باش ساغلیغی!
«کسگین» تخلصلی شاعر «جواد نعلبندی» وفات ائتدی
چوخ تاسفله، آلدیغیمیز خبر اساسیندا، «کسگین» تخلصلی آذربایجان شاعری «جواد نعلبندی» آذر آیی‌نین ۲۱نجی گونو تبریزین ۲۹ بهمن خسته‌خاناسیندا بؤیرک چاتیشمامازلیغی سببیندن حیاتلا ابدیلیک وداعلاشمیشدیر.
جواد نعلبندی (کسگین) ۱۳۳۸نجی ایل قاراداغین(اهرین) «قره قیه» کندینده دونیایا گؤز آچمیش، هله اوشاق‌ایکن عائله‌سیله بیرگه تبریز شهرینه کؤچموش اورادا مسکونلاشمیشدیر. بو شهرده اورتا مکتب سویه‌سی قده‌ر تحصیلاتینی داوام وئرمیش، اولجه حربی هاوا قوه‌لرینده (نیروی هوایی) ایشه قبول ائدیلمیش؛ بیر مدتدن سونرا اورادا ایشینه داوام ائده بیلمه‌دیگیندن استعفا وئریب و «تراکتورسازی»ده ایشه باشلامیش و ۱۳۹۷نجی ایل تقاعده چیخانا قده‌ر اورادا ایشله‌میشدیر.
«کسگین» گنج یاشلاریندان آذربایجان ادبیاتی خصوصیله ده شعرله ماراقلانمیش و و بیر شاعر کیمی ادبی فعالیتلرینه عؤمرونون سونونا قده‌ر داوام وئرمیشددیر. ایندییه‌دک اثرلرینین بیر قیسمی «گونشدن ساچان نور» (۱۳۸۵)، «ایتمیشیمی آراییرام» (۱۳۸۸) و «ائل عاشقی یورولماز» (۱۳۹۲) عنوانلاریندا نشر ائدیلیبدیر.
«ایشیق» آذربایجان ادبیات و اینجه‌صنعت سایتی امکداشلاری انسان سئور شاعریمیز جواد نعلبندی(کسگین)نین ایتگیسینی مؤحترم عائله‌سینه، دوست تانیشلارینا و آذربایجان ادبی جمعیتینه باش ساغلیغی وئریر و قلمداشیمیزین خاطیره‌سینی عزیزله‌ییر.
«ایشیق» آذربایجان ادبیات و اینجه‌صنعت سایتی
۲۲ آذر ۱۳۹۹
