ائل یاددان چیخارتماز، تاریخ اونوتماز …
مرادعلی قریشی (م. قافلانتی) – (۱ خرداد ۱۳۱۲ چاراویماق/حیدرآباد کندی – ۱۵ دی ۱۳۸۴ – تهران)
ائله یار گله / م. قافلانتی
اؤلمه‌میشم گلیر سسیم
ائله یار گله – یار گله.
قوچ- قوزولار قوربان کسیم
بئله، یار گله – یار گله،
ائله یار گله – یار گله.
گتیره خوش خبر بیزه
سس دوشه داغ‌لارا، دوزه،
گول- چیچکدن اینجه دوزه
تئله، یار گله – یار گله،
ائله یار گله – یار گله.
سسله‌یه وطنداشلارین
وفا‌لی یار-یولداشلارین،
مظلوملارین گؤز یاشلارین
سیله، یار گله – یار گله،
ائله یار گله – یار گله.
شنلیک توتا بوتون ائل‌لر
قالمایا غم، غصه، کدر،
باغلایا بیر گوموش کمر
بئله، یار گله – یار گله،
ائله یار گله – یار گله.
سئون اوره‌ک‌لر دؤیونه،
باشلایا‌لار توی-دویونه،
خالقیمیزین گوجو دؤنه
سئله، یار گله – یار گله،
ائله یار گله – یار گله.
یاشیللانا بوز تارلا‌لار
دورنا گله قاتار- قاتار،
سوزمه‌یه دوشه سونا‌لار
گؤله، یار گله – یار گله،
ائله یار گله – یار گله.
بیرین دئدیم قالدی یوزو
اوره‌ییمین ایچگین سؤزو،
قافلانتی‌نین غملی اوزو
گوله، یار گله – یار گله،
ائله یار گله – یار گله.
۱۳۸۰
