرم اؤز آنا دیلیمیزده اؤزه‌للیکله داستان اوچون جشنواره واریمیز، صباحی بیزی اؤز دیلیمیزده یازماغا تشویق ائله‌ییر و یازماق و یاراتماق اوچون مثبت انرژی وئریر. آرزوم بودور بئله جشنواره‌لرین سایی آرتیق اولا و البته یازیچی‌لار بیر-بیرینی گؤروب و تانیماق اوچون اختتامیه تؤرَنی کئچیریلسین.
سون سؤز؟
سیزدن و دوستلاریمدان، اوستادلاریمدان چوخ تشکر ائدیرم.
منبع: http://bulaq.arzublog.com/post-54681.html
