یاغیشلی تصویر
حمید آرغیش

اوتاغین ایشیغی یالنیز ماسا اوستونده اولان مطالعه لامپاسیندان ایدی. لامپادان سوز‌ن ایشیقدا، ‌اوتاغین اوچ طرفینده قفسه‌لنمیش نازیک ـ قالین کیتابلارین یالنیزجا قارالتی لاری گؤرونوردو. ماسا آردیندا، بیر صندل اوسته اؤتورموش و اللرینه سؤیکنمیش «آنار»ین اوزو چیراقدان قالخان آلتون ساچاقلار قارشیسیندا، ساریلیق توتموش آداملار کیمی نظره گلیردی … گؤزلرین اوتاغین ایکی تایلی پنجره‌سینه زیلله‌میشدی. چوخدان ایدی ماسا اوستونده کی چای ایستیکانیندان بوغ حلقه‌لنمیردی. مطالعه لامپانین یانیندا نئچه بیر درجه‌لی مکتب اوچون درسلیک کیتاب گؤرنوردو اوتاغین سوکوتون ائشکیده قالخان بولودلارین شاققیلتی سی پوزدو. آنار دریندن نفس چکیب، باشینین توکلرین أللرینه سورتدو « شام یئیه جک می‌سن ؟»
او سس اوتاغین ائشیگیندن قالخدی … آغیزین آچیب بیر زاد دئمک ایسته‌دی لاکین اوتاغین سوکوتو پوزولمادی … باشین بولادی … ائشیکده یاغیش شیره بوران یاغیردی اوتاغین چیراغین یاندیراندا قارانلیق مطالعه لامپاسینین دؤوره سینده بوغولدو آغیر – آغیر پنجره ساری دوغرو گئتدی. ائشیگی گؤرمه یه زیلله ندی … یاغیشین ایری دومورجوقلاری شوشه اوستونده آشاغییا ساری آخیردیلار. اوتاغین یانیق چیراغی شوشه ده عکس ائدیلیردی … عکیزین شوشه‌ده گؤردو. ..
قیافه‌سین اؤیله پوزغون گؤرمه‌میشدی … پنجره‌یه ده‌ین یاغمور دومورجوقلاری، شوشه یه منعکس اولموش آنارین عکیزده گؤزلریندن یاناقلارینان آخیردی و اورادان أنگینه …
گؤزلرین سیلدی، لاکین شوشه‌ده هله گؤزلریندن سو آخیردی. اوتاغین وسایط‌لری شوشه‌ده آیدین گؤرونوردو … کیتاب قفسه‌لری، ۱۳۲۵ – ینجی ایلی تداعی ا‌ئده‌‌ن ارک قالاسی اوسته سواشلاردان چکدیگی تابلو، اوتاغین تاوانیندان آسیلی اولان کؤزمه لامپا و… ایندی داها یاغیشین شوشه‌یه ده‌یمه‌سین گؤرموردو. گؤزلری شوشه‌ده منعکس اولموش چیراغا زیللنمیشدی.
***
نئچه لحظه سالوندا، قاپی آرخاسیندا سوسقون دایاندی. کیلاسدان گلن اوشاقلارین گولوب – دانیشماق سسلرین دینله‌دی. هر زاددان آرتیق او سسلری سئوریدی. سینه‌سین قاباغا وئریب، قاپینی تیققیلداداندان سونرا، ایچری گیردی. کیلاسین سس – کویو کسیلدی. شاگیردلرین هامیسی آیاغا قالخدیلار. پنجره‌نین اؤنونده قرار تاپان ماسایا طرف آغیر – آغیر آددیملارکن، شاگیردلری ده گؤزدن سوزدوروردو. هله آیاق اوسته دورموشدولار شاگیردلر. .. بیردن نئچه لحظه یئرینده دوردو. سانکی ایلدیریم ووردو اونو … بئیینی قیزیشدی … کیلاسین سول طرفینده، آخیر صندل ده هئیکللی بیر اوغلان ایاغا دورمامیش، اؤیله ساکیت اوتورموشدو … اونا
زیللندی. قیافه‌سی‌ سرت و زارافاتسیزایدی – اوتورون اوشاقلار!. .. دئییب، ماساسی آخارسینا کئچدی… نئچه لحظه بویوندا، مین بیر فیکیر بئیینینه ووردو، نه اوچون او اوغلان آیاغا دورمادی؟!
