-دینمه! دئدیلر
دادمان فروزنده(دوشگون قوجا بئیلی)

اوره‌گیمد‌ن دئدیم، دیلیمدن دئدیم
وطنیمد‌ن دئدیم، ائلیمد‌ن دئدیم
گؤزومده داشلانان سئلیمدن دئدیم
-دانیشما! دئدیلر، -دینمه! دئدیلر.

ال آتدیم زیروه‌یه، ال آتدیم داغا
دوشدوم دره‌لره داش یاغا- یاغا
قاریشدیم بورانا، باتدیم چوغانا
-دانیشما! دئدیلر، -دینمه! دئدیلر.

گول اکدیم شبنم‌سیز تالاندی نرگیز
کسدیلر یولومو سسیز- سمیرسیز
آسدیلار ساچیمدان سویدولار گوندوز
-دانیشما! دئدیلر، -دینمه! دئدیلر.

دئدیم داریخیرام؛ داردیر قفسیم
اوزدولر دیلیمی، دوندو نفسیم
دئدیم من اینسانام؛ اوجالار سسیم
-دانیشما! دئدیلر، -دینمه! دئدیلر.

تاپدادی کؤکسومو اوره‌ک چاغیریشی
دئدیم یاز ایستیرم، نئیلیرم قیشی
تؤکدولر اوستومه بویات قارغیشی
-دانیشما! دئدیلر، -دینمه! دئدیلر.

بیر عصریدن آرتیق بو آغری ندی
یالادیم قانیمی یارام گؤینه‌دی
غئیرتیم ایچیمی دارتدی، چینه‌دی
-دانیشما! دئدیلر، -دینمه! دئدیلر.

بیر گؤزوم آرازدا، بیر گؤزوم کورده
آهیم توستولندی آلوو گؤیرده
گؤزوم گؤره- گؤره سالدیلار درده
-دانیشما! دئدیلر، -دینمه! دئدیلر.

حیاتین گؤزونده آلیشدیم چاغدیم
آتیلان داشلارین سئلینده آخدیم
باش اوستده یئریدیم، ایاق اوست باخدیم
-دانیشما! دئدیلر، -دینمه! دئدیلر.