آذربایجانین قوجامان شاعری و ۲۱ آذر نهضتی‌نین «شاعرلر مجلسی»نین عضوی «علی نشانی» دی آیی‌نین ۱۳نجی گونو ۹۶ یاشیندایکن یاشادیغی اورمو شهرینده وفات ائتدی. آذربایجاندا و قونشو اؤلکه‌لرده گئنیش یاییلان «باغبان قیزی» و «گل گئده‌ک بنده» ماهنی سؤزلرینین موللیفی اوستاد نشانی، ۱۹۲۶ (۱۳۰۵)-نجی ایل آذربایجان جمهوریسی‌نین قازاخ ماحالیندا ایرانلی بیر عائله‌ده دونیایا گؤز آچمیش، ۷ یاشیندایکن (۱۹۳۳) عائله‌سیله بیرلیکده آتا یوردو اولان ایران آذربایجانی‌نین «مرند» تابعه‌سینده‌کی «یکان» منطقه‌سینه، سونرا ایسه «اورمو» شهرینه کؤچموش و عؤمرونون سونونا کیمی بو شهرده یاشامیشدیر.
1324نجی ایل آذربایجاندا یارانان ملی- دمکراتیک نهضت علی نشانی‌نی ده مینلر آذربایجانلی کیمی نهضتین آماللاری اوغروندا فعالیته جلب ائتمیشدیر. او بیر گنج شاعر کیمی نهضتین مقصدلرینی و خالقین آرزو – ایستک‌لرینی ترنم ائده‌ن شعرلرین موللیفی سیماسیندا چیخیش ائتمیش و اثرلرینی ملی حکومتین آنا دیلینده یایدیغی مطبوعات اورگانلاریند او جومله‌دن: «ارومیه» روزنامه‌سی و «شاعرلر مجلسی»ینده یایمیشدیر. بو سببدن ده نهضتین مغلوبیتیندن سونرا، تعقیبه معروض قالمیش، دوستاق اولموش و ایرانین «یزد» و «لرستان» ولایتلرینه سورگون ائدیلمیشدیر. بوتون بو تضییقلره باخمایاراق، شاعر علی نشانی یئنه‌ده یازیب یاراتمیش و داهادا بیتگین و دولغون اثرلرین موللیفی و چوخ حؤرمتله قارشیلانان ادبی بیر شخصیت کیمی عؤمرونون سونونا قده‌ر یارادیجیلیق قابلیتینی ایتیرمه‌میش؛ عادی بیر وطنداش کیمی اورمو شهرینده یاشامیش، تجارت‌له مشغول اولموش، ادبی سیماسینی ایسه ده چوخ لیاقتله قورویوب، ساخلامیشدیر.
اوستاد نشانی یارادیجیلیغی‌نین اساس غایه‌سینی انسان سئورلیک، وطنپرورلیک، سوسیال عدالت، جمعیت آزادلیغی، وطندن مدافعه، انسانلارا صلح و امین-آمانلیق کیمی موضوعلار تشکیل ائدیر. اثرلرینین بیر حصه‌سی، خصوصیله‌ده اسلامی انقلابدان سونرا یازدیغی شعرلری، «عؤمور یوللاریندا» باشلیغی آلتیندا ۱۳۸۸نجی ایل «یاز» انتشاراتی طرفیندن یاییلمیشدیر.
«ایشیق» – آذربایجان ادبیات و اینجه‌صنعت امکداشلاری آدیندان قوجامان آذربایجان شاعری علی نشانی‌نین ایتگیسینی، اوستادین حؤرمتلی عائله‌سینه، آذربایجان ادبی جمعیتینه، خصوصیله ده غربی آذربایجان ادبی جمعیتینه باش ساغلیغی وئریر، اونون ۲۰ یاشیندا یازدیغی و «شاعرلر مجلسی» کیتابیندا نشر اولان ایکی شعرینی تقدیم ائتمکله، خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی
۱۶/۱۰/۱۴۰۱
وطنیم
ائیله‌ین سینه‌نی سنگر سنه مردانه، منم
سنین عشقینله اینان عاشق دیوانه منم
سن چیراغسانسا اگر باشینا پروانه منم
ای اولان دهرده آرتیق بو جانیمدان وطنیم!
بیل یولوندا ائده‌رم جانیمی قوربان، وطنیم!
سئویرم من سنی دونیاده پاک ایمانیمیله
اولارام من سنه قوربان بو شیرین جانیمیله
بویارام تورپاغینی بیرده بو صاف قانیمیله
گر چی دونیاده عزیزدیر بو شیرین جان وطنیم،
بیل یولوندا ائده‌رم جانیمی قوربان، وطنیم!
سنین عشقینله همیشه آنا! قاینار بو قانیم
سنین اوغروندا حلال‌دیر بو وجودوم، بو جانیم
فیرلانیم باشینا پروانه کیمی قوی دولانیم
کئچمیشم چونکی سنینچون بو جانیمدان وطنیم!
بیل یولوندا ائده‌رم جانیمی قوربان، وطنیم!
قوجاغیندا بؤیودوب سسلییه‌نیم سنسن آنا!
سئودیگیم شانلی دیاریم، وطنیم سنسن آنا!
هم باغیم، هم چیچگیم، هم چمنیم سنسن آنا!
بولبولم من، سئویرم سانکی گولوستان، وطنیم!
بیل یولوندا ائده‌رم جانیمی قوربان، وطنیم!
ایستیرم من سنی دونیاده گولوستان اولاسان
غمدن آزاد اولوبان شاد و خرامان اولاسان
چئوریلیب جنته بیر روضه‌ی رضوان اولاسان
اوندا دوشمانلار اولار زار و پریشان، وطنیم!
بیل یولوندا ائده‌رم جانیمی قوربان، وطنیم!
گلدی باهار
قارا قیش گئتدی، سراسر بزه‌نیب گولدو جهان
باخیرام هر طرفه باغیله بوستان گؤرورم.
بزه‌نیب باغیله گولزار، گلیب فصل بهار
یئنه‌ده بولبول شیدانی خرامان گؤرورم.
اریییب شاختالی قار گئتدی بوتون دوزلردن
آچیلیب باغ و چمنده گول و ریحان گؤرورم.
دؤزوب هیجرانلارا بولبول یئتیشیب گولزاره
اوتوروب ذوقیله گول اوسته غزلخوان گؤرورم.
چکیلیب گئتدی بوتون قارلی بولوت گؤیلردن
قیزاریب شانلی گونش، نورونو تابان گؤرورم.
بو گونشدن آلاجاقدیر هامی بیر تازه حیات
گوله‌جک خالق، گؤزه‌ل عصریله دؤران گؤرورم.
قایناق: شاعرلر مجلسی، نومره ۳-۴ ، آبان آذر ۱۳۲۴، شاعرلر مجلسی‌نین نشریاتی، تبریز، صحیفه ۲۵۹
