شکر آللاها، یاز گلدی، طبیعت تزه‌لندی
داغ- داش دا اولان حسن و طراوت تزه‌لندی
ائل، بیر- بیری‌نین ائولرینه حمله گتیردی
بایرام گؤروشو اولدو زیارت تزه‌لندی
آجیل تالانیب، مئیوه‌لرین باغری سؤکولدو
هر بیر ائوه گئتدیکده بو غارت تزه‌لندی
بدبخت آتانین وار- یوخو بایراملیغا گئتدی
پولسوز- پاراسیز قالدی، مصیبت تزه‌لندی
بیچاره‌نی اوغلان دا سویوبدور، کوره‌کن ده
هم قیزلا گلین گلدی، رقابت تزه‌لندی
دوست- آشنا قوجاقلاشدی، اؤپوش یاغدی یاغیش تک
اوزلرده ماتیک رنگی، رطوبت تزه‌لندی
ارزش‌له اصول اولدولار البته رعایت
اخلاق قورونوب، هم ده کی سنت تزه‌لندی
سیزده گونونه آد قویولوب «روز طبیعت»
ائل بس کی زیبیل تؤکدو، طبیعت تزه‌لندی
چؤللرده، چمن‌لرده دویون‌لندی گؤیرتی
ار تاپماغا بیر دفعه ده نیت تزه‌لندی
اوچ- دؤرد آغاجا ووردو دویون ائوده قالان قیز
ووردوقجادا قلبینده کی حسرت تزه‌لندی
بعضاً ده چالیب- اویناماغا قالخدی اوشاقلار
باخجاق، قوجا کؤنلونده ده رغبت تزه‌لندی
آنجاق یادینا دوشدو، دئمیشلرکی: «یاغار قار…»
دوشجک یادا قار، سینه‌ده وحشت تزه‌لندی
تک باشچی‌لارین سازلارینا اوینادی «آرش»
بئل آرتروزا دوشدو، اذیت تزه‌لندی
حمید آرش آزاد
چئویرن: حمید آرش آزاد
ترجمه: حمید آرش آزاد
سسلندیرن: حمید آرش آزاد
- شعر
- اوخوماق زامانی: < 1 دقیقه
- https://ishiq.net/?p=32782
چاپ
