چوخ تاسفله، «یاشار» انتشاراتی و تهرانین انقلاب خیابانیندا یئرلشن «دنیای نو» کیتاب ماغازاسینین صاحیبی، تانینمیش آذربایجانلی ناشر و کیتاب ساتیجیسی «اسماعیل رستم‌زاده» (یاشار)، چرشنبه آخشامی، ۲۲ مرداد تاریخینده آغ‌جییار چاتیشمازلیغی سببیله وفات ائتمیشدیر. بو تانینمیش، تعهدلی ناشر و کیتاب ساتیجیسی، پئشه‌کار فعالیتی دؤرونده بیر چوخ دونیا و آذربایجان ادبیاتی نمونه‌لرینی نشر ائتدیرمیشدیر.
«اسماعیل رستم‌زاده» (یاشار) ۱۳۲۷-جی ایلین خرداد آیی‌نین ۱۱ده «ساراب»شهرینده دونیایا گؤز آچمیش، گنجلیک ایللریندن تهراندا یاشامیش و کیتاب ساتیجیسی و ناشر کیمی بو شهرده فعالیت گؤسترمیشدیر. شاه دؤرونون سون آیلاریندا «آغ جیلیدلی کیتاب» کیمی تانینان یاساق موضوعلو کیتابلارین گیزلی نشری ایله مشغول اولور و انقلابین غلبه‌سیندن سونرا دا داها آرتیق انقلابی و مترقی ادبی اثرلری، زحمتکش جمعیتین آرزو ایستکلرینی و مبارزه تاریخینی عکس ائتدیرن ادبیات نمونه‌لرینی نشر ائتدیریر. خسته‌لیگیندن اؤنجه آذربایجانین ملی دمکراتیک حرکاتی موضوعسو ایله یازیلمیش اوستاد «ابراهیم دارابی»نین «اشک سبلان» (ساوالانین گؤز یاشی) آدلی سامباللی سیاسی- اجتماعی رومانینی نشر ائدیر.
«یاشار» سون ایللرده خسته‌لیگی سببیله اؤلکه‌نین شیمال بؤلگه‌سینده یاشاماغا مجبور اولموشدو.
ایشیق- آذربایجان ادبیات و اینجه صنعت سایتی – امکداشلاری آدیندان، عزیز دوستوموز «اسماعیل رستم‌زاده» (یاشار)ین ایتگیسینی اونون حؤرمتلی عائله عضو‌لرینه، دوست و یولداش‌لارینا، کیتاب نشری صینیفینه باشساغلیغی وئریر، خاطیره‌سینی حؤرمتله یاد ائدیر و عزیزله‌ییریک.
ایشیق- آذربایجان ادبیات و اینجه صنعت سایتی
۲۳/۰۵/۱۴۰۴
