بئش دوداق سئوگی
حسن صفورا
۱.
گؤزلریندن
آخان ماوی‌لیک
اوره‌ییمین اورتاسیندا یئر سالیب
ایندی سن رنگ‌لرله برابر قلبیمده‌سن!
۲.
اؤزوم
اؤزوم‌له دانیشیرام
بلکه
سن و آدین
هئچ زامان یادیمدان گئتمه‌سین!
۳.
سن
بیر معجزه‌سن
اللرینی چکسن باشیما
بیرده، بو داغلاری آشارام!
۴.
اریک دنه‌لرینه
داریخمیشام،
مؤحکم سیلکه‌له
تؤکولوم اتک‌لرینه!
۵.
گل
باهار یاغیشی اولما
یا یاغ بیتؤو باهار اولوم،
یا چیچک‌لن
دونیا گوزللنسین؛
من باهار اولماسام‌دا
دونیا باهارسیز قالماسین!
