اعتراف
ائلتاش صالیحی
اعتراف ائدیرم
“سنی سیلمک اولماز”
کیمسه گؤزلرینی آینالاردان سیلنمز،
ساچینی یئل‌لردن…
الینی…
الینی الیمده خاطیرلارکن
الیمی اؤپه‌سیم گلیر.
هر گئجه
الین بویدا بیر جوغرافیا توخونور یالنیزلیغیما؛
(باشقا بیر شعریمده دئمیشدیم
«گئجه‌نی بیر دوشون جانیم»
او
بیر سیلاح‌دیر
یالنیز اینسانلارین قافاسینا سیخیلیر…)
ایشاره بارماغین دوداقلارا قویولدوغو آن‌‌دی
سنی سئومک٬
تک آیاقدا دوران بیر قوش قووان دی یالنیزلیغیم
اونو تورپاق قوروجوسو سانسالاردا
تورپاق اونو آیاقدا ساخلادیغینی باغیرماق ایسته‌ین تک آیاقلی بیر قوش قووان،
بونون نه‌قدر حوزونلو اولدوغونو کیم نه بیلیر؟!
سندن سونرا
بوغازیمدا بیر بالیق ساخلاییرام
هر آن اؤزونه اؤپوش گؤندرن بیر آکواریوم بالیغی
او
یالنیزلیغین سون سیکانسی دیر.
گل بیر یالانا داها ایناندیر منی
یا دا گل منی اویاندیر بو آیریلیقدان؛
من
سن
او…
اوندان سونرا «بیز» دیلیمیزده بویوک بیر یالانمیش.
اوندان سونرا
دیلیمده بوتون سس‌لر او
بوتون اؤزنه‌لر سن
و بوتون مجهول بوراخیلان جومله‌لر من
او قدر مجهول کی باشقالارین سئوینجینه سئوینیرم،
سای کی بو بیر اعتراف‌دی
بونون نه‌قدر حوزونلو اولدوغونو کیم نه بیلیر؟!
اینجه دوشوندوگومده
دونیانین ایلک سینیرلاری «من»دن باشلانیر
جانیم منیم
چوخداندیر سینیرلاریما سالدیرمیشلار
بیلمزلر کی
بیر ائوین ییخیلماسی دووارلارین اوچماسینا دگیل
ایچینده‌‌کی اینسانلارین ییخملاسینادی.
سای کی بو بیر اعتراف‌دی،
یالنیزلیغین زهری دامارلارا نئجه ایشگدیگینی بیلن،
قارغالارا آجییان بیر قوش‌قووان‌دی یالنیزلیغیم
