بئلی بوکولموشدو؛ گؤزلری یاخشی گؤرمه‌ییردی؛ کوچه‌ده گـئدیردی… یاواش- یاواش گـئدیردی، ائله یاواش کی، اونو گؤروب گؤرن کیمی، اؤز- اؤزومه دئدیم: بو ظالـیم فلک آنالارین چییین‌لرینه نه آغـیر یوک چاتـیر؟
سونرا اونا یاخـینلاشـیب دئدیم:
ـ سلام لئـیلا ننه!.
ـ سلام بالا!.
ـ لئـیلا ننه یاخشی سان‌می؟.
ـ یاخشی؟ هه بالام یاخشی‌یام… سن نـئجه‌سن؟ آمما بیلیرسن من سنی تانـیمادیم ها؟!…
– لئـیلا ننه من رحیمم… رحیم!.
لئـیلا ننه دیل ـ دوداغی آراسیندا زمزمه ائـتدی: رحیم… رحیم…؟! عؤمرونون ایلک بهاریندا، او زامان‌کی نه گلین ایدی نه قـیز؛ لئـیلانـین اری اؤلدو. لئـیلا ننه قالدی بیرده یـئـتیم یـئسیرلری. او یـئری اکدی، یـئـتیم‌لری بؤیوتدو. یـئـتیم‌لر، قوشلارین بالالاری کیمی بیر- بیر قاناد آچـیب، اوچوب گـئـتدیلر. لاکین بیر قاراقاش ـ قاراگؤز بالا (آخـیرینجی یـئـتیم) آنانـین یانـیندا قالدی تا ائـوین چـیراغی اولسون، داخمانـین کیشی‌سی اولسون. او دئدی:
آنا قورخما ایشله‌رم سنین زحمتلرینی اؤده‌رم، بیزده بیر گونه چـیخاریق. آنا قـئـیرتلی بالانی گؤروب گووندی، اوره‌یی‌نـین سولموش چیچکلری طراوتلندی. بالا ایشله‌دی، درس اوخودو، یاخشی‌دا اوخودو، لاپ یاخشی اوخویان بالا، مدرسه‌ده فرانسه دیلینی اؤز یانـیندا ائله اؤیره‌نمیشدی کی، اونا اوشاقلار بعضن زارافات اوچون عبدالله یـئرینه «فرانسه» دئـییردیلر. لاکین بو خوش گونلر چوخ سورمه‌دی. بیرگون ساواک مأمورلاری مدرسه‌ده اونو یاخالادیلار، آخی او شاهین ضیددینه چـیخـیش ائـتمیشدی. ایکی ایل ساواکـین «کمیته-ی ضد خرابکاری» سئلول‌لاریندا قالدی. بو مودّت آنا آغلار قالـیب، گؤزونو یوللارا تیکدی. بیرگون خبر گلدی عبدالله-نی «ائوین» زندانـینا آپاریبلار، آنا بالانـین، گؤروشونه گـئـتدی:
ـ بالا عبدالله؟.
اوغول گولدو:
ـ آنا یاخشی‌سان؟
آناـ بالا دویونجا آغلاشدیلار.
سککیز ایلدن سونرا بالا آنانـین یانـینا قایـیـتدی، آنانـین داخماسین ایشیقلاندیردی. لاکین بو چیراق سحره‌دک یانمادی… عبدالله یـئنه‌ده یاخالاندی و بیر سحر عبدالله-نی گولله‌له‌دیلر، لئـیلا ننه بو اؤلومو بیلمه‌دی.
منه باخـیب دئدی:
ـ دئدین رحیم؟ هانسی رحیم؟ عبدالله‌نـین یـولداشی رحیم؟ منیم بالام هاردادیر؟ جواب وئر بالا، منیم بالام هاردادیر؟
بو سؤزه جاواب نه اولاردی، سوسدوم… ایچیمده یاندیم!!!
