ایکی شعر
حیدر عبادی(باریش)
۱٫
دوداقلاردان بال گؤزله‌میرم گؤزه‌ل،
ایکی کلمه سئوگی دانیشسان یئتر!
گؤزلردن ده نه آی – اولدوز نه گونش
گؤزلریمله تکجه آلیشسان یئتر!
اللرین نه آلوو اولسون، اود اولسون،
یاناقلارین نه لاله‌لی آد اولسون،
تکی اوره‌ک محبت‌ایله دولسون،
من دنیزه گلیب قاریشسان یئتر!
ساچلارین نه کولک‌لرین بایراغی،
دیزلرین نه کوره‌ک‌لرین دایاغی،
نفس اولسان نفسیمین سایاغی
جانیما دولماغا چالیشسان یئتر!
طوفانلاردا دایانارام قارشیندا
هئچ بیر دوگون گؤرونمه‌سین قاشیندا؛
اوتورارسان هر غزلین باشیندا
سئوگی وئرسن شعره «باریش»سان یئتر!
۲٫
اللرینین چیچکلنمیش یارالاریندان
دانیشیر شاعر؛
شعیر قیرمیزی دون گئییر
گؤزلرینین آجیسینا.
اوووندورمایین بو شعری!
سویوندورمایین بو شعری!
او کؤینگین سول جیبینده
یاری جان سئوگی،
یاری جان نیفرت،
یاری جان عشق،
یاری‌جان جان.
اللرینی گؤتورمه‌یین گؤزلریمدن
شعر
یارالی
بیتمز
بیتمز…
