اوندا کی خیاوانلار ایندیکی کیمی شولوغ دئییلدی، ترافیک سؤزو ده هله سؤزلوکلره یول تاپمامیشدی. منیم بیر “رکس” موتوروم وار ایدی نمنه؟ یالنیز بیر ایرادی وار ایدی، او دا بو کی تئز یورولاردی. اونا گؤره هردن من اونو سورردیم، هردن ده او منی! نه تورموزو دوز ایشلردی، نه گازی! هله پیس _ پیس ده اونونلا تک چرخ ده ووراردیم! بیزیم زامانین دا اوشاقلاری کنکور زاد بیلمزدیلر کی نمنه دیر، نه اینترنت وار ایدی، نه گیم، نه ده فیسبوک! ائله اونو باشاراردیق کی بیر – بیریمیزه قورخماز و اوره‌کلی آدام اولدوغوموزون پوزون وئرک!
منیم بیر یولداشیم وار ایدی “هوندا” سورردی، بیر گون کوچه باشیندا دوروب بیر – بیریمیزه افتخاراتیمیزدان تعریفلیردیک، منه دئدی:
–          «من اوتوبانی ۱۲۰ سرعت ایله ترسه گئدرم!»
دئدیم:
–          «اوغلان ایشین دئییل، اوز به اوزدن گلن آرابالارین بیری گلر آلار آلتینا، آسفالتا یاخیلارسان!»
دئدی:
–          «اینانمیرسان اوتور گئده‌ک!»
ایندی چیخمیشیق اوتوبانا، یولو ترسه لاین ایله گئدیریک، اوز به اوزوموزدن گلن آرابالار دا بیری چیراغ وئریر، بیری سیقینال چالیر، بیری یامان دئییر؛ او یولداشیم دا ۱۲۰ دئسم یالان اولار، هئچ اولماسا ۹۰ سرعت ایله گازلیر، هردن ده چؤنوب مندن سوروشور:«قورخمورسان کی؟» من ده دوزون آختارسانیز قورخومدان ال-آیاغیم اسیردی آما کیمدیر اوزدن گئدن؟ «یوخ بابا ! نه‌دن قورخاجاغام دئییب !» هؤووشنه چکیردیم! هر نه جور ویراژ وئریردی مندن سوروشاندا:«قورخمورسان‌کی؟» دئییردیم:«یوووووووووخ!» سونوجدا سانکی یولداشیم اوزدن گئتمیشدی، یاواشلادیب کوچه میزه قاییتدیق. موتوردان دوشنده منه دئدی:
–          «یامان اوره‌کلی بشر ایمیشسن! من سنی بئله بیلمزدیم!»
دئدیم:
–          «اولسون! بیر گون ده من موتورومو چیخاردارام، سن دالیدا اوتورارسان؛ گؤره‌ک سن ده منه تای اوره‌کلیسن، یوخسا قورخاقسان!»
آغزین بوزوشدوروب دئدی:
–          «رکس ایله چیخاجاغیق یوخسا موتورونو ده‌ییشیبسن؟»
دئدیم:
–          «یوخ ائله من هامان او رکس موتور ایله سنی ائشیه چیخارداجاغام!»
یولداشیم گولومسه‌ییب گئتدی.
بیر گون موتورو ائشیه چیخارتمیشدیم، هر نه آیاق ووردوم ایشلمه‌دی کی ایشلمه‌دی! هامان او یولداشیمی گؤردوم منه ساری گلیر. یاخینلاشیب گوله _ گوله «هه؟ یئنه ده ایشله‌میر؟» دئدی. دئدیم: ایته‌له‌سن ایشلر!
