سنی یار اؤلچوده طالع منه قیسمت وئره‌جک
اوره‌ییمدن دوغولان سئوگییه قیمت وئره‌جک
بیلیرم دوغرو گؤزللیک پایی گلمک ده یقین
سیناییب عاشیقینی، جان دولو حسرت وئره‌جک
اوزو قیبله‌م ساری، گؤز یاشلاریمین حوسنو بودور
ایکی یاردان بیریسی کؤنلومه دیققت وئره‌جک
بیری حق‌دیر، من اونون لوطفونه واردیر اومودوم
بیری سنسن قلمیم، حق سنه حؤرمت وئره‌جک
آیاغین یونگول اولوب، غم قاپیسی باغلاناجاق
گلیشین بیر داهادا سئوگییه فورصت وئره‌جک
غزلین باغرینا کؤچ، کؤنلونو حکمتلی یاشات
اوره‌ییم بویدا اوجال، ائل سنه قودرت وئره‌جک
واراغین باغرینی اینجیتمه، گیلئی‌دن اوزاق اول
یئری گلجک سنه قوینوندا دا جنّت وئره‌جک
قلمیم نون سؤزو، اولسون کی همین نور سؤزودور
قلم آیدینلیغا دوغرو، ائله نصرت وئره‌جک
ائله یاز سؤزلریمی هم اوخویان، هم ائشیدن
اوره‌ییندن سنه آلقیش کیمی ثروت وئره‌جک
بولاغ اول قوی آخارین اَیرینی – دوزدن آییرا
دنیز اولجاق، آخیشین یوردوما لذّت وئره‌جک
سئویلن کلمه‌لرین قلبینی فتح ائیله، اینان
ائلیم آرخاندا دوروب، بیل سنه جرات وئره‌جک
یارالی سؤزلریله، یارما اوره‌ک‌لر یاراسین
یاردان، هر یارادان، ائللره عبرت وئره‌جک
یئنه سؤزلر هؤرویون آچ دارا بیر نازلی غزل
دارا چکمکده او ساچ‌لار، منه مؤهلت وئره‌جک
ائلی آذر، یئری بایجان، دیلی تورکون بئشییی
آدی‌نین وورغونویام، «ائلمان»ا عزّت وئره‌جک
ا.د.ائلمان
چئویرن: ا.د.ائلمان
ترجمه: ا.د.ائلمان
سسلندیرن: ا.د.ائلمان
- شعر
- اوخوماق زامانی: < 1 دقیقه
- https://ishiq.net/?p=33215
چاپ