هئیکلی اوچون ایمیش ؟ … بلکه‌ده کیلاسین قولدورودور … بلکه ده تزه گلدیگیم اوچون منی سیناماق ایسته‌ییرلر. . اوشاقلار پیچیلداشیردیلار… نئچه لحظه اونا ساری باخدی قیافه‌سی هله ده زارافاتسیز ایدی …
ـ یاخشی دیر اونلارا بیر آز بؤیوک‌لره احترام قویماق حاققیندا دانیشام … اوندا او اوغلان ایشین آنلار … یاخشی دئییل ایلک گونده و کیلاسین ایلک ساعاتیندا اونا ال قووزایام. اوندا منیم یانیمدا آچیلیشانمازلار …
و او ساعاتی اؤزوده بیلمه‌دی نه جور سوردو.
***
پنچره‌ده منعکس اولان اوتاغین لامپاسی تار گؤرونوردو ایندی. پنجره‌نین شوشه‌‌سی سسلنمیردی. هاوا هله چیله‌ییردی. .. ائشیک داها آیدین گؤرونموردو.
گئری دؤندو … ماسانین اوستونده کی ایستیکانا گؤزو ساتاشارکن اوره‌یی‌نین یانماسین دویدو. سورعتله ماسایا آددیملادی. الی ایستیکانین گؤوده‌سینه توخوناندا، ‌اونون نئچه مدت اؤنجه قادینی گتیردیگینی خاطیرلادی. نئچه لحظه ساکیت دوردو. بیر زاد آردینجا ایدی سانکی. .. پنچره‌یه بیر ایشیق دوشدو. گؤی گورولتوسو قالخارکن دیکسینیب اؤزونه گلدی. الین قولاقلارینا باسدی … “آغا ایجازه”…. بیر سس قولاقلاریندا جینگیلددی.
“یوخ یوخ من تلسدیم… باغیشلا منی. ..” اوجادان باغیردی. اوتاغین آغیر سوکوتو قولاقلارینا دولاندا پنجره‌یه ساری یئریدی…دریندن تؤوشه‌ییردی. سانکی کیمسه بوغازین سیخیردی. ..پنجره‌نین سیسلی شوشه‌سین الی ایله سیلدیکجه اوتاغین وسایط‌لری بیر تابلو کیمی جانلانیردیلار…
***
یئنه آیاغا دورمایاجاق می؟ بو دفعه قالخمازسا دؤردونجو دفعه‌دیر …! کیلاسین سون ساعاتی‌دیر. آللاه ائله‌سین دورسون بو فیکیرلرله کیلاسا داخیل اولدو. ایچری گیررکن، کیلاسین سون ردیفینه ـ او اوغلانین صندلینه ـ زیللندی. اطرافینداکیلار آیاغا دورموشدولار … آمما یئنه سرت قیافه‌سی ایله اؤیله اوتورموشدو.
اوغلانین اوزونه گؤز تیکدی. لاکین اونو اعتناسیز گؤردو … بئله نظرینه گلدی کی بونا گولور. . گؤزلری قان چاناغینا چؤندو. بیر پینار بئینینده قاینادی. .. هله شاگیردلر آیاق اوسته دورموشدولار. اونلار معلیم‌لری‌نین نئچه لحظه‌ده قیاقه‌سی ده‌ییشمه‌سین سئچمیشدیلر. سورعتله اوغلانا ساری آددیملادی. اوغلانین اوزونه ده‌ین قولاقلارینا دولاندا پنجره‌یه ساری یئریدی…دریندن تؤوشه‌ییردی. سانکی کیمسه بوغازین سیخیردی. ..پنجره‌نین سیسلی شوشه ‌سین الی ایله سیلدیکجه اوتاغین وسایط‌لری بیر تابلو کیمی جانلانیردیلار…
سیلله‌نین سسی فیکیرلری آیری یئرده اولان شاگیردلری ده او طرفه جلب ائتدی.
سنین دوشونجن یوخدورمو هئچ ؟ سنه دئمه‌ییبلر تکجه معلیم یوخ، بلکه اؤزوندن بؤیوک هر کیمسه بیر یئره داخیل اولاندا اونون آیاغینا دوراسان؟ آدام گرک او قدر یئمسک اولاکی معلیمی‌نین آیاغینا دورمایا … یوخسا هئیکل‌لی بدنووه گؤوه‌نیرسن؟ معلیم اوجادان باغیردی … ایندی‌یه‌دک هئچ زامان بؤیله بیر شاگیردله داورانمامیشدی. قان چاناغینا دؤنموش گؤزلرین اونون اوزندن چکمیردی. ایلان تک اؤز اووون اووسونلاماق ایسته‌ییردی … آغا ایجازه! بیزیم ایکی قیچمیزدا چولاق‌دیر، آخی … احتراملا دولو بیر سسله اوغلان یاواش دئدی….
ایلد یریم شدتله شاخدی. گؤی گورولدادی. یاغشین شیدیرغی یاغیردی. ‌سانکی آنارین گؤز یاشی ایله ایسلانمیش بیر تصویری یوماق ایسته‌ییردی.
قایناق: ایشیق نشریه‌سی – نومره ۴