مجید امین مؤید؛ (۱۶ خرداد ۱۳۰۹ تبریز- ۶ خرداد ۱۳۹۳ تهران)
شرفلی خاطیره‌سینه عشق اولسون!
۱۰ ایل بوندان اول – ۱۳۹۳نجی ایلین خرداد آیی‌نین آلتینجی گونو – اؤلکه‌میزین تانینمیش اجتماعی و ادبی شخصیتی و بیر اینسان عؤمرونو اجتماعی عدالت، آزادلیق و بشر سعادتی اوغروندا موباریزه‌ده صرف ائد‌ن آذربایجان ادبیاتی‌نین یورولماز، صداقتلی و صمیمی حامیسی «اوستاد مجید امین مؤید» ۸۴ یاشیندا ابدیته قووشدو و جنازه‌سی چهارشنبه گونو (۷ خرداد ۱۳۹۳) یاشادیغی ائودن مشایعت اولونوب تهرانین بهشت زهرا مزارلیغیندا تورپاغا تاپشیریلدی.
1309نجی ایلین خرداد آییندا قهرمان تبریز شهرینده دونیایا گؤز آچان مجید امین مؤید، بوتون عؤمرونو اینسان سعادتی، آزادلیق، برابرلیک و ملی وارلیق اوغروندا موباریزه‌ده کئچیردی؛ اوتوزونجو اون ایل‌لیک‌ین اول‌لرینده چوغ آغیر و گیزلی بیر شرایطده آذربایجان دمکرات فرقه‌سی‌نین داخیلده‌کی گیزلی تشکیلاتی‌نین اورقانی کیمی آذربایجان تورکجه‌سینده هفته‌لیک نشره باشلایان «آذربایجان» روزنامه‌سی‌نین ایکینجی تحریریه هئیتی‌نین ترکیبینه داخیل اولور. ۱۳۳۰دان ۱۳۳۴نجی ایله کیمی گؤرکملی عالیم و اجتماعی شخصیت «بهزاد بهزادی»نین رهبرلیگی ایله ۱۴۲ نومره‌ده نشر اولان بو روزنامه بوتون ایران خالق‌لاری‌نین ایمپریالیزم، خصوصی ایلهده انگلیس ایمپریاسی‌نین علیهینه گئدن خالقین موباریزه‌سینه نور ساچان مشعل‌لردن اولور. آنجاق ۱۳۳۴- نجی ایل قولدور محمدرضانین حاکمیت قوروقچولاری طرفیندن تعطیله اوغراییر؛ نشرینه قاداغا قویولور و روزنامه‌نین مسئول مدیری حبسه آلینیر. مجید امین مؤید ایسه اؤز موباریزه‌سینی ۱۳۳۸نجی ایله قده‌ر فرقه‌نین گیزلی تشکیلاتی چرچیوه‌سینده داوام ائدیر؛ نهایت ۱۳۳۸نجی ایل بو گیزلی تشکیلات کشف ائدیلدیکدن سونرا توتولور؛ ایلک محکمه‌نین قراری اساسیندا اعدام حؤکمو آلیر؛ سونرا حؤکمو عؤمورلوک حبس جزاسینا ده‌ییشیلیر و نهایت ۱۹ ایلدن سونرا ایران انقلابی عرفه‌سینده آزادلیغا بوراخیلیر.
مجید امین مؤید اؤلومدن قورتاریب، عؤمورلوک حبس جزاسی کئچیرتدیگی زامان دا روحدان دوشمه‌ییر. گله‌جه‌یه اینامی و اینسانلارا اولان سئوگیسی اونو حبس ایللرینده ادبیات ساحه‌سینه یؤنلدیر؛ اؤز ترجومه‌لریله دوستاق‌لا جمعیت آراسیندا معنوی کؤرپو قورور؛ اؤلکه‌میزین اینسانلارینی دونیانین بؤیوک و آدلیم متفکرلری‌نین دوشونجه‌لریله تانیش ائدیر. بونونلادا یئنی فیکیرلی، یئنی فورمالی ادبیاتلا اوخوجو و یارادیجیلارین بدیعی ائسته‌تیک ذوقونون، شعورونون تربیه‌سی و زنگینلشمه‌سی ساحه‌سینده اوغورلو آددیملار آتیر و اؤلکه‌میزین ادبی مدنی حیاتیندا، اونون معاصیرلشمه‌سی اوغروندا ده‌یرلی رول اویناییر.
مجید امین مؤید ایران انقلابی غلبه‌سیندن سونرا دا بؤیوک بیر سئوگی ایله آذربایجان خالقی‌نین ملی وارلیغی، اؤلکه‌نین آزادلیغی و خالقین سعادتی، ادبیاتیمیزین، مدنیتیمیزین زنگینلشمه‌سی و چیچکلنمه‌سی اوغروندا چالیشاراق آذربایجانین، ایرانین و دونیانین ائولادلارینی گله‌جه‌یین گونشلی، آیدین، آزاد و خوشبخت گونلری‌نین شفقلی اوفوقلرینه سسله‌ییر. اوزون ایللر تهراندا فعالیت گؤسترن «صابر ادبی انجومنی» و «آذری» مجله‌سی چرچیوه‌سینده اؤز بیلیک‌لرینی، تجروبه‌لرینی گنج‌لرین و درنه‌یین عضولری‌نین اختیاریندا قویماغا چالیشیر.
ایندی آغیر ایتگیسیندن ۱۰ ایل کئچمه‌سینه باخمایاراق، بیز اوستادیمیزین یوخلوغونو دونیا وارلیغینا کئچیریک و حسرتینه بیر باهار پنجره‌سی آچیریق دونیا بویدا. اوردان باخیریق قارداشجاسینا استقبال ماهنیسی اوخویان آغلی، قارالی اینسانلارا. نئجه کی مجید عمی باخدی عؤمور بویو بو پنجره‌دن بئشیگی قان قوخوسو وئره‌ن قیزیل بیر باهارا و اوره‌یی امین-آمانلیغا چیرپینان یارالی دونیایا.
«مجید عمی» اوره‌یی‌نین یاغینی گؤز ببه‌یی‌نین ایشیغی‌ایله گیله- گیله اریتدی و تؤکدو بئیینلریمیزه؛ دوشوندوک، اؤیرندیک و اؤیرنمک ایسته‌دیک. گؤزلریمیزی نیویورک کؤچگونلری‌نین فلاکت دونیاسینا آچدی و سرمایا دوشگونلری‌نین آلچاقلیغینی گؤستردی. اونلارین سیماسیندا دویدوق صینیفلی جمعیتین دهشتینی بیز. دوشوندوک و اؤیرندیک.
ایندی ۱۰ ایل‌دیر او مهربان و معصوم باخیشلاری‌نین دالغالارینا دالمیریق؛ داها دوداغیندا چیچکله‌نن نجیب تبسمون عطرینی دویموروق. آنجاق یوخلوغونو دونیا وارلیغینا کئچیریک. نییه کی، هله‌ده تبریز قاراگیله‌سی‌نین گؤزلری یول چکیر؛ هله‌ده قیزیل باهارین بئشیگیندن قان قوخوسو گلیر؛ هله‌ده بو یارالی دونیادا نیویورک کؤچگونلری‌نین دهشت صدالاری یوکسه‌لیر.
هله ده دوشونمک ایسته‌ییریک؛ اؤیرنمک ایسته‌ییریک مجید‌عمی!
خرداد ۱۴۰۳- تهران
