هله ده «الطفات»ی چاغیریرام
اوشاقلیقدا ایتن بیر دوست؛
هله ده «ساری» آدلی ایتیمی آختاریرام
دمیر یولوندا قانینا بله‌شن بیر دوست؛
هله ده قوولوق پوفلورم باجیم گولسون؛
اللریمده یومورتا، آشیق آتیرام؛
هله ده یهرسیز گؤی آتیما جومورام
آتامدان آلینان بیر هدیه؛
هله ده قونشو قیزی‌نین
گؤزلری‌نین حسرتینده اولدوزلارا باخیرام؛
هله ده آنامین سسی گلیر:
-آش سُووودی بالا
گون باتدی آخشام اولدی
گَل «حسن»!
من ده یاواشجادان
ائوین بوجاغینا سوزورم
الیمده سووزولو آش، تاختا قاشیق.
آنامین سسی قولاغیمدا
هله ده سئگاه چالیر:
-بالام لای لای!