اوزاق اولسایدی دا او ایشیلتی‌لار
گؤرنده اوره‌کده اومود دوغاردی.
اونلارین سوزالمیش شوعالاریندان
بیزیم کندیمیزه سئوینج یاغاردی.
ظولمت گئجه‌لرده اولدوز سایاغی
سایریشا- سایریشا گؤرونردی‌لر.
حیالی، ایستکلی بیر قیز سایاغی
دومان یایلیقلارا بورونردی‌لر.
آراز آرامیزدا یوخلاشیردی گاه،
کؤرپوسوز آدلاییب گلیردی ایشیق.
قارانلیق تملدن لاخلاشیردی گاه،
بوتون ظولمتلری دلیردی ایشیق.
بیر گئجه اونلاری گؤرمه‌ینده بیز
صاباحی بورانلی، قارلی دویاردیق.
نه واخت کی اونلاردان گؤرونردی ایز
کندی ده دؤولتلی، وارلی دویاردیق.
ایندی چیراغلاری سؤنوک گؤرنده
ائله بیل عؤمرومون چیراغی سؤنور
بیر خالقین بختینی دؤنوک گؤرنده
کد‌ر پارچا- پارچا قلبیمی یونور
ایلاهی نه اولدو سؤندو چیراغلار
ایندی کی دونیانین ایشیق واختی‌دی؟!
اوزلری ظولمته دؤندو چیراغلار
چون دونیا شئیطانین قیزیل تاختی‌دی.
قلبی قارانلیقلار ظولمت تؤره‌تدی،
ظولمتدن تؤره‌نن فلاکت اولار.
هاردا عدالتی شرر بودره‌تدی
اوردا چیچکلر ده آچمامیش سولار.
