ال -اله، قول – قولا وئرمه‌سک ایندی
بیر -بیر یئره دوشوب النمه‌لی‌ییک.
بئجردیب، بیتیریب درمه‌سک ایندی
سونوندا اؤزگه‌دن دیلنمه‌لی‌ییک.
ائله چاپیب-کسیب پئیله‌میش اوغرو
ساناسان اوجاقدا توستو یوخوموش.
آتالار آتاسی سؤیله‌میش دوغرو
«تورکون تورکدن باشقا دوستو یوخوموش.»
گونش دوغولمادان، دان سؤکولمه‌دن
یاتان‌لار اویانسین، چاغیرماق گره‌ک!
توپراق وطن اولمور قان تؤکولمه‌دن،
اؤزگورلوک نامینه باغیرماق گره‌ک!
خیالا دالدیران دیلک گؤستره‌ن
سولو دا یالاندی، ساغی دا یالان.
جننته اویدوران چیچک گؤستره‌ن
بوستانی یالاندی، تاغی دا یالان.
وطن قایغیسینی چکمه‌لییم من
تک قالیب باشیمی قورومامیشدان.
بایراق آغاجینی اکمه‌لییم من
شهیدلرین قانی قورومامیشدان.
مظلومون حاققینی دیریلتمک اوچون
ظالیمین قافاسی اوغولمالیدی.
عدالت قاطارین یئریتمک اوچون
ظولمون یورد-یوواسی داغیلمالیدی.
