کؤنلونده اولان عشق اودونا سال، منی یاندیر!
دینمز یاشادیب قوینونا قوی لال، منی یاندیر!
جنتده بیتن گول- چیچه‌یی قیسقانا بیلسن
بیر لاله کیمین باغریما چک خال، منی یاندیر!
جان سئوگی یولون گئتمک اوچون توت قانادیمدان
سنسیز یارانان نیسگیلیمی آل، منی یاندیر!
اولدوزلا آیین آچ قاپیسین، چیخ گئجه‌لردن
وئرسین گؤروشون کؤنلومه خوش حال، منی یاندیر!
عشقین «کرم»ی دوغرو ووصال، «اصلی»سی هیجران
یاندیرماغیما گل بیر «کرمی» چال، منی یاندیر!
جانلار دنیزین سئوگی گزیر اؤز گمیسی‌یله
گل منده درین بیر دنیزه دال، منی یاندیر!
گولشن‌ده گؤروش گونلری‌دیر، گل کوسو توتما
گول، قونچه دوداقدان سوزولوب بال، منی یاندیر!
«ائلمان» دیل آچیب، یالواراجاق عؤمرو بویوندا
تا وار نفسیم، سئومک اوچون قال، منی یاندیر!