خوی زلزله‌سی کؤنلومو آتش‌لره یاخدی
بیر ایلدیریم اولدو اوره‌ییمدن منی شاخدی
ائولر یخیلیب، سانکی باشیمدان اود الَندی
عؤمروم بو آجی دویغولاریلان گوده‌لندی
آغلار چوچوغون گؤز یاشی سان اوخدو تاخیلدی
بؤیله آجیلارلا بو ائلین کؤنلو یاخیلدی
بیر کیمسه‌سیز ائل بیر-بیرینه یاردیم ائدرلر
پایلاشماغا غم غصه‌لری هایلی گئدرلر
دؤزمز وطنین غیرتی هئچ بؤیله زامان‌لار
ال الده و قول‌لار قولادیر هاممی جاوانلار
قوی ‌سیزلاماسین قارداشیمیز یا باجیمیز هئچ
هئچ بیر ایشه خالقیم دایانیب اولمایاجاق گئج
یاردیم الیمی کسمه‌رم آزاده ائلیمده
داشلار داشیرام، هر نه کی گوج واردی بئلیمده
بیز بیرلیگ‌ایله گولشنه گولزاری گتیرریک
الدن گله‌نی «خوی»‌داکی جانلاره یئتیرریک
من «سس‌سیز»م آمما سالیرام های بو زاماندا
هئچ غم کدره اوغراماسین کیمسه جاهاندا.