سینه‌می یاندیریر ییغیلان سؤزلر،
نه گره‌ک زورونان دوغولان سؤزه؟!
نه چوخ بورولغاندا بوغولان سؤزلر
اومید اللرینی اوزادیر بیزه.
بیرجه سؤز اؤلومدن آلارسا شاعر
او سؤز ده یاشادار مین ایل شاعری.
سؤزون اوره‌یینه دولارسا شاعر
البت ده اولاجاق کؤنول شاعری.
سؤزون قایغیسینی، نازینی چکسن
سؤز اؤزو دوزولوب شعرین اولاجاق.
نه قده‌ر معنانی سن اوزه چکسن
شعرین ده او قده‌ر درین اولاجاق.
اولدوزلو گؤیلرده قول- قانادیمیز،
یئرین باغرینداکی کؤکوموزدو سؤز.
بو گون حیاتیمیز، آغیز دادیمیز
دونندن صاباحا یوکوموزدو سؤز.