بیر آز یول ایته‌له‌یندن سونرا موتوروم اوتقونارکن نفس آلیب یولا دوشدو. موتورو ساخلاماق ایستیردیم گؤردوم تورموزدان خبر یوخدور! آیاقلاریمی یئرده سوروتله‌ییب زوران _ گوجن ساخلادیم‌! بیردن یولداشیمی اوزدن آپارماق ووردو بئینیمه! اؤز _ اؤزومه دئدیم:«اوغلان ائله ایندی بو تبرزه‌نی قورخوتماق زامانیدیر هااااااا !» یولداشیمی چاغیریب دئدیم:
–          « بو گون ده ایستیرم من سنی اؤز موتوروم ایله قورخودام ! قورخماسانسا اوتور گئده‌ک !»
او دا گوله _ گوله سؤزومو قبول ائله‌دیکده موتورو گازلادیم؛ اؤنجه یولون بیر آز اوزو یوخاریسی وار ایدی؛ رکس موتورون دا آخی بیر نفره آپارماغا گوجو اولمازدی، هاندا قالسین ایکی نفر! زیققینا – زیققینا گئدیریک هردن ده من میرتیندان اؤترو یولداشیمدان سوروشورام:«آی اوغلان ! قورخمورسان کی؟» او دا «هله بو یول گئدیرکی منی ده قورخودا؟» دئییب گولوردو! من بو سورغونو اوچ _ دؤرد دؤنه یولداشیمدان سوروشدوم کی گوناهی بوینومدان آچام، آما یول هله اوزو یوخاری اولدوغونا گؤره هر زاددان خبرسیز «یوووووووووخ بابا !»دئییب یئنه ده دیزینه چیرپیب من ایله موتوروما گولوردو !
یولون اوزو یوخاریسی قورتولدو؛ ایندی دوشموشوک اوزو آشاغی یا، تورموز داکی یوخدور، موتورون بورنو شیشیب نه گئدیر؟ من ده بیله _ بیله سایمایاراق هئی گازدیر کی وئریرم، گئت به گئت ده سرعتیمیز یئیینله‌شیر! هردن یولداشیما چؤنوب سوروشورام: «قورخمورسان کی؟» هر دؤنه سوروشدوقجا، ایستیر اوزدن گئتمه‌سین، دئییر :«یوخخخخخخخخخ بابا !» بیر آزدان سونرا دئدیم:
–          « سانکی تورموزوموزدا توتمور! کاش بونو یولا چیخمامیش بیله‌یدیم!»
او قورخمایان یولداشیم، تورموزون یوخلوغون بیلندن سونرا منی نه قوجاقلاییب، نه قوجاقلاییب؟ دئییر:
–          «اولماسا ساخلا من دوشوم !»
بیلدیم وضعیتی خارابدیر، دئدیم:
–          «هه؟قورخورسااااااااااان؟»
دئدی:
–          «گئت اوسته!»
–          هه؟ اوره‌یین قیریلیییییییب؟
–          گئت اوسته!
–          هه؟فیشارین ائنیییییییب؟
–          گئت اوسته!
–          هه؟شالوارینا اوخویوبساااااان؟
–          یئنه ده گئت اوسته!
دئدیم:
–          «یولداش! سن اؤله سن! شالوارینا اوخوماق ائله بیر زاد دئییل، شالوارا متولد ده اولسان بو موتورون تورموزو یوخدور! اؤله‌سن ده، قالاسان دا، هر نه واخت موتورومون عشقی چکسه اوندا اؤزو دایاناجاق! داها منیم الیمدن بیر ایش گلمیر! یولون اوزو یوخاریسین قالخانمیردیق هااااااااا، اوندا گولوردون؛ ایندی او گولمه‌یین بو آغلاماغی دا وار!»
آخیردا ساغ _ سالامات محله‌میزه چاتدیق. یولداشیمین صیفتینه سانکی اؤلو توزو سپمیشدیلر! دیشی دیشینه ده‌ییردی. دیلی توتار _ توتماز دئدی:
–          «آغا! سن بتر آدامسان، داها سنین موتورونا مینمک “توبه”!»