یاییلان خبره گؤره، چوخ تاسفله اوزون ایللر خلج تورکجهسی اوزره تدقیقات آپاران، عالی تحصیللی یازیچی «علیاصغر جمراسی»، بهمن آیینین ۱۹-جی گونو، ۶۱ یاشیندا وفات ائتمیشدیر.
ایرانین «مرکزی» استانینین «تفریش» ولایتینه باغلی «تلخاب» کندینده دونیایا گلن علیاصغر جمراسی، خلج تورکلرینین مدنیتی و دیلی ساحهسینده بیر نئچه کیتابین مؤلفی اولموش و عؤمرونون اوتوز ایلدن چوخونو بو یولدا یورولمازجاسینا چالیشاراق کئچیرمیشدیر.
علیاصغر جمراسینین فارس و خلج تورکجهسینده نشر اولان اثرلریندن: «خلجها، یادگار ترکهای باستان»، «قارشوبالوققا سلام»، «فرهنگ لغات خلجی ـ فارسی»، «خداحافظ خلجی»، «گول صنوبر داستانی»، «تولکو ماتالی»، «فراهان خلجلریچه ماتاللار و افسانالار»، «آشتیان و خلجستان خلجلریچه ماتاللار و افسانالار»، «خلجلرجه موللانصرالدینینگ مزاق سؤزلری»، «خیال بالوقو»، «سخنان حکیمانه بزرگان در زبان ترکی خلجی» و «خلج اوردو»کیتابلارینی آد چکمک اولار.
علیاصغر جمراسی سون ایللر «نامه صدیق» درگیسی ایله امکداشلیق ائدیر و درگینین یازیچیلار هئیتی سیراسیندا فعالیت گؤستریردی.
«ایشیق»- آذربایجان ادبیات و اینجهصنعت سایتی- امکداشلاری آدیندان بو ایتگینی تانینمیش تدقیقاتچینین حؤرمتلی عائله و دوست تانیشلارینا، سئونلرینه، بوتون خلج تورکلرینه، ائلهجهده اونون قلمداشلارینا باش ساغلیغی وئریر و خاطرهسینی عزیزلهییریک.
«ایشیق»- آذربایجان ادبیات و اینجهصنعت سایتی
۲۰ بهمن ۱۴۰۴
